کراچی: سخت گرمی کے باوجود کراچی میں بجلی کی بدترین لوڈشیڈنگ جاری ہے، 12 سے 14 گھنٹے بجلی غائب رہنا معمول بن گیا، شہری کہتے ہیں رات بھر بجلی نہیں ہوتی۔

کراچی میں بادل تو نہ برسے لیکن بجلی کی لوڈشیڈنگ قہر ڈھارہی ہے، شدید گرمی اور حبس میں اضافے کے باعث متعدد علاقوں میں 12 سے 14 گھنٹے بجلی کی بندش سے شہری رل گئے۔

گلبہار، رضویہ سوسائٹی، ناظم آباد ، لیاقت آباد ،بفرزون، جہانگیر روڈ، امین آباد ، ماٹن کوارٹرز، جمشید روڈ، ملیر، سعود آباد ، ماڈل کالونی، گلشن اقبال ، اورنگی ٹاؤن ، بنارس، کورنگی ، برنس روڈ ، گارڈن اور اولڈ سٹی ایریا سمیت کراچی کے بیشتر علاقوں میں شہری رات دن بجلی کی بدترین لوڈشیڈنگ جاری ہے۔

دوسری جانب کے الیکٹرک کا کہنا کہ بجلی کا شارٹ فال 500 میگاواٹ تک پہنچ گیا ہے۔