وزارت پیٹرولیم ڈویژن نے 11 نومبر تک کے لیے پیٹرول اور ڈیزل کی نئی قیمتوں کا نوٹیفکیشن بھی جاری کردیا ہے، جس میں بتایا گیا ہے کہ آئل اینڈ گیس ریگیولیٹری اتھارٹی (اوگرا) نے وفاقی حکومت کے جاری کردہ طریقہ کار کی بنیاد پر پیٹرولیم مصنوعات کی قیمتوں میں رد وبدل کیا ہے۔

نوٹیفکیشن کے مطابق پیٹرول کی فی لیٹر قیمت میں 8 روپے کی کمی کی گئی ہے، جس کے بعد پیٹرول کی قیمت 346 روپے سے کم ہو کر 338 روپے فی لیٹر ہوگئی ہے۔

اسی طرح ہائی اسپیڈ ڈیزل کی فی لیٹر قیمت میں 7 روپے کی کمی کی گئی ہے، اس کمی کے بعد ہائی اسپیڈ ڈیزل کی قیمت 378 روپے کم ہو کر 371 روپے فی لیٹر ہوگئی ہے۔

پیٹرولیم ڈویژن کی جانب سے جاری کردہ نوٹیفکیشن کے مطابق پیٹرولیم مصنوعات کی نئی قیمتوں کا اطلاق آج رات 12 بجے سے اگلے ایک دن 11 نومبر کے لیے ہوگیا۔

پیٹرولیم ڈویژن کے مطابق اعلان کردہ قیمتیں عالمی مارکیٹ میں پیٹرول اور ڈیزل کی قیمتوں سے منسلک ہیں۔ اعلامیے میں کہا گیا کہ عالمی مارکیٹ میں تبدیلیوں، پلاٹس ریٹس، پریمیم اور دیگر اخراجات کو مدنظر رکھتے ہوئے پٹرولیم مصنوعات کی قیمتوں میں ردوبدل کیا گیا ہے۔

یاد رہے کہ 17 جولائی سے اب تک پیٹرول کی قیمت میں مجموعی طور پر 36 مرتبہ کمی اور 39 مرتبہ اضافہ کیا گیا ہے وہی ہائی اسپیڈ ڈیزل کی قیمت میں اس عرصے کے دوران 32 مرتبہ کمی ہوئی اور 45 مرتبہ اضافہ ریکارڈ کیا گیا ہے۔

اس سے قبل گزشتہ ہفتے کے آخری روز 06 نومبر کو حکومت نے اگلے 4 دن کے لیے 07 نومبر سے 10 نومبر تک پیٹرولیم مصنوعات کی قیمتوں میں رد و بدل کرتے ہوئے پیٹرول کی فی لیٹر قیمت میں 6 روپے 59 پیسے اور ہائی اسپیڈ ڈیزل کی فی لیٹر قیمت میں 4 روپے 25 پیسے کی کمی تھی، جس کے بعد پیٹرول کی قیمت 346 روپے فی لیٹر اور ہائی اسپیڈ ڈیزل کی قیمت 378 روپے فی لیٹر مقرر ہوگئی تھی۔

واضح رہے کہ مشرق وسطیٰ بحران کے باعث حکومت کی جانب سے پیٹرولیم مصنوعات کی قیمتوں کا روزانہ کی بنیاد پر تعین کیا جاتا ہے تاہم ہفتہ اور اتوار کو قیمتیں برقرار رہتی ہیں۔

مسلسل مہنگے ایندھن کے اثرات کم کرنے کے لیے 13 ستمبر کو وزیراعظم شہباز شریف نے موٹرسائیکل، رکشہ، چنگچی اور 800 سی سی تک کی گاڑیوں کے صارفین کے لیے فی لیٹر پیٹرول پر 100 روپے ریلیف دینے کا اعلان بھی کیا تھا۔

پاکستان کرکٹ بورڈ (پی سی بی) کے ترجمان نے دوسرے ٹیسٹ کے وینیو کی تبدیلی کی تصدیق کرتے ہوئے بتایا کہ میچ اب 17 سے 21 نومبر تک راولپنڈی کرکٹ اسٹیڈیم میں کھیلا جائے گا۔

ترجمان کے مطابق لاہور میں اسموگ کی بڑھتی ہوئی شدت کے پیش نظر میچ کا مقام تبدیل کرنے کا فیصلہ کیا گیا ہے۔ ابتدائی شیڈول کے مطابق پاکستان اور سری لنکا کے درمیان دوسرا ٹیسٹ 17 سے 21 نومبر تک لاہور میں ہونا تھا تاہم اب یہ مقابلہ انہی تاریخوں پر راولپنڈی میں کھیلا جائے گا۔

پی سی بی کے مطابق دوسرے ٹیسٹ کے شیڈول میں کوئی تبدیلی نہیں کی گئی، صرف میچ کا وینیو تبدیل کیا گیا ہے۔

واضح رہے کہ سیریز کا پہلا ٹیسٹ میچ بھی راولپنڈی ہی میں جاری ہے، جس کا مطلب ہے کہ اب اس 2 ٹیسٹ میچوں کی سیریز کے دونوں میچز راولپنڈی ہی کی میزبانی میں کھیلے جائیں گے۔

سماجی رابطے کی ویب سائٹ ایکس پر اپنے بیان میں ایرانی وزیر خارجہ عباس عراقچی نے فرانسیسی وزارت خارجہ کے اس بیان پر ردعمل دیا ہے، جس میں فرانس نے اپنی سرزمین پر سائبر حملوں کا الزام ایران پر عائد کیا تھا۔

ایرانی وزیر خارجہ نے فرانسیسی حکومت کو تنقید کا نشانہ بناتے ہوئے کہا کہ فرانسیسی حکام اپنے عوام کی مشکلات تو حل نہیں کرسکتے، ان کی حکومت سپر مارکیٹوں کے فرج تک سنبھالنے کی صلاحیت نہیں رکھتی اور اپنی ناکامیوں کا الزام دوسروں پر عائد کررہی ہے۔

عباس عراقچی نے کہا کہ فرانسیسی حکومت اپنی ناکامیوں کا الزام دوسروں پر ڈالنے کے بجائے اپنے عوام کی شکایات دور کرے۔

انہوں نے ایران کی طاقت سے متعلق کہا کہ ہاں، ایران بلاشبہ ایک طاقتور ملک ہے لیکن فرانس کے برعکس ہم اپنی طاقت غزہ میں قتل و غارت گری کی حمایت کے لیے استعمال نہیں کرتے، ایران اپنی طاقت کا استعمال اسکولوں اور اسپتالوں پر بمباری کے لیے بھی نہیں کرتا۔

یاد رہے کہ فرانسیسی وزارت خارجہ نے دعویٰ کیا تھا کہ 11 اور 12 اکتوبر کی درمیانی شب سائبر حملوں کی ایک مہم کے دوران فرانس میں 700 سے زائد ریٹیل مراکز کے ریفریجریشن سسٹم کے کنٹرول کو نشانہ بنایا گیا۔

فرانسیسی وزارت خارجہ کے مطابق ان حملوں کے نتیجے میں مالی نقصان ہوا، بعض مقامات پر آگ لگنے کے واقعات پیش آئے اور خوراک خراب ہونے سے کروڑوں یورو کا نقصان ہوا۔

فرانس نے ان سائبر حملوں کا الزام ایرانی پاسداران انقلاب سے منسلک ایک سائبر یونٹ پر عائد کرتے ہوئے انہیں ملک کے اہم نظام اور تنصیبات کے لیے خطرہ قرار دیا تھا۔

فرانسیسی حکومت نے اعلان کیا تھا کہ وہ ایرانی سفیر کو طلب کرکے ان حملوں پر احتجاج ریکارڈ کرائے گی۔ اس کے علاوہ مبینہ سائبر حملوں میں ملوث ایرانی اداروں اور افراد کے خلاف مزید پابندیاں عائد کرنے کی تجویز بھی پیش کی جائے گی۔

عباس عراقچی نے فرانسیسی الزامات پر ردعمل دیتے ہوئے کہا کہ فرانسیسی حکومت اپنے مسائل حل کرنے کے بجائے دوسروں کو مورد الزام ٹھہرا رہی ہے تاہم فرانس کی جانب سے عائد کردہ سائبر حملوں کے الزامات اور ایران کا مؤقف اپنی اپنی حکومتوں کے بیانات کی صورت میں سامنے آیا ہے۔

میانوالی میں چشمہ نیوکلیئر پاور پلانٹ 5 کی ڈوم پلیسمنٹ کی تقریب منعقد ہوئی، جس میں وزیراعظم شہباز شریف اور چیف آف ڈیفنس فورسز و فیلڈ مارشل سید عاصم منیر نے شرکت کی۔

اس موقع پر وزیراعظم نے تقریب سے خطاب کرتے ہوئے کہا کہ چشمہ 5 پاکستان کے لیے ایک اہم سنگ میل ہے، جس کا حصول چین کے تعاون سے ممکن ہوا، پاکستان چین کے تعاون پر شکر گزار ہے، چشمہ نیوکلیئر پاور پلانٹ 5 ملک کے لیے صاف اور قابل اعتماد بجلی فراہم کرے گا جب کہ یہ منصوبہ سستی بجلی کی فراہمی کی بھی ضمانت ہے۔

چشمہ 5 چین کے تعاون سے تعمیر پاکستان کا ساتواں جوہری بجلی

شہباز شریف نے کہا کہ توانائی کا تحفظ پاکستان کے عوام اور معیشت دونوں کے لیے انتہائی اہمیت رکھتا ہے، یہ منصوبہ عوام کو صاف اور قابل خرید توانائی فراہم کرے گا، پاکستان ان ممالک میں شامل ہے جو موسمیاتی تبدیلیوں سے متاثر ہورہے ہیں، ایسے میں صاف توانائی کی فراہمی کی اہمیت مزید بڑھ جاتی ہے۔

ان کا مزید کہنا تھا کہ چشمہ 5 چین کے تعاون سے تعمیر ہونے والا پاکستان کا ساتواں جوہری بجلی گھر ہوگا، منصوبے کا سنگ بنیاد جولائی 2023 میں رکھا گیا تھا جب کہ اس کا مقررہ وقت سے پہلے اہم سنگ میل عبور کرنا باعث فخر ہے۔

پاکستان اور چین کے تعلقات کا ذکر کرتے ہوئے وزیراعظم نے کہا کہ دونوں ممالک کی دوستی ہر آزمائش پر پوری اتری ہے، پاکستان چینی صدر شی جن پنگ اور حکومت چین کا شکر گزار ہے، چینی انجینئرز نے پاکستانی ماہرین کے شانہ بشانہ کام کرکے اس منصوبے کی تکمیل میں اہم کردار ادا کیا۔

پاک چین دوستی سمندر سے گہری اور فولاد سے زیادہ مضبوط

شہباز شریف نے کہا کہ پاکستان اور چین کی دوستی ہمالیہ سے بلند، سمندر سے گہری اور فولاد سے زیادہ مضبوط ہے، سی پیک کا دوسرا مرحلہ دونوں ممالک کے درمیان شراکت داری کو مزید مضبوط کرے گا۔

وزیراعظم نے مزید کہا کہ چشمہ 5 منصوبہ معاشی مواقع پیدا کرنے اور روشن مستقبل کی تعمیر میں اہم کردار ادا کرے گا، میانوالی کے عوام نے اس عظیم منصوبے کی فراخدلی سے میزبانی کی، چشمہ پاور پلانٹ پاکستان اور میانوالی کے عوام کا فخر ہے۔

پاکستان کا مستقبل امن، سلامتی اور استحکام سے وابستہ

ان کا کہنا تھا کہ پاکستان کا مستقبل امن، سلامتی اور استحکام سے وابستہ ہے، مسلح افواج نے ملک میں امن و استحکام کے قیام کے لیے کلیدی کردار ادا کیا ہے، فیلڈ مارشل سید عاصم منیر کی قیادت میں مسلح افواج نے معرکہ حق میں جرأت اور پیشہ ورانہ مہارت کا مظاہرہ کیا۔

شہباز شریف نے معاشی بحالی اور سماجی و اقتصادی ترقی کے لیے مسلح افواج کی معاونت کو بھی سراہتے ہوئے کہا کہ قائداعظم کے خوابوں کے مطابق معاشی طور پر مضبوط اور خودمختار پاکستان تعمیر کرنا ہے۔

وزیراعظم نے مزید کہا کہ پاکستان کو خوشحال، پرامن اور مضبوط ملک بنانا ہم سب کا مشترکہ عزم ہے اور ملک اپنی محنت، لگن اور انتھک کوششوں سے اپنا مستقبل خود تعمیر کرے گا۔

نیب راولپنڈی میں پاکستان پوسٹ آفس ڈیپارٹمنٹ کے افسران، اہلکاروں اور دیگر افراد کے خلاف مبینہ غیر قانونی بھرتیوں کے الزامات پر انکوائری جاری ہے۔ اس سلسلے میں اسعد محمود سے بھی ان کے دور وزارت 2022 سے 2023 کے دوران ہونے والی مبینہ بھرتیوں سے متعلق پوچھ گچھ کی جارہی ہے۔

اسعد محمود کو 10 نومبر 2026 کو نیب کے سامنے ذاتی حیثیت میں پیش ہونے کی ہدایت کی گئی تھی تاہم وہ آج پیش نہیں ہوئے اور اپنے وکیل کے ذریعے تحریری جواب جمع کرادیا۔

نیب حکام نے سابق وفاقی وزیر مواصلات کا تحریری جواب غیر تسلی بخش قرار دیتے ہوئے انہیں دوبارہ طلب کرنے کا فیصلہ کیا۔

