لاہور ہائی کورٹ نے سابق وزیراعظم نواز شریف کی رپورٹس کو ریکارڈ کا حصہ بنانے کی درخواست پر نیب سے جواب طلب کرلیا۔

لاہور ہائی کورٹ کے جسٹس علی باقر نجفی کی سربراہی میں 2رکنی بینچ  نے مریم نواز کا نام ای سی ایل سے نکالنے اور پاسپورٹ واپسی سے متعلق کیس کی سماعت کی۔

مریم نواز کے وکیل امجد پرویز ایڈووکیٹ نے دلائل دیتے ہوئے کہا کہ سابق وزیراعظم نواز شریف کے ڈاکٹروں نے ان کے آپریشن کا مشورہ دیا ہے،مریم نواز اپنی والدہ کو بستر مرگ پر چھوڑ کر بیرون ملک سے وطن واپس آئیں جو اپنی ماں کھو چکی ہیں،اپنے والد کی عیادت کے لیے عدالت انہیں صرف ایک بار 4یا 6 ہفتوں کے لیے بیرون ملک جانے کی اجازت دے، ہر قسم کی گارنِٹی دیتے ہیں کہ مریم نواز واپس آ جائیں گی۔

نیب پراسیکیوٹر نے کہا کہ مریم  نواز سزا یافتہ ہیں، انہیں بیرون ملک جانے کی اجازت نہیں دی جاسکتی۔

عدالت نے نواز شریف کی رپورٹس کو ریکارڈ کا حصہ بنانے کی درخواست پر نیب سے جواب طلب کرتے ہوئے سماعت 25فروری تک ملتوی کردی۔