اسلام آباد:چیف جسٹس اسلام آباد ہائیکورٹ اطہر من اللہ کے سیکرٹری کا کورونا ٹیسٹ پازیٹو آ گیا۔

ذرائع کے مطابق،  سیکرٹری ٹو چیف جسٹس اسد کھوکھر میں کورونا وائرس کی تصدیق ہوگئی،اسد کھوکھر نے 4 مئی کو سرکاری لیب اور 6 مئی کو پرائیویٹ لیب سے کورونا ٹیسٹ کرائے۔

ذرائع کا کہنا ہے کہ سرکاری لیب کی رپورٹ میں بتایا گیا کہ اسد کھوکھر میں کورونا کی علامات ہیں،  پرائیویٹ لیب کی رپورٹ میں کورونا ٹیسٹ پازیٹو آنے کی واضح نشاندہی کی گئی ہے۔

ذرائع کا مزید کہنا تھا کہ چیف جسٹس کے سیکرٹری کا آفس سیل کر دیا گیااوراسد کھوکھر کو   رضاکارانہ طورپرگھر میں علیحدگی اختیارکرنے کی ہدایت  کی گئی ہے۔

ذرائع نے بتایا کہ چیف جسٹس اطہر من اللہ کے سیکرٹری اسد کھوکھر بخار کے باعث چند دنوں سے آفس نہیں آ رہے تھے ۔

عدالتی حکام کے مطابق،چیف جسٹس اطہرمن اللہ سمیت دیگر ججز کے بھی کورونا ٹیسٹ کرانے کا فیصلہ کیا گیا ہے جس کیلئے ڈاکٹرز کی ٹیم 25 ٹیسٹنگ کٹس کے ساتھ اسلام آباد ہائیکورٹ کی ڈسپنسری پہنچ گئی جہاں ملازمین کے مرحلہ وار ٹیسٹ کرانے کا سلسلہ جاری ہے۔