نیب کی جانب سے جاری دوسرے کال اپ نوٹس میں اسعد محمود کو جمعہ 13 نومبر 2026 کو صبح 11 بجے ذاتی حیثیت میں پیش ہونے کی ہدایت کی گئی ہے۔

نوٹس میں واضح کیا گیا ہے کہ مقررہ تاریخ پر پیش نہ ہونے کی صورت میں قومی احتساب آرڈیننس 1999 کی دفعہ 31 کے تحت قانونی کارروائی عمل میں لائی جاسکتی ہے۔

کینیڈا کی وزارت خارجہ کے مطابق ان پابندیوں کا مقصد ایران کی حساس ٹیکنالوجی اور مالی وسائل تک رسائی محدود کرنا ہے۔ پابندیوں کے تحت کینیڈا میں مقیم افراد اور بیرون ملک رہنے والے کینیڈین شہری ان اداروں کے ساتھ مخصوص مالیاتی اور جائیداد سے متعلق لین دین نہیں کرسکیں گے۔

پابندیوں کی فہرست میں شامل اداروں میں نیوکلیئر فیول پروڈکشن اینڈ پروکیورمنٹ کمپنی، نیوکلیئر ری ایکٹرز فیول کمپنی، کالا نفت، نفت ایران انٹرٹریڈ کمپنی، نیشنل ایرانی آئل کمپنی اور نیشنل ایرانی ٹینکر کمپنی شامل ہیں۔

قطر کے نشریاتی ادارے ’الجزیرہ‘ کے مطابق اس کے علاوہ بینک ملت، بینک ملی ایران، بینک آف انڈسٹری اینڈ مائن، ایکسپورٹ ڈیولپمنٹ بینک آف ایران اور ایران انشورنس کمپنی بھی پابندیوں کی زد میں آئیں گے۔

کینیڈا نے جولائی 2010 میں ایران کے جوہری پروگرام سے متعلق بین الاقوامی ذمہ داریاں پوری نہ کرنے پر پابندیاں عائد کی تھیں۔

تاہم جولائی 2015 میں ایران اور عالمی طاقتوں کے درمیان مشترکہ جامع لائحہ عمل (جے سی پی او اے) کے نام سے جوہری معاہدہ طے پایا، جس کے تحت ایران نے اپنے جوہری پروگرام پر پابندیاں قبول کیں اور بین الاقوامی معائنے کی اجازت دی، اس کے بدلے ایران کو پابندیوں میں ریلیف دیا گیا۔

جنوری 2016 میں بین الاقوامی جوہری توانائی ایجنسی (آئی اے ای اے) نے رپورٹ کیا کہ ایران نے معائنے کی اجازت دینے اور جوہری پروگرام محدود کرنے کے اقدامات کیے ہیں۔ اس پیش رفت کے بعد کینیڈا نے فروری 2016 میں اپنی یک طرفہ پابندیوں میں نرمی کرتے ہوئے ان 11 اداروں کو بھی پابندیوں کی فہرست سے نکال دیا تھا۔

کینیڈا کی وزارت خارجہ کے مطابق جون 2025 میں آئی اے ای اے کے بورڈ آف گورنرز نے ایک قرارداد منظور کی، جس میں کہا گیا کہ ایران اپنی جوہری سرگرمیوں سے متعلق حفاظتی ذمہ داریاں پوری نہیں کر رہا۔ قرارداد میں ایران سے ایجنسی کے ساتھ مکمل تعاون کا مطالبہ بھی کیا گیا تھا۔

اگلے ماہ اسرائیل اور امریکا کے ایران پر حملوں کے بعد تہران نے آئی اے ای اے کے ساتھ تعاون معطل کردیا، جس سے ایجنسی کی جوہری سرگرمیوں کی نگرانی اور تصدیق کا عمل مزید متاثر ہوا۔

اگست 2025 میں فرانس، جرمنی اور برطانیہ نے ایران کی جانب سے جوہری ذمہ داریوں کی عدم تعمیل پر اسنیپ بیک طریقہ کار فعال کردیا۔

اس اقدام کے نتیجے میں ستمبر 2025 میں اقوام متحدہ کی وہ جوہری پابندیاں دوبارہ نافذ ہوگئیں جو 2015 کے معاہدے کے تحت ختم کی گئی تھیں۔ کینیڈا نے بھی اسی ماہ ان پابندیوں پر عمل درآمد کے لیے اپنے متعلقہ ضوابط میں ترمیم کی تھی۔

جون 2026 میں جی سیون ممالک نے اپنے مؤقف کا اعادہ کرتے ہوئے کہا تھا کہ ایران کو جوہری ہتھیار تیار کرنے یا حاصل کرنے کی اجازت نہیں دی جانی چاہیے۔ کینیڈا نے بھی واضح کیا ہے کہ جوہری ہتھیاروں کے عدم پھیلاؤ کے معاہدے کے تحت ایران پر جوہری ہتھیار تیار یا حاصل نہ کرنے کی ذمہ داری عائد ہوتی ہے۔

دوسری جانب ایران مسلسل یہ مؤقف اختیار کرتا رہا ہے کہ اس کا جوہری پروگرام پُرامن مقاصد کے لیے ہے۔

جمادی الثانی کا چاند دیکھنے کے لیے چیئرمین رویت ہلال کمیٹی مولانا عبدالخبیر آزاد کی زیر صدارت اجلاس اسلام آباد میں منعقد ہوا، جس میں محکمہ موسمیات، سپارکو اور وزارت سائنس اینڈ ٹیکنالوجی کے نمائندے بھی شریک ہوئے۔ اس کے علاوہ ملک بھر میں بھی زونل کمیٹیوں کے اجلاس بھی ہوئے۔

مولانا عبدالخبیر آزاد نے بتایا کہ ملک کے اکثر علاقوں میں مطلع ابر آلود رہا اور ملک کے کسی بھی حصے سے جمادی الثانی کے چاند نظر آنے کی شہادت موصول نہیں ہوئی۔ انہوں نے کہا کہ چاند نظر نہ آنے کی صورت میں یکم جمادی الثانی 12 نومبر بروز جمعرات کو ہوگی۔

دوسری جانب مرکزی رویت ہلال کمیٹی کے چیئرمین کے فیصلے کی روشنی میں وزارت مذہبی امور نے چاند نظر نہ آنے کا باضابطہ نوٹیفکیشن بھی جاری کردیا۔

فرانس کے دارالحکومت پیرس میں ’جی سیون‘ ممالک کے وزرائے خارجہ کے اجلاس کے موقع پر گفتگو میں مارکو روبیو کا کہنا تھا کہ ’مجھے بتایا گیا ہے کہ ایران کے خلاف معاشی پابندیاں بہتر کام کر رہی ہے۔‘

انہوں نے کہا کہ ’کوئی غیر معمولی صورت حال پیدا نہ ہوئی تو ایران کے خلاف کسی بڑی فوجی کارروائی کی ضرورت نہیں پڑے گی۔‘

امریکی وزیر خارجہ نے مذاکرات کے حوالے سے کہا کہ امریکا اس تنازع کے سفارت کاری کے ذریعے حل کے لیے تیار ہے تاہم ایران کے موجودہ مطالبات مکمل طور پر غیر حقیقت پسندانہ ہیں۔

ان کہنا تھا کہ ہمیں توقع ہے کہ ایران اپنے مطالبات میں تبدیلی لائے گا اور اگر ایسا ہوتا ہے تو مذاکرات بحال ہوسکتے ہیں۔

آبنائے ہرمز کی صورت حال

عالمی تجارت کی اہم ترین آبی گزرگاہ آبنائے ہرمز کی صورت حال پر مارکو روبیو نے دعویٰ کیا کہ آبنائے ہرمز سے تیل کی ترسیل جنگ سے پہلے کی سطح کے قریب پہنچ رہی ہے۔

انہوں نے کہ تیل کی 100 فیصد ترسیل اس لیے بحال نہیں ہوسکی ہے کیوں کہ امریکی ناکہ بندی کی وجہ سے ایران اپنا تیل برآمد نہیں کر پارہا ہے۔

امریکی وزیر خارجہ نے ایران پر عائد معاشی پابندیوں اور بحری ناکہ بندی کے اثرات کا ذکر کرتے ہوئے یہ بھی دعویٰ کیا کہ ان اقدامات سے ایرانی معیشت کو شدید نقصان پہنچ رہا ہے۔

مارکو روبیو کا کہنا تھا کہ ’ایران معاہدہ کرنا چاہتا ہے لیکن مسئلہ یہ ہے کہ اس کی شرائط مضحکہ خیز اور غیر حقیقت پسندانہ ہیں لیکن آخرکار اسے اپنی ضروریات بھی پوری کرنی ہیں۔‘

ایرانی قیادت پر تنقید کرتے ہوئے ان کا کہنا تھا کہ ’ایرانی عوام بہتر زندگی کے مستحق ہیں لیکن ان کی قیادت انہیں تیسری دنیا کی سطح پر لے جانا چاہتی ہے۔

دوسری جانب امریکی وزیر دفاع پیٹ ہیگستھ نے اپنے خلاف مواخذے کی کوشش کو سیاسی ڈراما قرار دیا ہے۔

پیٹ ہیگسیتھ نے ایران پر حملوں کا دفاع کرتے ہوئے کہا کہ منشیات کی اسمگلنگ روکنے اور ایران کی فوجی صلاحیتوں کو کمزور کرنے کے لیے کیے گئے اقدامات درست تھے۔ انہوں نے اس حوالے سے ماضی میں مختلف صدور کے ادوار میں بھی فوجی آپریشنز کا بھی حوالہ دیا۔

گزشتہ ماہ اسرائیل میں انتخابات کے بعد بینجمن نیتن یاہو تاحال نگران وزیرِاعظم کے طور پر کام کر رہے ہیں اور متعدد مرتبہ ایران پر حملے دوبارہ شروع کرنے کا مطالبہ کر چکے ہیں۔

برطانوی اخبار فنانشل ٹائمز نے ایک رپورٹ میں یہ بھی انکشاف کیا ہے کہ اسرائیلی وزیراعظم بینجمن نیتن یاہو ایران پر دوبارہ حملوں کی کوششوں میں مصروف ہیں اور روزانہ کی بنیاد پر فون کرکے صدر ٹرمپ کو قائل کرنے کی کوشش کررہے ہیں۔

فنانشل ٹائمز کے مطابق ترکیہ کے صدر رجب طیب اردوغان، سعودی ولی عہد شہزادہ محمد بن سلمان، متحدہ عرب امارات کے صدر شیخ محمد بن زاید النہیان اور قطر کے امیر شیخ تمیم بن حمد آل ثانی نے حالیہ دنوں میں ٹرمپ سے رابطے کیے ہیں۔

ان رہنماؤں نے امریکی صدر پر زور دیا کہ وہ سفارتی کوششوں کو مزید وقت دیں اور ایران کے ساتھ مذاکرات کا راستہ اختیار کریں۔

رپورٹ کے مطابق علاقائی رہنماؤں کو خدشہ ہے کہ جنگ دوبارہ شروع ہونے سے ایران کی جانب سے وسیع تر جوابی کارروائی ہو سکتی ہے، جس سے پورے مشرقِ وسطیٰ میں عدم استحکام مزید بڑھ جائے گا۔

دوسری جانب ایران خبردار کر چکا ہے کہ اس پر دوبارہ حملے کیے گئے تو وہ جواب دینے کے لیے تیار ہے اور مشرقِ وسطیٰ سے باہر موجود امریکی مفادات کو بھی نشانہ بنا سکتا ہے۔

پینٹاگون میں گفتگو کرتے ہوئے پیٹ ہیگستھ نے کینٹکی سے ری پبلکن رکن کانگریس تھامس میسی کو تنقید کا نشانہ بنایا اور الزام عائد کیا کہ وہ کانگریس میں اپنے آخری دنوں کو صدر ٹرمپ اور امریکی فوج کو نشانہ بنانے کے لیے استعمال کر رہے ہیں۔

امریکی وزیرِ دفاع نے مواخذے کی کوشش کو ’’سیاسی تماشا، ذاتی منشور اور انا اور ناراضی سے متاثر اقدام‘‘ قرار دیتے ہوئے کہا کہ یہ محض ایک ڈراما اور سیاسی اسٹنٹ ہے۔

انہوں نے کہا کہ امریکی تاریخ کے تقریباً 250 برسوں میں کسی وزیر دفاع یا وزیر جنگ کا قانونی فوجی کارروائیاں انجام دینے پر کبھی مواخذہ نہیں ہوا۔ ان کے مطابق ماضی میں مختلف صدور کے ادوار میں بھی فوجی آپریشن کیے گئے، جن میں لبنان میں رونالڈ ریگن، کوسوو میں بل کلنٹن، عراق اور شام میں باراک اوباما اور اسی خطے میں جو بائیڈن کے دور کے آپریشنز شامل ہیں۔

پیٹ ہیگستھ نے صدر ٹرمپ کے پہلے دورِ صدارت میں ان کے خلاف دو مرتبہ مواخذے کی کارروائیوں کا حوالہ دیتے ہوئے کہا کہ اب مخالفین تیسری مرتبہ یہی کوشش کر رہے ہیں، تاہم اس بار صدر کے کابینہ رکن کو نشانہ بنایا جا رہا ہے۔

انہوں نے کہا کہ صدر ٹرمپ نے محکمہ دفاع کو وہ کچھ فراہم کیا ہے جو اسے ایک نسل سے حاصل نہیں تھا اور وہ ہر فوجی آپریشن کی حمایت کرتے ہیں۔ ہیگستھ کے مطابق وہ ان کارروائیوں پر فخر کرتے ہیں اور ضرورت پڑنے پر انہیں دوبارہ انجام دیں گے۔

امریکی وزیر دفاع نے کہا کہ مواخذے کی قراردادیں فوجی اہلکاروں کو یہ پیغام دیتی ہیں کہ ان کی خدمات جرم تھیں، حالانکہ وہ ہیرو ہیں۔ ان کا کہنا تھا کہ اگر کوئی فوجی اہلکاروں کو نشانہ بنانے آئے گا تو اسے پہلے ان کا سامنا کرنا ہوگا۔

ہیگستھ نے کہا کہ پالیسی سے اختلاف کا مناسب طریقہ قانون سازی، بحث اور اگلے صدارتی انتخابات ہیں۔ ان کے بقول مواخذے کی کوشش ایران، منشیات کے کارٹلز اور دیگر مخالفین کو یہ پیغام دیتی ہے کہ امریکا قانونی فوجی کارروائیاں کامیابی سے انجام دینے والے اپنے فوجیوں اور سویلین قیادت کو سزا دے گا۔

انہوں نے ٹرمپ انتظامیہ کی فوجی کارروائیوں کا دفاع کرتے ہوئے کہا کہ امریکی جانوں کو ترجیح دینے پر معذرت نہیں کی جائے گی۔ ان کے مطابق منشیات کی اسمگلنگ روکنے اور ایران کی فوجی صلاحیتوں کو کمزور کرنے کے لیے کیے گئے اقدامات درست تھے۔

ایران کو خبردار کرتے ہوئے پیٹ ہیگستھ نے کہا کہ امریکی افواج کسی بھی مزید کشیدگی کا جواب دینے کے لیے تیار ہیں اور سینٹ کام کی مکمل فوجی قوت اور صلاحیت موجود ہے۔

دوسری جانب امریکی نائب صدر جے ڈی وینس کی جانب سے ایران جنگ کو وسط مدتی انتخابات میں ری پبلکنز کی شکست کی اہم وجہ قرار دینے کے بیان پر ہیگستھ نے کہا کہ وہ نائب صدر کا بہت احترام کرتے ہیں اور سیاسی الزام تراشی میں دل چسپی نہیں رکھتے۔

تاہم انہوں نے ایران کو جوہری ہتھیار حاصل کرنے سے روکنے کے لیے فوجی کارروائی کو درست فیصلہ قرار دیا۔

قطر کے نشریاتی ادارے الجزیرہ کے مطابق جی سی سی نے نئے فوجی مرکز کے لیے کویت کے انتخاب کو رکن ممالک کے مشترکہ دفاعی تعاون مضبوط بنانے کی کوششوں کا حصہ قرار دیا ہے۔

جی سی سی سیکریٹری جنرل کے دفتر سے جاری بیان کے مطابق یہ فیصلہ منگل کو بحرین کے دارالحکومت منامہ میں منعقدہ رکن ممالک کی مشترکہ دفاعی کونسل کے 23ویں اجلاس میں کیا گیا تھا۔

بیان میں کہا گیا ہے کہ مشترکہ فوجی کمانڈ ہیڈکوارٹر کے قیام سے رکن ممالک کی سلامتی اور خودمختاری کا تحفظ اور مشترکہ خطرات کا مقابلہ کرنے کی صلاحیت مضبوط ہوگی جب کہ ہیڈکوارٹر میں فوجی دستے بھی تعینات کیے جائیں گے۔

جاسم محمد البدیوی نے اپنے بیان میں ایران کے مبینہ حملوں کا حوالہ دیتے ہوئے خلیجی ممالک کے درمیان فوجی تعاون اور ہم آہنگی کی بھی تعریف کی۔ ان کے مطابق یہ اقدامات خطے کی بدلتی صورت حال سے نمٹنے کے لیے خلیجی یکجہتی اور انضمام کی بہترین مثال ہیں۔

الجزیرہ کے مطابق مشرقِ وسطیٰ کے امور پر نظر رکھنے والے ایک سینئر محقق نے جی سی سی کے مشترکہ فوجی کمانڈ کے لیے کویت کا انتخاب کو انتہائی اہم قرار دیا ہے۔

الجزیرہ سے گفتگو کرتے ہوئے مہند سلوم نے کہا کہ کویت کو ایران اور عراق دونوں کی جانب سے حملوں کا سامنا کرنا پڑا، تاہم متعدد حملوں کے باوجود کویت نے محتاط اور معتدل مؤقف اختیار کیا۔ ان کے بقول ’کویت میں مشترکہ فوجی کمانڈ کا ہیڈکوارٹر کا قیام جی سی سی ممالک کو یقین دہانی ہے کہ وہ ہر ممکن صورتِ حال سے نمٹنے کے لیے تیار ہیں۔‘

واضح رہے کہ متحدہ عرب امارات، بحرین اور کویت سمیت کئی خلیجی ممالک میں امریکا کے فوجی اڈے موجود ہیں۔ 28 فروری کو امریکا اور اسرائیل کی جانب سے ایران پر حملوں کے بعد ایران نے خلیجی ممالک میں موجود امریکی اڈوں کو میزائلوں اور ڈرونز کے ذریعے نشانہ بنایا تھا۔

دوسری جانب یمن میں بھی صورتِ حال مسلسل کشیدہ ہوتی چلی جا رہی ہے جہاں ایران کے قریب سمجھے جانے والے حوثی گروہ، جسے انصار اللہ بھی کہا جاتا ہے اور سعودی عرب کی حمایت یافتہ حکومتی فورسز کے درمیان لڑائی میں تیزی آئی ہے۔

جہلم میں طلبہ میں لیپ ٹاپس اور ہونہار اسکالرشپس تقسیم کرنے کی تقریب سے خطاب کرتے ہوئے وزیراعلیٰ پنجاب مریم نواز نے کہا کہ پنجاب آگے بڑھ رہا ہے اور یہاں کام ہورہا ہے، ضمنی انتخابات میں کالعدم جماعتوں نے پورا زور لگایا لیکن کامیابی مسلم لیگ (ن) کی ہوئی۔ خدمت کا کوئی بیانیہ مقابلہ نہیں کرسکتا۔

مریم نواز نے کہا کہ جیسے جیسے الیکشن قریب آرہے ہیں، لوگوں کو تکلیف ہونا شروع ہوگئی ہے، جن لوگوں نے ایک پائی کا بھی کام نہیں کیا، ان کے لیے کرپشن کے الزامات لگانا آسان ہے لیکن کام کرنے والوں کو تنقید کا نشانہ بھی بننا پڑتا ہے۔

وزیراعلیٰ پنجاب نے مزید کہا کہ جن لوگوں کو اعتراض ہے، وہ حکومت میں وزیر بن کر کیوں بیٹھے ہیں؟ استعفا دے کر گھر کیوں نہیں جاتے؟ ایسے لوگ اپنی باری کے لیے جگہ پکی کررہے ہوتے ہیں، پنجاب میں اب طاقت اور پیسے کا غرور نہیں چلے گا۔

وزرا کو کرپشن پر سخت وارننگ

انہوں نے اپنی کابینہ کے وزرا کو کرپشن پر سخت وارننگ دیتے ہوئے کہا کہ عوام کی امانت میں کسی کو خیانت کرنے کی اجازت نہیں دی جائے گی، وہ روزانہ کسی نہ کسی کرپشن کا پتا چلاتی ہیں اور اس کے پیچھے جاتی ہیں، اگر ان کے کسی وزیر کے خلاف کرپشن کی شکایت لے کر کوئی آیا تو وہ قسم کھاتی ہیں کہ اسے بخشا نہیں جائے گا۔

مریم نواز نے کہا کہ وہ اپنی عوام کو جوابدہ ہیں، انہوں نے کبھی یہ دعویٰ نہیں کیا کہ پنجاب میں کرپشن مکمل طور پر ختم ہوگئی ہے تاہم پنجاب واحد صوبہ ہے جہاں کی وزیراعلیٰ خود کرپشن پکڑتی ہے، کیا خیبرپختونخوا میں کرپشن نہیں ہورہی، کیا وہ کسی کو نظر نہیں آتی؟ کیا سندھ اور بلوچستان میں کرپشن نہیں ہورہی؟

جنہوں نے کچھ نہیں کیا انہیں دوسروں پر کرپشن کا الزام لگانا آسان ہے

انہوں نے کہا کہ 3 سال میں انہوں نے ٹریلین روپے کے ترقیاتی منصوبے شروع کیے، کوئی ایک منصوبہ دکھا دے جس میں کرپشن ہوئی ہو۔خیبرپختونخوا میں کئی سال تک کرپشن کا بازار گرم رہا جب کہ جن لوگوں نے کچھ نہیں کیا ان کے لیے دوسروں پر کرپشن کا الزام لگانا آسان ہے۔

وزیراعلیٰ پنجاب کا مزید کہنا تھا کہ مقبولیت کے لیے کبھی بیانیے کی ضرورت نہیں ہوتی، عوام جانتے ہیں کہ ترقی صرف مسلم لیگ (ن) کے دور میں ہوتی ہے۔ یہی وجہ ہے کہ عوام ہر بار مسلم لیگ (ن) کو اقتدار کے لیے منتخب کرتے ہیں۔

مریم نواز نے ایک واقعے کا ذکر کرتے ہوئے کہا کہ ایک بچی پر دکاندار نے تشدد کیا تھا، جس پر بچی کو تھانے بلا کر کہا گیا کہ وہ اس مالدار دکاندار کے منہ پر تھپڑ مارے۔ انہوں نے کہا کہ پہلی بار پنجاب کی وزیراعلیٰ مظلوم اور غریب کے ساتھ کھڑی ہے۔

انہوں نے جہلم میں طلبہ کو لیپ ٹاپس اور ہونہار اسکالرشپس کی تقسیم کے موقع پر کہا کہ وہ طلبہ کو ان کی محنت کا صلہ دینے آئی ہیں، یہ ان کا حق ہے اور انہیں ملنا چاہیے، والدین کی قربانیوں کے باعث طلبہ اس مقام تک پہنچے ہیں، ہونہار طلبہ اور ان کے والدین کو مبارکباد پیش کرتی ہوں۔

وزیراعلیٰ پنجاب نے بتایا کہ جہلم کے 109 طلبہ میں ہونہار اسکالرشپس تقسیم کی گئی ہیں جب کہ حکومت طلبہ کو ایک لاکھ اسکوٹیز دینے جارہی ہے، اسکوٹیز دسمبر میں تقسیم کی جائیں گی اور انہیں حاصل کرنے والے طلبہ کو باقاعدہ تربیت بھی فراہم کی جائے گی۔

پنجاب واحد صوبہ ہے جو نوجوانوں کی مدد کررہا ہے

مریم نواز کا کہنا تھا کہ پنجاب واحد صوبہ ہے جو نوجوانوں کی مدد کررہا ہے، پنجاب کے سرکاری اسکول نجی اسکولوں سے بہتر ہیں، لاہور میں چلنے والی گرین بسیں دیگر شہروں میں بھی چلائی جارہی ہیں اور پنجاب کے تمام شہروں میں یکساں ترقی ہورہی ہے۔ انہوں نے مزید کہا کہ اس سے پہلے ایسا ساہیوال، جہلم اور اٹک میں نہیں دیکھا گیا، پنجاب جیسے کام کی مثال پورے پاکستان میں دکھائیں، طلبہ کو گرین بسوں میں مفت سفر کی سہولت فراہم کی گئی ہے۔

انہوں نے مزید کہا کہ صرف بڑے شہروں میں ترقیاتی کام کرنے کی روایت توڑ دی ہے، اب دوسرے شہروں سے لوگ جہلم میں دل کا علاج کرانے آرہے ہیں، آج پنجاب میں ترقیاتی منصوبوں پر کام ہورہا ہے اور عوام کو سہولتیں فراہم کی جارہی ہیں۔

پاکستان کی جانب سے سعود شکیل 93 رنز بنا کر نمایاں رہے، وہ اپنی سنچری مکمل کرنے سے قبل آؤٹ ہوگئے۔ طیب عارف نے 57، عرفات منہاس نے 52، محمد طٰہٰ نے 51 اور کپتان بابر اعظم نے 50 رنز کی اننگز کھیلی۔ اس طرح قومی ٹیم کے پانچ کھلاڑیوں نے نصف سنچریاں اسکور کیں۔

سری لنکا کی جانب سے اسیتھا فرنینڈو اور دلشان مدوشنکا نے 3، 3 وکٹیں حاصل کیں، جبکہ ملان رتھنائیکے نے ایک کھلاڑی کو آؤٹ کیا۔

جواب میں سری لنکا نے دوسرے روز کھیل کے اختتام تک 3 وکٹوں کے نقصان پر 114 رنز بنالیے۔ پاکستان کی جانب سے ٹیسٹ کرکٹ میں ڈیبیو کرنے والے ثاقب خان نے 2 وکٹیں حاصل کیں۔

خراب روشنی کے باعث دوسرے روز کا کھیل مقررہ وقت سے پہلے ختم کرنا پڑا اور مجموعی طور پر 66.2 اوورز کا کھیل ممکن ہوسکا۔

راولپنڈی کرکٹ اسٹیڈیم میں پیر کو سیریز کے پہلے ٹیسٹ میچ میں سری لنکا نے ٹاس جیت کر پہلے بولنگ کا فیصلہ کیا تھا۔ مہمان ٹیم کا یہ فیصلہ ابتدائی روز اس کے لیے فائدہ مند ثابت نہ ہوسکا اور پاکستان نے ابتدائی دو وکٹیں گنوانے کے بعد اننگز کو سنبھال لیا۔

پاکستان کی جانب سے اننگز کا آغاز اذان اویس اور طیب عارف نے کیا۔ دونوں نے پہلی وکٹ کے لیے 86 رنز کی شراکت قائم کی۔ اذان اویس 30 رنز بنا کر ملان رتھنائیکے کی گیند پر کیچ آؤٹ ہوئے۔

ٹیسٹ کرکٹ میں ڈیبیو کرنے والے طیب عارف نے جارحانہ بیٹنگ کرتے ہوئے 51 گیندوں پر 57 رنز بنائے۔ ان کی اننگز میں 9 چوکے اور ایک چھکا شامل تھا۔

پاکستان کو 90 رنز کے مجموعی اسکور پر دوسری وکٹ کا نقصان اٹھانا پڑا، جس کے بعد کپتان بابر اعظم نے ڈیبیو کرنے والے محمد طٰہٰ کے ساتھ اننگز کو سنبھالا اور تیسری وکٹ کے لیے اہم شراکت قائم کی۔

بابر اعظم نے 58 گیندوں پر 50 رنز بنائے۔ ان کی اننگز میں 7 چوکے شامل تھے۔ وہ 159 کے مجموعی اسکور پر ملان رتھنائیکے کی گیند پر کیچ آؤٹ ہوئے۔

بابر اعظم کے آؤٹ ہونے کے بعد سعود شکیل نے محمد طٰہٰ کا ساتھ دیا اور چوتھی وکٹ کے لیے 68 رنز کی شراکت قائم کی۔ محمد طٰہٰ نے اپنے ڈیبیو ٹیسٹ میں محتاط بیٹنگ کرتے ہوئے نصف سنچری مکمل کی۔ وہ 6 چوکوں کی مدد سے 51 رنز بنا کر 227 کے مجموعی اسکور پر آؤٹ ہوئے۔

سعود شکیل اور سلمان علی آغا نے اسکور آگے بڑھایا، تاہم 253 رنز کے مجموعی اسکور پر سلمان علی آغا 16 رنز بنا کر پویلین لوٹ گئے۔

پاکستان نے اس ٹیسٹ میچ کے لیے ٹیم میں بڑی تبدیلیاں کرتے ہوئے چار کھلاڑیوں کو پہلی مرتبہ ٹیسٹ کرکٹ میں ملک کی نمائندگی کا موقع دیا۔ ان کھلاڑیوں میں طیب عارف، محمد طٰہٰ، عرفات منہاس اور ثاقب خان شامل ہیں۔

قومی ٹیم کی پلیئنگ الیون میں اذان اویس، طیب عارف، محمد طٰہٰ، بابر اعظم، سعود شکیل، سلمان علی آغا، غازی غوری، عرفات منہاس، رضوان اللہ، محمد عباس اور ثاقب خان شامل ہیں۔

سری لنکا نے پہلے ٹیسٹ کے لیے اپنی پلیئنگ الیون میں تجربہ کار اسپنر پربتھ جے سوریا کو شامل نہیں کیا اور چار فاسٹ بولرز کے ساتھ میدان میں اترنے کا فیصلہ کیا تھا۔

ٹاس کے بعد گفتگو کرتے ہوئے سری لنکن کپتان کوشل مینڈس نے کہا تھا کہ پچ پر گھاس موجود ہے، جس سے ابتدائی سیشن میں فاسٹ بولرز کو مدد مل سکتی ہے۔ ان کے مطابق پچ فاسٹ بولنگ کے لیے سازگار دکھائی دے رہی ہے اور پہلا سیشن اہم ہوگا۔

سری لنکا کی پلیئنگ الیون میں کوشل مینڈس، لہرو اودارا، پاسندو سوریا بندارا، دنیش چندی مل، کمیندو مینڈس، دھننجایا ڈی سلوا، سونل دینوشا، ملان رتھنائیکے، لہرو کمارا، اسیتھا فرنینڈو اور دلشان مدوشنکا شامل ہیں۔

آئی سی سی ورلڈ ٹیسٹ چیمپئن شپ کے موجودہ پوائنٹس ٹیبل پر پاکستان نویں اور آخری نمبر پر ہے، جبکہ سری لنکا ساتویں پوزیشن پر موجود ہے۔ دونوں ٹیموں کے لیے یہ سیریز چیمپئن شپ میں اپنی پوزیشن بہتر بنانے کا موقع ہے۔

پاکستان اور سری لنکا کے درمیان سیریز کا دوسرا اور آخری ٹیسٹ 17 نومبر سے لاہور میں کھیلا جائے گا۔

کراچی میں 10 لاکھ سیلاب متاثرین کو گھروں کی فراہمی کی تقریب سے خطاب کرتے ہوئے چیئرمین پیپلز پارٹی بلاول بھٹو زرداری نے کہا کہ یہ دنیا میں گھروں کی تعمیر کا سب سے بڑا منصوبہ ہے، اس سے قبل زیادہ گھر بنانے کا ریکارڈ نیپال کی حکومت کے پاس تھا۔

سیلاب متاثرین کے لیے 20 لاکھ گھر بنانے کا اعلان

بلاول بھٹو نے کہا کہ پیپلز پارٹی نے سیلاب متاثرین کے لیے 10 لاکھ گھر تعمیر کیے ہیں، منصوبے کی تکمیل تک مجموعی طور پر 20 لاکھ گھر تعمیر کیے جائیں گے، گھروں کی تعمیر میں وفاقی حکومت اور عالمی شراکت داروں کی مدد حاصل ہے، اس منصوبے کے تحت 10 لاکھ خاندانوں کو زمین کا مالک بنایا گیا ہے، جو 1970 کے بعد زمین کی منتقلی کا سب سے بڑا منصوبہ ہے۔

ان کا کہنا تھا کہ پیپلز پارٹی نے کسانوں کو مالکانہ حقوق دیے جب کہ گھروں کی ملکیت سے غریب خاندانوں کو معاشی تحفظ ملے گا۔ یہ منصوبہ گھر، کپڑا اور مکان کے وعدے کی تکمیل ہے۔

چیئرمین پیپلز پارٹی نے مزید کہا کہ موجودہ دور میں پوری دنیا معاشی بحران سے گزر رہی ہے، عوام معاشی مشکلات کا شکار ہیں اور ریلیف کے لیے حکومتوں کی طرف دیکھ رہے ہیں، سندھ حکومت کا ہر منصوبہ عوام کے لیے ہے اور اس کا مقصد لوگوں کے کندھوں سے معاشی بوجھ کم کرنا ہے۔

سیاسی جماعتیں عوام کو معاشی بحران سے نکالیں

بلاول بھٹو نے کہا کہ عوام یہ نہیں دیکھ رہے کہ حکومتیں انہیں آپس میں کیسے لڑوائیں گی بلکہ وہ یہ دیکھ رہے ہیں کہ معاشی بحران میں حکومتیں ان کا ساتھ کیسے دیں گی، سیاسی جماعتوں کی ذمہ داری نفرت پھیلانا نہیں بلکہ عوام کو معاشی بحران سے نکالنا ہے۔

ان کا کہنا تھا کہ کچھ سیاستدان سمجھتے ہیں کہ کاروباری طبقے کو مزید امیر بنانے سے ملک ترقی کرے گا لیکن حکومتوں اور سیاسی جماعتوں کی ذمہ داری عوام کو مشکلات سے نکالنا ہے، جب تک تمام پاکستانی ایک جان نہیں ہوں گے، عوام کو اس مشکل صورت حال سے نہیں بچا سکیں گے۔

چیئرمین پیپلز پارٹی نے وزیراعظم شہباز شریف کا شکریہ ادا کرتے ہوئے کہا کہ انہوں نے اس منصوبے میں سندھ حکومت کا ساتھ دیا، شہباز شریف سے پہلے جو وزیراعظم تھے، ان کے دور میں سیلاب آیا تو ایک روپیہ بھی نہیں دیا گیا۔

انہوں نے مزید کہا کہ پاکستان کو درپیش مشکلات کا مقابلہ کرنے کے لیے ملکی سیاست کو ری سیٹ کرنا پڑے گا، وزیراعظم شہباز شریف سے کہتا ہوں کہ اپنے اتحادیوں کا اعتماد بحال کریں اور اپوزیشن کے ساتھ نئے جھگڑے شروع کرنے کے بجائے اعتماد کی فضا قائم کریں، ہم معاشی بحران سے نمٹنے میں حکومت کا ساتھ دیں گے۔

مخالفین کو گھروں کی تعمیر میں کرپشن ڈھونڈنے کا چیلنج

بلاول بھٹو نے مخالفین کو گھروں کی تعمیر کے منصوبے میں کرپشن تلاش کرنے کا چیلنج دیتے ہوئے کہا کہ وہ دعوے سے کہتے ہیں کہ اس منصوبے میں کرپشن نہیں ہوئی، وزیراعلیٰ سندھ عالمی سطح پر کرپشن کی نگرانی کرنے والے اداروں سے منصوبے کے آڈٹ کی درخواست کریں۔

چیئرمین پیپلز پارٹی نے کہا کہ سندھ حکومت پر کرپشن کے الزامات لگائے جاتے ہیں اور مخالفین سندھ حکومت کو کرپٹ کہتے ہیں جب کہ لوگ کہتے ہیں کہ سندھ میں تعلیم کا بحران ہے، کوئی ہم سے پوچھے تو سہی کہ یہ مسائل کیوں ہیں۔

انہوں نے دیگر صوبوں کو مخاطب کرتے ہوئے کہا کہ ملک کے دوسرے صوبے ہم سے عوام کی خدمت کرنا سیکھیں، سندھ حکومت کا ہر منصوبہ عوام کے لیے ہے اور عوام کو معاشی مشکلات سے نکالنے میں مدد فراہم کرے گا۔

ماڈل ٹاؤن کچہری میں غیرملکی خاتون ڈیانا کے اغوا اور زیادتی کے مقدمے کی سماعت ہوئی، سماعت کے دوران ایک شہری نے عدالت میں اپنا بیان ریکارڈ کرایا۔

شہری نے عدالت کو بتایا کہ اس نے مقدمے میں ملزمان کی شناخت غلطی سے کی تھی۔ شہری نے ملزمان کی ضمانت اور بریت پر بھی کوئی اعتراض نہ ہونے کا بیان دیا۔

عدالت نے شہری کے بیان کے بعد ملزم احمد تنویر اور دیگر ملزمان کو تھانہ اچھرہ میں درج اغوا کے مقدمے سے بری الذمہ قرار دے دیا۔

قبل ازیں، سوشل میڈیا پر سامنے آنے والے ویڈیو بیان میں آذری خاتون ڈیانا کا کہنا تھا کہ احمد تنویر نے ان کے ساتھ کوئی زیادتی نہیں کی اور نہ ہی ان کے موبائل فون چھینے۔ انہوں نے اس سے قبل زیادتی کے حوالے سے دیے گئے بیانات کو دباؤ کا نتیجہ قرار دیا ہے۔

ویڈیو میں خاتون نے متعلقہ حکام سے مقدمہ ختم کرنے کی اپیل بھی کی تھی۔

بیان کے آغاز میں ڈیانا نے 9 اکتوبر کی تاریخ کا حوالہ دیا ، جس سے بظاہر یہ ویڈیو کچھ روز قبل ریکارڈ کیے جانے کا تاثر ملتا ہے۔

دوسری جانب پولیس نے 27 اکتوبر تک عبوری ضمانت منظور ہونے کے باوجود احمد تنویر کو عدالت کے باہر سے دوبارہ گرفتار کیا گیا تھا۔

ایک اور ویڈیو میں بھی ڈیانا کا کہنا تھا کہ احمد تنویر نے میرے ساتھ کوئی زبردستی نہیں کی۔ خاتون نے الزام عائد کیا تھا کہ وہ خود عدالت میں پیش ہونا چاہتی تھی لیکن مجھے بتایا گیا کہ آپ کی جان کو خطرہ ہے اور مجھے زبردستی پاکستان سے بھیج دیا گیا۔

ڈیانا نے ویڈیو میں احمد تنویر کو بے قصور قرار دینے کے علاوہ مزید کہا تھا کہ وہ دیگر دو ملزمان محسن اور علی زین کو بھی معاف کرتی ہیں۔ انہوں نے مزید کہا کہ وہ اس معاملے کو آگے نہیں بڑھانا چاہتیں لہٰذا ذاتی مسائل میں ان کا نام استعمال نہ کیا جائے۔

واضح رہے کہ ڈیانا نامی غیر ملکی خاتون ستمبر کے آخری ہفتے میں اچانک سامنے آئی تھی جس نے لاہور میں مبینہ اجتماعی زیادتی کا شکار ہونے کا دعویٰ کیا تھا۔

لاہور کے تھانہ ڈیفنس سی میں درج مقدمے کے مطابق ڈیانا کا الزام تھا کہ دو خواتین (مسکان اور نمرہ) اور تین مردوں (محسن، احمد تنویر اور علی زین) نے مبینہ طور پر انہیں نشہ آور چیز پلانے کے بعد اجتماعی زیادتی کا نشانہ بنایا اور ان کے سامان اور موبائل فونز بھی چھین لیے تھے۔ خاتون نے الزام عائد کیا تھا کہ ملزمان بعد ازاں انہیں ایئرپورٹ کے قریب چھوڑ کر فرار ہو گئے۔

پولیس نے مقدمے کے اندراج کے بعد جائے وقوعہ سے فرانزک شواہد اور ڈی این اے کے نمونے جمع کیے اور مبینہ طور پر واقعے میں استعمال ہونے والی گاڑی بھی برآمد کی تھی، جب کہ مرکزی ملزم محسن سمیت متعدد افراد کو بھی حراست میں لیا گیا تھا۔

عدالتی کارروائی کے دوران ملزمہ مسکان نے اپنا بیان ریکارڈ کراتے ہوئے کہا کہ اس کی ڈیانا سے ایک پارٹی میں ملاقات ہوئی تھی جہاں اس نے میرے اور نمرہ کے ساتھ موبائل نمبر شیئر کیا اور ہمیں مختلف پارٹیوں میں مدعو کرنے کا بھی کہا۔

کیس کے مرکزی ملزم محسن نے اپنے بیان میں مؤقف اختیار کیا کہ ڈیانا سے اس کی پہلی ملاقات 25 ستمبر کو ایک نجی سوسائٹی میں ہوئی تھی، جب کہ دوسرے ملزم علی نے مؤقف اختیار کیا کہ ڈیفنس کے فلیٹ میں پارٹی کے دوران ڈیانا آپے سے باہر ہوئی، غازی روڈ پہنچنے پر اس نے گاڑی میں ہاتھا پائی شروع کی اور پھر زبردستی گاڑی سے اتر گئی۔

بعد ازاں پولیس تفتیش کے دوران خاتون کی ٹریول ہسٹری اور بعض بیانات میں تضاد بھی سامنے آیا تھا جب کہ ڈیانا کی پاکستان میں موجودگی اور پاکستانی نوجوان سے مبینہ نکاح سے متعلق خبریں اور عروسی لباس میں ویڈیو بھی سامنے آئی تھی، جس نے معاملے کو مشکوک بنا دیا تھا۔

گذشتہ ماہ کے آغاز میں لاہور پولیس کی نگرانی میں ڈیانا کو واپس آذربائیجان روانہ کر دیا گیا تھا۔

عالمی مارکیٹ میں سونے کی قیمتوں میں کمی کے اثرات مقامی مارکیٹ پر بھی مرتب ہوئے ہیں، جس کے نتیجے میں پیر کے روز پاکستان میں سونے کی قیمتوں میں کمی ریکارڈ کی گئی ہے۔

آل پاکستان جیمز اینڈ جیولرز ایسوسی ایشن کے مطابق آج کاروباری ہفتے کے دوسرے روز ملک بھر میں 24 قیراط فی تولہ سونے کی قیمت میں 1 ہزار 500 روپے کی بڑی کمی ہوئی ہے، جس کے بعد فی تولہ سونے کی نئی قیمت 4 لاکھ 30 ہزار 836 روپے ہوگئی ہے۔

اسی طرح مقامی سطح پر 10 گرام سونے کی قیمت میں 1 ہزار 286 روپے کی کمی ہوئی ہے، جس کے بعد 10 گرام سونے کی نئی قیمت 3 لاکھ 69 ہزار 372 روپے ہوگئی ہے۔

دوسری جانب بین الاقوامی بلین مارکیٹ میں بھی سونے کی قیمت میں 15 ڈالر کی کمی ہوئی ہے، جس کے بعد فی اونس سونا 4 ہزار 083 ڈالر کی سطح پر پہنچ گیا ہے۔

اس کے علاوہ ملک بھر میں فی تولہ چاندی کی قیمت بغیر کسی تبدیلی کے 5723 روپے پر برقرار رہی۔

یاد رہے کہ گزشتہ روز 09 نومبر کو سونے کی فی تولہ قیمت 3200 روپے اضافے کے بعد 4 لاکھ 32 ہزار 336 روپے ہو گئی تھی جب کہ 10 گرام سونے کی قیمت بھی 2744 روپے اضافے سے 3 لاکھ 70 ہزار 658 روپے ہوگئی تھی۔

واضح رہے کہ عالمی اور ملکی سطح پر مختلف عوامل سونے کی قیمتوں پر اثرانداز ہوتے ہیں، ان عوامل میں امریکی ڈالر کی قدر میں تبدیلی، عالمی معاشی صورت حال میں غیر یقینی، جغرافیائی کشیدگی اور سرمایہ کاروں کا رجحان شامل ہے۔

عالمی سطح پر معاشی اور سیاسی غیر یقینی کے دوران سرمایہ کار سونے کو محفوظ سرمایہ کاری سمجھتے ہیں۔ ایسے حالات میں سونے کی طلب بڑھنے سے اس کی عالمی قیمت میں اضافہ ہو سکتا ہے جب کہ غیر یقینی صورتحال میں کمی قیمتوں پر دباؤ ڈال سکتی ہے۔

پاکستان میں عالمی مارکیٹ میں سونے کی قیمت کے علاوہ روپے اور امریکی ڈالر کا شرح تبادلہ بھی مقامی صرافہ مارکیٹ میں سونے کی قیمت کے تعین میں اہم کردار ادا کرتا ہے۔

ان متبادل طریقوں میں کچھ ایسے براؤزرز شامل ہیں جو خودکار طور پر اشتہارات روک دیتے ہیں، جبکہ بعض ایپلی کیشنز یوٹیوب ویڈیوز دیکھنے کے لیے الگ پلیٹ فارم فراہم کرتی ہیں۔ یہ سہولت اینڈرائیڈ فونز، آئی فونز، کمپیوٹرز اور مخصوص اسمارٹ ٹی وی پر بھی دستیاب ہے۔

بریو براؤزر

یوٹیوب پر اشتہارات سے بچنے کا ایک آسان طریقہ بریو براؤزر (Brave Browser) استعمال کرنا ہے۔ اس میں پہلے سے موجود اشتہارات روکنے کا نظام، جسے بریو شیلڈزکہا جاتا ہے، ویب سائٹس پر دکھائے جانے والے اشتہارات اور صارفین کی سرگرمیوں کا تعاقب کرنے والے ٹریکرز کو بلاک کرتا ہے۔

اسے اینڈرائیڈ فون، آئی فون، آئی پیڈ، ونڈوز کمپیوٹر، میک اور لینکس پر استعمال کیا جا سکتا ہے۔ صارفین کو صرف اپنی ڈوائس پر بریو براؤزر انسٹال کرکے اس میں یوٹیوب کی ویب سائٹ کھولنی ہوگی۔ اس کے بعد ویڈیوز دیکھنے کے دوران بہت سے اشتہارات خودکار طور پر بلاک ہو جاتے ہیں اور کسی اضافی ایکسٹینشن کی ضرورت نہیں پڑتی۔

اینڈرائیڈ صارفین یوٹیوب کو موبائل کی ہوم اسکرین پر بھی شامل کر سکتے ہیں۔ اس کے لیے ’بریو‘ میں یوٹیوب کھولیں، تین نقطوں والے مینو پر جائیں اور ’ایڈ ٹو ہوم اسکرین‘ کا انتخاب کریں۔ اس طرح یوٹیوب کا آئیکون موبائل کی اسکرین پر آ جائے گا اور اسے ایک الگ ایپ کی طرح کھولا جا سکے گا۔

فائر فاکس اور یو بلاک اوریجن

اشتہارات سے بچنے کا دوسرا طریقہ فائر فاکس براؤزر کے ساتھ یو بلاک اوریجن ایکسٹینشن استعمال کرنا ہے۔ یہ ایک مفت ٹول ہے جو ویب سائٹس پر اشتہارات، پاپ اپس اور غیر ضروری ٹریکرز کو روکنے میں مدد دیتا ہے۔

اس سہولت سے اینڈرائیڈ فونز اور ٹیبلٹس کے علاوہ ونڈوز، میک اور لینکس کمپیوٹرز پر بھی فائدہ اٹھایا جا سکتا ہے۔ اس کے لیے فائر فاکس انسٹال کرنے کے بعد اس کے ایکسٹینشنز سیکشن میں جائیں، یو بلاک اوریجن تلاش کرکے انسٹال کریں اور پھر یوٹیوب کھول لیں۔

اس کے بعد براؤزر میں ویڈیوز دیکھتے ہوئے بہت سے اشتہارات نظر نہیں آئیں گے۔ تاہم آئی فون اور آئی پیڈ پر فائر فاکس میں اس ایکسٹینشن کو استعمال کرنے کی سہولت دستیاب نہیں، اس لیے ایپل کے موبائل آلات پر بریو ایک بہتر متبادل ہے۔

نیو پائپ

اینڈرائیڈ صارفین کے لیے نیو پائپ ایک اور مفت متبادل ہے۔ یہ ایک اوپن سورس ایپلی کیشن ہے، یعنی اس کا بنیادی سافٹ ویئر عوامی طور پر دستیاب ہوتا ہے اور اسے ڈویلپرز جانچ اور بہتر بنا سکتے ہیں۔

یہ ایپ براؤزر کے بجائے ایک الگ ویڈیو پلیئر کے طور پر کام کرتی ہے، جس کے ذریعے صارفین یوٹیوب کی ویڈیوز تلاش کرنے، چینلز دیکھنے اور ویڈیوز چلانے کے ساتھ دیگر سہولتوں سے بھی فائدہ اٹھا سکتے ہیں۔

نیو پائپ کی خاص بات یہ ہے کہ اس کے ذریعے ویڈیوز بغیر اشتہارات کے دیکھی جا سکتی ہیں۔ اس میں بیک گراؤنڈ پلے بیک، یعنی دوسری ایپس استعمال کرتے ہوئے بھی ویڈیو کی آواز سننے، چھوٹی ونڈو میں ویڈیو چلانے اور ویڈیوز ڈاؤن لوڈ کرنے کی سہولت بھی موجود ہے۔

اسے استعمال کرنے کے لیے گوگل اکاؤنٹ میں سائن اِن کرنا بھی ضروری نہیں۔ صارفین اسے اس کی سرکاری ویب سائٹ یا ایف ڈرائیڈ سے حاصل کر سکتے ہیں۔ البتہ اس کا انٹرفیس اور استعمال کا طریقہ اصل یوٹیوب ایپ سے مختلف ہے۔

فری ٹیوب

کمپیوٹر پر یوٹیوب ویڈیوز بغیر اشتہارات دیکھنے کے لیے فری ٹیوب ایک مفت متبادل ہے۔ یہ ونڈوز، میک اور لینکس آپریٹنگ سسٹمز پر کام کرتا ہے اور صارفین کو ویڈیوز تلاش کرنے، چینلز دیکھنے اور اپنی پسند کی ویڈیوز کی فہرست بنانے کی سہولت دیتا ہے۔

اس ایپلی کیشن کے ذریعے ویڈیوز بغیر اشتہارات کے دیکھی جا سکتی ہیں، جبکہ صارفین کی سبسکرپشنز اور دیکھنے کی تاریخ بھی کمپیوٹر میں محفوظ رہتی ہے۔ اس کے لیے گوگل اکاؤنٹ سے سائن اِن کرنے کی ضرورت نہیں ہوتی۔

فری ٹیوب میں اسپانسر بلاک نامی سہولت بھی شامل ہے، جو ویڈیوز کے اندر موجود اسپانسرز کے تشہیری حصوں کو خودکار طور پر ہٹا سکتی ہے۔ یہ عام یوٹیوب اشتہارات سے مختلف ہوتے ہیں کیونکہ انہیں ویڈیو بنانے والے خود ویڈیو میں شامل کرتے ہیں۔

اس ایپ کو استعمال کرنے کے لیے اس کی سرکاری ویب سائٹ سے ڈاؤن لوڈ کرکے کمپیوٹر میں انسٹال کرنا ہوگا۔

ٹائزن ٹیوب

اسمارٹ ٹی وی پر یوٹیوب کے اشتہارات سے بچنے کے لیے ٹائزن ٹیوب ایک متبادل ایپلی کیشن ہے۔ یہ خاص طور پر سام سنگ کے ان اسمارٹ ٹی وی کے لیے بنائی گئی ہے جو ٹائزن آپریٹنگ سسٹم پر چلتے ہیں۔

اس ایپ کی خاص بات یہ ہے کہ اس کا انٹرفیس کافی حد تک اصل یوٹیوب ٹی وی ایپ جیسا ہے، تاہم اس میں اشتہارات کے بغیر ویڈیوز دیکھنے کی سہولت موجود ہے۔ اس کے علاوہ ویڈیو کی رفتار کم یا زیادہ کرنے، انٹرفیس میں تبدیلی اور اسپانسرز کے تشہیری حصے خودکار طور پر چھوڑنے جیسے فیچرز بھی شامل ہیں۔

ٹائزن ٹیوب کے ذریعے ویڈیو کی رفتار چار گنا تک بڑھائی جا سکتی ہے۔ اس کے علاوہ یہ ڈی ایرو کی سہولت بھی فراہم کرتی ہے، جو ویڈیوز کے عنوانات اور تھمب نیلز کے متبادل دکھا سکتی ہے۔

سام سنگ ٹی وی پر اسے انسٹال کرنے کے لیے ٹائزن بریو کا طریقہ استعمال کیا جاتا ہے۔ اس کے علاوہ اس کا کوبالٹ ورژن بھی موجود ہے، جو بعض اینڈرائیڈ ٹی وی، گوگل ٹی وی اور فائر ٹی وی ڈیوائسز پر کام کرتا ہے۔

اسمارٹ ٹیوب

اینڈرائیڈ ٹی وی اور گوگل ٹی وی استعمال کرنے والوں کے لیے اسمارٹ ٹیوب بھی ایک مفت اور اوپن سورس ایپلی کیشن ہے۔ یہ اسمارٹ ٹی وی اور انٹرنیٹ سے منسلک دیگر موزوں ڈیوائسز پر یوٹیوب ویڈیوز دیکھنے کے لیے تیار کی گئی ہے۔

اس کے ذریعے اشتہارات کے بغیر ویڈیوز دیکھی جا سکتی ہیں، جبکہ اسپانسر بلاک، ہائی ریزولوشن ویڈیو اور ویڈیو چلانے کی رفتار تبدیل کرنے جیسے فیچرز بھی دستیاب ہیں۔

تاہم اسمارٹ ٹیوب کا انٹرفیس اصل یوٹیوب ایپ سے مختلف ہے اور اسے ٹی وی کے ریموٹ کنٹرول کے ذریعے استعمال کرنے کے لیے بنایا گیا ہے۔ اسے انسٹال کرنے کے لیے ایپ کی اے پی کے فائل حاصل کرکے موزوں اینڈرائیڈ ٹی وی ڈیوائس میں انسٹال کرنا ہوتی ہے۔

یہ ایپ سام سنگ کے ٹائزن یا ایل جی کے ویب او ایس پر براہ راست کام نہیں کرتی۔ اس لیے ان ٹی وی کے صارفین کو دوسرے متبادل استعمال کرنا ہوں گے۔ اس کے ڈویلپرز بھی صارفین کو مشورہ دیتے ہیں کہ ایپ صرف سرکاری ویب سائٹ یا گٹ ہب سے ڈاؤن لوڈ کریں تاکہ غیر محفوظ یا تبدیل شدہ فائلوں سے بچا جا سکے۔

کون سا طریقہ کس ڈیوائس کے لیے بہتر ہے؟

مختلف ڈیوائسز کے لیے ان طریقوں کی دستیابی بھی مختلف ہے۔ اینڈرائیڈ فونز پر بریو، فائر فاکس کے ساتھ یو بلاک اوریجن اور نیو پائپ استعمال کیے جا سکتے ہیں، جبکہ آئی فون اور آئی پیڈ پر بریو ایک آسان متبادل ہے۔

ونڈوز، میک اور لینکس کمپیوٹرز پر بریو، فائر فاکس اور فری ٹیوب استعمال کیے جا سکتے ہیں۔ سام سنگ کے ٹائزن اسمارٹ ٹی وی کے لیے ٹائزن ٹیوب جبکہ اینڈرائیڈ ٹی وی اور گوگل ٹی وی کے لیے اسمارٹ ٹیوب اور ٹائزن ٹیوب کا کوبالٹ ورژن دستیاب ہے۔

مجموعی طور پر زیادہ تر موبائل اور کمپیوٹر صارفین کے لیے بریو براؤزر آسان انتخاب ہے، کیونکہ اس میں اشتہارات روکنے کا نظام پہلے سے موجود ہے۔ اینڈرائیڈ صارفین الگ ایپلی کیشن چاہتے ہیں تو نیو پائپ جبکہ کمپیوٹر استعمال کرنے والے فری ٹیوب کا انتخاب کر سکتے ہیں۔

یہ بات بھی اہم ہے کہ ان متبادل طریقوں سے یوٹیوب پریمیم کی سبسکرپشن حاصل نہیں ہوتی اور نہ ہی سرکاری یوٹیوب ایپ سے اشتہارات ختم ہوتے ہیں۔ یہ سہولت صرف متعلقہ براؤزرز اور ایپلی کیشنز کے ذریعے ویڈیوز دیکھنے تک محدود ہے۔

یوٹیوب وقتاً فوقتاً اپنے اشتہارات دکھانے کے نظام میں تبدیلی کرتا رہتا ہے، اس لیے ممکن ہے کہ مستقبل میں ان طریقوں کی افادیت بھی متاثر ہو۔ صارفین کو چاہیے کہ اپنے براؤزرز اور ایپلی کیشنز اپ ڈیٹ رکھیں اور غیر سرکاری ذرائع سے سافٹ ویئر ڈاؤن لوڈ کرنے سے گریز کریں۔

عدالت نے سیشن کورٹ کا بریت کا سابقہ فیصلہ منسوخ کرتے ہوئے ملزم کی فوری گرفتاری کا حکم بھی دیا ہے۔

جسٹس محمد عامر نواز اور جسٹس عبدالقیوم پر مشتمل دو رکنی بینچ نے اپیل پر فیصلہ سناتے ہوئے عبدالمجید اچکزئی کو مقتول ٹریفک سارجنٹ عطا اللہ کے ورثا کو دیت ادا کرنے کا بھی حکم دیا۔

عدالت نے ان کے ناقابلِ ضمانت وارنٹ گرفتاری جاری کرنے اور پولیس کو فوری گرفتار کرکے جیل منتقل کرنے کی ہدایت کی۔

مقدمے کے مطابق جون 2017 میں کوئٹہ کے جی پی او چوک، زرغون روڈ پر تیز رفتار لینڈ کروزر کی ٹکر سے ڈیوٹی پر مامور ٹریفک سارجنٹ عطا اللہ جاں بحق ہوگئے تھے۔

واقعے کے بعد پولیس نے اس وقت کے رکن صوبائی اسمبلی اور پشتونخوا ملی عوامی پارٹی کے رہنما عبدالمجید اچکزئی کو گرفتار کرکے مقدمہ درج کیا تھا۔

بعد ازاں ستمبر 2020 میں کوئٹہ کی ماڈل کورٹ نے عدم ثبوت کی بنیاد پر انہیں بری کردیا تھا۔ اس فیصلے پر عوامی اور صحافتی حلقوں کی جانب سے ردعمل سامنے آیا تھا۔ تاہم بلوچستان ہائیکورٹ نے اپیل پر سماعت کے بعد بریت کا فیصلہ کالعدم قرار دیتے ہوئے انہیں 10 سال قید، دیت کی ادائیگی اور فوری گرفتاری کا حکم دے دیا۔

وائٹ ہاؤس کے جاری کردہ بیان کے مطابق نیتالی بیکر کی نامزدگی منظوری کے لیے امریکی سینیٹ کو بھجوا دی گئی ہے، جہاں سینیٹ کی خارجہ تعلقات کمیٹی اس کا جائزہ لے گی۔

کمیٹی کی منظوری کے بعد نیتالی بیکر کی بطور سفیر نامزدگی سینیٹ کے مکمل ایوان میں ووٹنگ کے لیے پیش کی جائے گی، جہاں سے سے توثیق ملنے کی صورت میں نیتالی بیکر باضابطہ طور پر پاکستان میں امریکی سفیر کا عہدہ سنبھال سکیں گی۔

امریکی سفارت خانے کی ویب سائٹ پر دستیاب معلومات کے مطابق نیتالی بیکر اگست 2024 میں اسلام آباد میں ڈپٹی چیف آف مشن (نائب سربراہِ سفارت خانہ) کی حیثیت سے تعینات ہوئی تھیں۔

پاکستان آنے سے قبل وہ اگست 2021 سے جولائی 2024 تک قطر کے دارالحکومت دوحہ میں امریکی سفارت خانے کی ڈپٹی چیف آف مشن کے طور پر خدمات انجام دے چکی ہیں۔

نیتالی بیکر لیبیا میں امریکی مشن کی ڈپٹی چیف آف مشن اور قائم مقام ناظم الامور بھی رہ چکی ہیں۔ وہ دبئی میں امریکی قونصل خانے کے ’ایران ریجنل پریزنس آفس‘ کی ڈپٹی ڈائریکٹر اور کویت میں امریکی سفارت خانے میں اقتصادی امور کی مشیر کی حیثیت سے بھی خدمات انجام دے چکی ہیں۔

نیتالی بیکر امریکی محکمہ خارجہ کے بیورو آف نیئر ایسٹرن افیئرز میں دفتر برائے شمالی افریقہ کی ڈائریکٹر بھی رہ چکی ہیں۔

امریکی سفارت خانے کی ویب سائٹ کے مطابق نیتالی بیکر نے 2009 سے 2011 تک لیبیا میں سیاسی اور اقتصادی امور کی مشیر کی حیثیت سے بھی خدمات انجام دیں۔ یہ وہ وقت تھا جب لیبیا اور امریکا کے درمیان تقریباً 30 سال کے تعطل کے بعد دوطرفہ تعلقات معمول پر لانے کا عمل جاری تھا۔

ویب سائٹ کے مطابق بیکر فروری 2011 میں لیبیا میں ہی موجود تھیں، جب وہاں انقلاب کے باعث امریکی سفارت خانے کو اپنا عملہ وہاں سے نکالنا پڑا اور سفارت خانہ خالی کرنا پڑا۔

نیتالی بیکر نے جنوری 2025 میں اسلام آباد میں امریکی سفارت خانے کی قائم مقام ناظم الامور کی ذمہ داریاں سنبھالی تھیں۔ انہوں نے اس وقت کے امریکی سفیر ڈونلڈ آرمین بلوم کے عہدہ چھوڑنے کے بعد یہ ذمہ داری سنبھالی تھی۔

اداکارہ کی ایک ویڈیو سوشل میڈیا پر وائرل ہورہی ہے جس میں وہ اپنے وزن پر ہونے والے تبصروں پر ناراضی کا اظہار کرتی دکھائی دے رہی ہیں۔

وینا ملک نے ویڈیو میں کہا کہ انہیں پہلے موٹے لوگوں کو درپیش مشکلات کا اندازہ نہیں تھا، لیکن جب خود ان کا وزن بڑھا تو انہیں احساس ہوا کہ اس حوالے سے لوگوں کے تبصرے کس قدر تکلیف دہ ہوسکتے ہیں۔

ان کا کہنا تھا کہ گھر میں ہوں تو لوگ طعنہ دیتے ہیں کہ سارا کھانا وہ بہت زیادہ کھاتی ہیں، باہر نکلیں تو ہر کوئی یہی کہتا ہے کہ وہ موٹی ہو گئی ہیں اور جب وہ کسی شوٹنگ پر جاتی ہیں تو پوری ٹیم کی طرف سے یہی جملے سننے کو ملتے ہیں کہ ان کا چہرہ موٹا آ رہا ہے۔

ان کے بقول، زندگی میں انسان کبھی دبلا ہوتا ہے تو کبھی اس کا وزن بڑھ جاتا ہے، لیکن لوگوں نے اس معاملے کو ان کے لیے مشکل بنا دیا ہے۔

اداکارہ نے شکوہ کیا کہ جب تک وہ خود موٹی نہیں ہوئی تھیں، انہیں اندازہ نہیں تھا کہ زائد وزن والے افراد کو معاشرے میں کس قدر ذہنی تکلیف کا سامنا کرنا پڑتا ہے۔

انہوں نے ناقدین کو کرارا جواب دیتے ہوئے کہا کہ وہ موٹی ضرور ہو گئی ہیں لیکن اندھی نہیں ہیں، انہیں خود بھی اپنے وزن کا پورا احساس ہے اور اب وہ جلد ہی اپنا وزن کم کرنے کا ارادہ رکھتی ہیں۔

وینا ملک نے اعتراف کیا کہ زندگی کے کچھ معاملات اور زیادہ کھانے کی وجہ سے ان کے وزن میں اضافہ ہوا ہے، تاہم انہوں نے عوام اور مداحوں سے گزارش کی ہے کہ اب انہیں مزید موٹا بولنا بند کیا جائے کیونکہ وہ جلد ہی محنت کرکے دوبارہ پتلی ہو جائیں گی۔

منگل کو اسلام آباد ہائیکورٹ میں 190 ملین پاؤنڈ کیس میں عمران خان اور بشریٰ بی بی کی سزاؤں کے خلاف دائر اپیلوں پر چیف جسٹس اسلام آباد ہائیکورٹ سردار محمد سرفراز ڈوگر اور جسٹس محمد آصف پر مشتمل دو رکنی بینچ نے سماعت کی، اس دوران مل ملزمان کے وکلاء اور نیب کے پراسیکیوٹر کے درمیان سخت عدالتی مکالمہ دیکھنے میں آیا۔

سماعت کے آغاز پر وکیل لطیف کھوسہ نے عدالت کو بتایا کہ عدالت کی جانب سے ملاقات کا حکم دیے جانے کے باوجود آج تک ان کی موکلین سے ملاقات نہیں کرائی گئی، جس پر چیف جسٹس نے واضح کیا کہ عدالت نے ان کی نہیں بلکہ بیرسٹر سلمان صفدر کی ملاقات کا حکم دیا تھا۔

عدالت نے ایڈووکیٹ جنرل اسلام آباد سے استفسار کیا کہ کیا لطیف کھوسہ کی بانی پی ٹی آئی اور بشریٰ بی بی سے ایک دو دن میں ملاقات کروائی جا سکتی ہے؟ چیف جسٹس نے ریمارکس دیے کہ وہ چاہتے ہیں کہ اگر راستے میں کوئی رکاوٹ ہے تو اسے دور کیا جائے۔

دورانِ سماعت بشریٰ بی بی اور بانی پی ٹی آئی کی صحت کے امور بھی زیرِ بحث آئے۔

بیرسٹر سلمان صفدر نے عدالت کو بتایا کہ بانی پی ٹی آئی کی آنکھوں کی صورت حال میں کچھ بہتری آئی ہے لیکن ان کا بلڈ پریشر کنٹرول میں نہیں ہے اور انہوں نے برین ہیمرج کے خطرے سے متعلق بھی آگاہ کیا ہے۔

انہوں نے مزید بتایا کہ بشریٰ بی بی کی آنکھوں کی حالت انتہائی خراب ہے، ان کی آنکھ میں انجری بھی نظر آرہی ہے، اور انہیں چھ ماہ پہلے سرجری کے لیے لے جایا گیا تھا جبکہ 15 نومبر کو ان کا دوبارہ آپریشن متوقع ہے، اس لیے جیل میں ان کا علاج ممکن نہیں۔ اس لیے انہیں علاج کے لیے ضمانت دی جائے اور میڈیکل بورڈ تشکیل دیا جائے۔

ایڈووکیٹ جنرل اسلام آباد نے عدالت میں رپورٹ پیش کرتے ہوئے ان الزامات کی تردید کی اور کہا کہ حکومت اپنی ذمہ داریوں سے غافل نہیں ہے اور بشریٰ بی بی کو جیل میں ہر ممکن طبی سہولیات فراہم کی جا رہی ہیں۔

ایڈووکیٹ جنرل نے عدالت کو بتایا کہ آٹھ نومبر کو بھی میڈیکل بورڈ نے ان کا چیک اپ کیا ہے اور اس حوالے سے سپریم کورٹ کے احکامات پر مکمل عملدرآمد کیا جا رہا ہے۔

کیس کے حوالے سے بات کرتے ہوئے بیرسٹر سلمان صفدر نے عدالت کو بتایا کہ ان کی بانی پی ٹی آئی سے 7 ماہ اور بشریٰ بی بی سے 11 ماہ بعد ملاقات ہوئی ہے اور اب انہیں اپیل پر دلائل دینے کی باقاعدہ ہدایت مل چکی ہے۔

انہوں نے استدعا کی کہ کیس کے پیپر بکس اور تیاری کے لیے کچھ وقت دیا جائے، جس پر نیب پراسیکیوٹر نے اعتراض کرتے ہوئے کہا کہ ملزمان کی جانب سے طویل عرصے سے نیب کو بدنام کرنے کا سلسلہ جاری ہے اور اب مزید وقت مانگا جا رہا ہے۔

چیف جسٹس نے ریمارکس دیے کہ اپیل میں ایک سال سے زائد کا عرصہ گزر چکا ہے، تاہم عدالت ملزمان کو تیاری کے لیے مناسب وقت دینے کو تیار ہے۔

عدالت نے فریقین کے دلائل سننے کے بعد ریمارکس دیے کہ اپیلوں پر حتمی دلائل کا آغاز اب ناگزیر ہو چکا ہے۔

عدالت نے سردار لطیف کھوسہ کی بانی پی ٹی آئی اور بشریٰ بی بی سے کم از کم ایک گھنٹے کی جیل ملاقات کرانے کا حکم دیتے ہوئے ایڈووکیٹ جنرل کو ہدایت کی کہ ملاقات کا بندوبست جلد از جلد کیا جائے تاکہ آئندہ ہفتے سے اپیلوں پر باضابطہ دلائل کا آغاز کیا جا سکے، جبکہ کیس کی مزید کارروائی مقررہ لائحہ عمل کے تحت آگے بڑھائی جائے گی۔

ریسکیو ذرائع کے مطابق آگ عمارت کے گراؤنڈ فلور پر لگی، جس کے باعث علاقے میں دھواں پھیل گیا اور قریبی دکانوں میں تشویش پیدا ہوگئی۔ فائر فائٹرز آگ کو عمارت کی بالائی منزلوں اور ملحقہ دکانوں تک پھیلنے سے روکنے کی کوشش کر رہے ہیں۔

حکام کے مطابق متاثرہ حصے کو گھیرے میں لے کر امدادی کارروائیاں جاری ہیں۔ تاحال آگ لگنے کی وجہ اور مالی نقصان کی تفصیلات سامنے نہیں آئیں، جبکہ کسی جانی نقصان کی اطلاع بھی موصول نہیں ہوئی۔

بزمِ حرف و سخن اور انٹرنیشنل اکیڈمی آف لیٹرز کے اشتراک سے منعقدہ اس تقریب میں امریکہ میں متعین پاکستانی سفیر رضوان سعید شیخ، سرکردہ پاکستانی کمیونٹی رہنماؤں، میڈیا نمائندگان، نامور شعراء اور زندگی کے مختلف شعبہ جات سے تعلق رکھنے والے افراد نے بڑی تعداد میں شرکت کی۔

تقریب سے خطاب کرتے ہوئے سفیرِ پاکستان رضوان سعید شیخ نے کہا کہ علامہ اقبال کی بصیرت افروز شاعری اور افکار کے ہماری قومی تاریخ اور شناخت پر انمٹ نقوش ثبت ہیں اور ہماری قومی زندگی کی فکری بنیادیں ان ہی کی بصیرت سے وابستہ ہیں۔

انہوں نے کہا کہ نوآبادیاتی دور میں جب برصغیر کے مسلمان فکری اور ذہنی پابندیوں کا شکار تھے، علامہ اقبال نے اپنے نظم و نثر کے ذریعے ان میں خودی، خود مختاری اور خود ارادیت کا احساس بیدار کیا۔

انہوں نے واضح کیا کہ اقبال کا تصورِ خودی خود شناسی، بامقصد جدوجہد اور روحانی آزادی کے ذریعے اقوام کو اپنی تقدیر بدلنے کا درس دیتا ہے، جبکہ ان کا تصورِ شاہین نوجوانوں کے لیے جرأت اور بلند مقاصد کے حصول کی مشعلِ راہ ہے۔

سفیرِ پاکستان نے اس عزم کا اظہار کیا کہ حکومتِ پاکستان علامہ اقبال کی 150 ویں سالگرہ کی مناسبت سے فکرِ اقبال کو تعلیمی اداروں، قومی مباحث اور قومی ترجیحات کا مؤثر حصہ بنانے کے لیے پرعزم ہے۔

انہوں نے اس بات پر زور دیا کہ اس درخشاں فکری ورثے کو نئی نسل تک منتقل کرنا وقت کی اہم ضرورت ہے۔

رضوان سعید شیخ نے مزید کہا کہ علامہ اقبال نے جس پرامن، خوشحال اور متحد پاکستان کا خواب دیکھا تھا اور جو قائدِ اعظم کی قیادت میں شرمندہ تعبیر ہوا، اس کی تعمیر و ترقی کے لیے جدوجہد جاری رکھنے کی تجدید کی ضرورت ہے۔

تقریب کے دوران دیگر مقررین نے بھی اپنے خیالات کا اظہار کرتے ہوئے کہا کہ علامہ اقبال نے 1930 کے خطبہ الہ آباد کے ذریعے برصغیر کے مسلمانوں کے لیے ایک علیحدہ اور آزاد مملکت کا خاکہ پیش کیا، جس نے بعد ازاں قیامِ پاکستان کی شکل اختیار کی اور مسلم قوم کو اپنے سیاسی و معاشی حقوق کے تحفظ کا راستہ دکھایا۔

مقررین کے مطابق علامہ اقبال کا ادبی ورثہ صرف اسرارِ خودی، رموزِ بے خودی یا بانگِ درا تک محدود نہیں بلکہ فلسفہ، مذہب، روحانیت اور آزادی کے گہرے مباحث پر محیط ہے۔

اس موقع پر ”اقبال کی شاعری اور عصرِ حاضر کے تقاضے“ کے عنوان سے ایک خصوصی پینل ڈسکشن کا بھی اہتمام کیا گیا، جبکہ شکاگو کی صادقین گیلری کی جانب سے کلامِ اقبال پر مبنی تصویری نمائش اور ایک خصوصی ویڈیو پیش کی گئی جسے حاضرین نے حد درجہ سراہا۔

تقریب کے اختتام پر نامور شعراء نے اپنے کلام کے ذریعے علامہ اقبال کو خراجِ تحسین پیش کیا، جبکہ تقریب کی نظامت کے فرائض فرسٹ سیکرٹری افراح طارق نے انجام دیے۔

ڈرگ ریگولیٹری اتھارٹی پاکستان (ڈریپ) نے صارفین پر زور دیا ہے کہ وہ ’محفوظ دوا‘ ایپ استعمال کریں اور دوا کی پیکنگ پر موجود بارکوڈ اسکین کرکے اس کی رجسٹریشن اور قیمت کی تصدیق کریں۔

یہ ایپ ٹو ڈی بارکوڈ ٹیکنالوجی پر کام کرتی ہے۔ صارفین اپنے اسمارٹ فون کے ذریعے دوا کے پیکٹ پر چھپا بارکوڈ اسکین کریں تو انہیں متعلقہ دوا کی رجسٹرڈ معلومات اور قیمت دکھائی دیتی ہے۔ اس طرح خریدار معلوم کر سکتے ہیں کہ انہیں فروخت کی جانے والی دوا ڈریپ کے ریکارڈ میں موجود ہے یا نہیں اور اس کی قیمت مقررہ نرخ کے مطابق ہے یا نہیں۔

وزارتِ قومی صحت کے ترجمان ساجد شاہ کے مطابق پاکستان میں تقریباً 800 دوا ساز کمپنیاں اور 90 ہزار سے زائد ادویات ڈریپ کے ساتھ رجسٹرڈ ہیں۔

ملک بھر میں ادویات کی ترسیل اور تقسیم کی نگرانی کے لیے مرکزی ٹریک اینڈ ٹریس سسٹم بھی 9 اکتوبر 2026 سے فعال ہو چکا ہے۔ یہ نظام صرف صارفین کو معلومات فراہم کرنے تک محدود نہیں بلکہ متعلقہ حکام کو ادویات کی تیاری سے لے کر سپلائی تک ان کی نقل و حرکت پر نظر رکھنے میں بھی مدد دے گا۔

اس نظام کے ذریعے کسی دوا کے معیار یا حفاظت سے متعلق شکایت سامنے آنے پر متعلقہ حکام کے لیے مخصوص بیچ کی ادویات کی شناخت اور انہیں مارکیٹ سے واپس منگوانا آسان ہو سکتا ہے۔

پاکستان میں ادویات کی پیکنگ پر بارکوڈ لگانے کا منصوبہ پہلی مرتبہ 2015 میں پیش کیا گیا تھا، جبکہ وفاقی کابینہ نے 2017 میں اس کی منظوری دی تھی۔ تاہم انتظامی رکاوٹوں کے باعث اس منصوبے پر کئی سال تک مکمل عمل درآمد نہ ہو سکا۔

بعد ازاں وزیر صحت مصطفیٰ کمال نے اس تاخیر کا نوٹس لیتے ہوئے متعلقہ حکام کو نظام متعارف کرانے کی ہدایت کی۔ ڈریپ نے جعلی، زائدالمیعاد اور غیر قانونی طور پر فروخت ہونے والی ادویات کی روک تھام کے لیے یکم اکتوبر 2026 کو بارکوڈ نظام کے نفاذ کی آخری تاریخ مقرر کی تھی۔

یہ ڈیجیٹل نظام ایسے وقت میں متعارف کرایا گیا ہے جب ڈریپ جعلی، غیر معیاری، ملاوٹ شدہ اور غیر رجسٹرڈ ادویات کے حوالے سے مسلسل ہدایات جاری کر رہا ہے۔

ادارے نے 5 نومبر کو جاری کردہ ایک الرٹ میں صارفین کو ہدایت کی تھی کہ وہ ادویات اور علاج سے متعلق دیگر مصنوعات صرف مجاز اور لائسنس یافتہ دکانوں سے خریدیں اور ان کی اصلیت اور معیار کا بھی جائزہ لیں۔

وزارتِ قومی صحت کے مطابق حکومت کی طرف سے ملک بھر میں شہریوں کو محفوظ، مؤثر اور معیاری ادویات کی فراہمی بہتر بنانے کے لیے اقدامات جاری ہیں۔

کرکٹ اسکاٹ لینڈ کے بورڈ نے پیر کو نئی پالیسی کا اعلان کرتے ہوئے کہا کہ افغانستان ویمنز کرکٹ کی صورتِ حال اور انسانی حقوق کی صورت حال معاملات میں تبدیلی تک افغانستان کے خلاف کسی دو طرفہ یا سہ فریقی سیریز میں حصہ نہیں لے گا۔

بورڈ کے مطابق اسکاٹش ٹیم صرف ان مقابلوں میں افغانستان کے خلاف کھیلے گی جہاں انٹرنیشنل کرکٹ کونسل (آئی سی سی) کی جانب سے ایسا کرنا لازمی ہوگا، ان مقابلوں میں وارم اَپ میچز بھی شامل ہیں۔

بیان میں مزید کہا گیا کہ ان مقابلوں میں اسکاٹش کھلاڑیوں کی شرکت کو موجودہ افغان حکومت یا اس کی پالیسیوں کی حمایت تصور نہ کیا جائے۔

اسکاٹ لینڈ نے 2021 کے ٹی ٹوئنٹی ورلڈ کپ میں افغانستان کے خلاف آخری مرتبہ انٹرنیشنل میچ کھیلا تھا۔ دونوں ٹیمیں 2024 اور 2026 کے ٹی 20 ورلڈ کپ سے قبل وارم اَپ میچز میں بھی ایک دوسرے کے مدمقابل آ چکی ہیں۔

افغانستان کرکٹ بورڈ (اے سی بی) نے جولائی میں اسکاٹ لینڈ کرکٹ بورڈ سے رابطہ کرکے آئرلینڈ کے خلاف سیریز سے قبل تربیتی سہولیات فراہم کرنے کی درخواست کی تھی۔

کرکٹ اسکاٹ لینڈ نے عملی انتظامی پابندیوں اور افغانستان کے ساتھ اپنے روابط سے متعلق مؤقف کا جائزہ لینے کی ضرورت کے باعث یہ درخواست مسترد کر دی تھی۔

ستمبر میں افغانستان کرکٹ بورڈ نے کرکٹ اسکاٹ لینڈ سے افغانستان پریمیئر لیگ (اے پی ایل) کے حوالے سے بھی رابطہ کیا تھا۔ جس پر کرکٹ اسکاٹ لینڈ نے لیگ کو آئی سی سی کی منظوری ملنے کی صورت میں اپنے کھلاڑیوں کے لیے این او سی جاری کرنے پر غور کرنے کا اعلان کیا تھا۔

گزشتہ ہفتے افغانستان پریمیئر لیگ کے ڈرافٹ میں منتخب ہونے والے واحد اسکاٹش کھلاڑی اوپننگ بلے باز جارج منسی تھے، جو مختلف فرنچائز لیگز میں بھی باقاعدگی سے کھیلتے ہیں۔ کرکٹ اسکاٹ لینڈ نے تصدیق کی ہے کہ اگر اے پی ایل کو آئی سی سی کی منظوری مل جاتی ہے تو جارج منسی کو این او سی جاری کیا جائے گا۔

تاہم بورڈ نے یہ واضح کیا کہ کسی بھی اسکاٹش کھلاڑی کی لیگ میں شرکت کو افغان حکومت یا اس کی پالیسیوں کی حمایت قرار نہیں دیا جا سکتا۔

کرکٹ اسکاٹ لینڈ کا فیصلہ کرکٹ آسٹریلیا اور انگلینڈ اینڈ ویلز کرکٹ بورڈ (ای سی بی) کے مؤقف سے مطابقت رکھتا ہے جو افغانستان کے ساتھ دوطرفہ کرکٹ کے حوالے سے پہلے ہی پابندیاں عائد کر چکے ہیں۔

ذرائع کے مطابق پولیس کا کہنا ہے کہ ربیعہ احسن کے اہلخانہ واقعے کو حادثہ سمجھتے ہیں اور ابتدائی طور پر قتل کا مقدمہ درج کرانے پر بھی رضامند نہیں تھے۔ واقعے کے وقت میاں بیوی الماری سے بچوں اور بڑوں کے گرم کپڑے نکال رہے تھے کہ اسی دوران الماری میں موجود ایک پستول سامنے آگیا اور اچانک گولی چل گئی۔

ذرائع کے مطابق فائرنگ کے نتیجے میں ربیعہ احسن کو صرف ایک گولی لگی، جو گردن کے نیچے سامنے کی جانب سے جسم میں داخل ہوئی اور کمر سے باہر نکل گئی۔

پولیس نے واقعے کے سلسلے میں گھر میں کام کرنے والے 15 سالہ ملازم سے بھی پوچھ گچھ کی، جسے تقریباً دو ہفتے قبل ملازمت پر رکھا گیا تھا۔ تاہم پولیس نے اسے واپس گھر بھیج دیا ہے۔

پولیس ذرائع کے مطابق واقعے میں استعمال ہونے والے پستول اور جائے وقوعہ سے ملنے والے گولی کے خول کو مزید فرانزک تجزیے کے لیے لاہور بھجوایا گیا ہے۔

فرانزک رپورٹ سے یہ تصدیق ہوگی کہ آیا برآمد ہونے والا پستول ہی فائرنگ کے واقعے میں استعمال ہوا تھا یا نہیں۔

دوسری جانب پولیس کی تفتیشی ٹیم آج دوبارہ جائے وقوعہ کا دورہ کرے گی اور واقعے سے متعلق شواہد کا جائزہ لے گی۔

پولیس حکام کے مطابق واقعے کے تمام پہلوؤں سے تحقیقات جاری ہیں اور حتمی نتیجہ فرانزک رپورٹ سمیت دیگر شواہد سامنے آنے کے بعد ہی اخذ کیا جائے گا۔

میرا نے سوشل میڈیا پر جاری اپنے پیغام میں وزیراعلیٰ پنجاب مریم نواز شریف کے لیے خصوصی طور پر اظہارِ تشکر کرتے ہوئے کہا کہ انہوں نے ان کی بہن کے علاج معالجے کے لیے بھرپور تعاون کیا۔

اداکارہ نے اپنے پیغام میں لکھا کہ میری بہن اب اس دنیا میں نہیں رہیں، لیکن مریم نواز شریف نے اس مشکل ترین وقت میں جس طرح ان کا ساتھ دیا، اسے وہ اور ان کے اہل خانہ ہمیشہ یاد رکھیں گے۔

میرا کے مطابق وزیراعلیٰ پنجاب نے پاکستان میں برطانوی ہائی کمشنر سے بھی ان کی بہن کی انگلینڈ میں تدفین کے حوالے سے بات کی اور اس سلسلے میں ضروری انتظامات کروانے میں مدد فراہم کی۔

انہوں نے بتایا کہ اللہ کے کرم اور مریم نواز شریف کے تعاون سے ان کی مرحوم بہن کی آخری رسومات ادا کردی گئی ہیں۔

اداکارہ نے وزیراعلیٰ پنجاب کے لیے دعا کرتے ہوئے کہا کہ اللہ تعالیٰ انہیں اسی طرح دکھی انسانیت کی خدمت کرنے کی توفیق عطا فرمائے اور اس نیکی کا اجر دے۔

میرا نے اپنے پیغام میں مریم اورنگزیب کا بھی خصوصی شکریہ ادا کیا اور ان کی مدد کو سراہتے ہوئے کہا کہ وہ دل کی گہرائیوں سے ان کی شکر گزار ہیں۔

واضح رہے کہ اداکارہ میرا کی بہن کے انتقال کی خبر گزشتہ روز سامنے آئی تھی، جس کے بعد اداکارہ نے اس مشکل وقت میں تعاون کرنے والی شخصیات کے لیے اظہارِ تشکر کیا ہے۔

شائستہ عباس کئی ماہ سے کینسر کے مرض سے لڑ رہی تھیں۔ وہ لندن میں مقیم تھیں اور وہیں ایک اسپتال میں ان کا علاج جاری تھا۔ بیماری کے دوران ان کی طبیعت کئی مرتبہ خراب ہوئی اور انہیں اسپتال میں داخل بھی کرنا پڑا۔ رپورٹس کے مطابق انتقال سے قبل وہ تقریباً دو ماہ سے مسلسل اسپتال میں زیرِ علاج تھیں۔

شائستہ عباس پیشے کے اعتبار سے وکیل تھیں اور ان کی ایک کمسن بیٹی بھی ہے۔ ان کے انتقال کے بعد میرا نے اپنی بھانجی کو گود لینے کا فیصلہ کیا ہے۔

چیف الیکشن کمشنر کی سربراہی میں پانچ رکنی کمیشن نے سماعت کی، جس میں وزارتِ دفاع کے حکام اور قانونی مشیر بھی پیش ہوئے۔

وزارتِ دفاع کے حکام نے بتایا کہ انتخابات کی تاریخ مقرر کرنے کے لیے درخواست وفاقی حکومت کو بھجوائی جاچکی ہے، تاہم تاحال جواب موصول نہیں ہوا۔

اس پر چیف الیکشن کمشنر نے تشویش کا اظہار کرتے ہوئے کہا کہ وفاقی حکومت نہ وزارتِ دفاع کو جواب دے رہی ہے اور نہ ہی الیکشن کمیشن سے انتخابات کی تاریخ مقرر کرنے کی درخواست کررہی ہے۔

وزارتِ دفاع کے مشیرِ قانون اور ایڈیشنل ڈی جی ملٹری لینڈز نے کمیشن کو بتایا کہ دو کنٹونمنٹ بورڈز میں حلقہ بندیوں کا عمل مکمل ہونا باقی ہے۔ انہوں نے اعلیٰ حکام کی ہدایت کا حوالہ دیتے ہوئے جنوری 2027 تک مہلت دینے کی درخواست کی اور یقین دہانی کرائی کہ اس مدت میں حلقہ بندیاں مکمل کرلی جائیں گی۔

چیف الیکشن کمشنر نے کہا کہ جن علاقوں میں حلقہ بندیوں کا کام زیرِ التوا ہے، انہیں چھوڑ کر باقی علاقوں میں بلدیاتی انتخابات کرائے جاسکتے ہیں۔

تمام فریقین کے دلائل سننے کے بعد الیکشن کمیشن نے فیصلہ محفوظ کرلیا، جو جلد سنایا جائے گا۔

برطانوی اخبار فنانشل ٹائمز کی رپورٹ کے مطابق بات چیت سے آگاہ ایک ذرائع نے بتایا ہے کہ نیتن یاہو کی جانب سے ایران کے خلاف دوبارہ فوجی کارروائی کی کوششوں پر وائٹ ہاؤس کے اندر اور باہر موجود جنگ مخالف حلقے تشویش کا اظہار کر رہے ہیں اور ان کوششوں کو روکنے کے لیے سرگرم ہیں۔

رپورٹ میں کہا گیا ہے کہ خطے کے مختلف رہنما بھی امریکی صدر ڈونلڈ ٹرمپ پر زور دے رہے ہیں کہ وہ ایران کے ساتھ کشیدگی میں مزید اضافے سے گریز کریں اور فوجی کارروائی کے بجائے مذاکرات کو ترجیح دیں۔

فنانشل ٹائمز کے مطابق نیتن یاہو کی جانب سے ایران پر دوبارہ حملوں کی کوششوں نے عرب اور مسلم رہنماؤں میں بھی تشویش پیدا کر دی ہے، جو خطے میں کشیدگی بڑھنے کے خدشات کا اظہار کر رہے ہیں۔

دوسری جانب اسرائیل کی صورتِ حال سے واقف ایک اور ذرائع نے اخبار کو بتایا کہ نیتن یاہو ایران کے خلاف دوبارہ فوجی کارروائی چاہتے ہیں، تاہم اس وقت امریکی صدر ٹرمپ کو اس حوالے سے قائل کرنے کے لیے کوئی باقاعدہ مہم نہیں چلائی جا رہی۔

اُدھر امریکی صدر ڈونلڈ ٹرمپ نے بھی پیر کے روز کہا کہ خلیجی ممالک ایران کے خلاف نئی فوجی کارروائی کے حق میں نہیں ہیں۔ انہوں نے قطری وزیراعظم شیخ محمد بن عبدالرحمان آل ثانی سے ملاقات کے بعد اپنے سوشل میڈیا پلیٹ فارم ٹروتھ سوشل پر لکھا کہ قطر، سعودی عرب، متحدہ عرب امارات، بحرین، کویت اور دیگر ممالک موجودہ صورتِ حال برقرار رکھنے کو ترجیح دیں گے۔

رپورٹ کے مطابق، اسرائیل میں گزشتہ ماہ ہونے والے غیر فیصلہ کن انتخابات کے بعد نیتن یاہو نگراں وزیراعظم کی حیثیت سے کام کر رہے ہیں۔ وہ ایران کی حکومت کو اقتدار سے ہٹانے کے لیے امریکا اور اسرائیل کی جانب سے دوبارہ مشترکہ فضائی حملوں کے حامی ہیں۔

تاہم ٹرمپ نے ایران کے ساتھ تقریباً نو ماہ سے جاری جنگ ختم کرنے کے لیے مثبت پیش رفت کا عندیہ دیا ہے اور کہا ہے کہ ایران پر امریکا کے نئے حملوں کا امکان اب کافی کم دکھائی دیتا ہے۔

فنانشل ٹائمز کے مطابق، قطر کے وزیراعظم سے ٹرمپ کی ملاقات میں شریک ایک سفارت کار نے بتایا کہ دونوں رہنماؤں کے درمیان اس بات پر اتفاق پایا گیا کہ ایران کے ساتھ معاہدے تک پہنچنے کے لیے سفارت کاری ہی آگے بڑھنے کا ترجیحی راستہ ہے۔

رپورٹ میں بتایا گیا ہے کہ ترکیہ کے صدر رجب طیب اردوان، سعودی ولی عہد محمد بن سلمان، متحدہ عرب امارات کے صدر شیخ محمد بن زاید النہیان اور امیر قطر شیخ تمیم بن حمد آل ثانی نے بھی گزشتہ چند روز کے دوران ٹرمپ سے رابطے کیے ہیں۔

ان رہنماؤں نے امریکی صدر پر زور دیا ہے کہ ایران کے ساتھ سفارتی کوششوں کو مزید وقت دیا جائے اور فوجی کارروائی دوبارہ شروع کرنے سے گریز کیا جائے۔

رپورٹ کے مطابق علاقائی رہنماؤں کو خدشہ ہے کہ اگر ایران کے خلاف دوبارہ حملے شروع ہوئے تو تہران کی جانب سے وسیع پیمانے پر جوابی کارروائی کی جا سکتی ہے، جس سے مشرق وسطیٰ کے دیگر ممالک بھی متاثر ہو سکتے ہیں اور خطے میں عدم استحکام مزید بڑھ سکتا ہے۔

ایران بھی خبردار کر چکا ہے کہ اس پر دوبارہ حملے کیے گئے تو وہ جواب دینے کے لیے تیار ہے اور تنازع کو مشرق وسطیٰ سے باہر تک پھیلایا جا سکتا ہے۔

ادھر ایران اور امریکا کے درمیان جنگ بندی اور عبوری معاہدے کے لیے ثالثوں کی کوششیں کئی ہفتوں سے جاری ہیں، تاہم دونوں ممالک کے درمیان اختلافات دور نہیں ہو سکے۔

رپورٹ کے مطابق، مذاکرات میں ستمبر میں ایران کی جانب سے پیش کیے گئے سات روزہ منصوبے کی بنیاد پر ایک عبوری معاہدے کی تجویز بھی زیرِ بحث ہے، تاہم امریکی صدر ڈونلڈ ٹرمپ اس منصوبے کو پہلے مسترد کر چکے ہیں۔

قطر کے نشریاتی ادارے الجزیرہ نے پیر کے روز ایک باخبر ذرائع کے حوالے سے بتایا کہ قطری وزیراعظم کی ٹرمپ اور امریکی نائب صدر جے ڈی وینس سے الگ الگ ملاقاتوں میں ایران کے معاملے پر اچھی پیش رفت ہوئی ہے۔

رپورٹ کے مطابق ایک سفارتی ذرائع نے بتایا ان ملاقاتوں کا مقصد امریکا اور ایران کے درمیان اختلافات کم کرنا اور مذاکرات کو آگے بڑھانے کے لیے راستہ نکالنا تھا۔

دوسری جانب ایران کی نیم سرکاری خبر رساں ایجنسی فارس نیوز نے ایک نامعلوم ایرانی عہدیدار کے حوالے سے بتایا کہ آبنائے ہرمز دوبارہ کھولنے کے بدلے ایران کے منجمد 8 ارب ڈالر کے اثاثے جاری کرنے سے متعلق مذاکرات کی خبریں درست نہیں ہیں۔

ایرانی عہدیدار کے مطابق، تہران صرف ان سات شرائط کی بنیاد پر مذاکرات کرے گا جو اس نے واشنگٹن کو پیش کی ہیں۔ ان شرائط میں بحری ناکہ بندی اور یکطرفہ پابندیوں کا خاتمہ، منجمد ایرانی اثاثوں کی واپسی اور جنگ کا مکمل خاتمہ شامل ہیں۔

واضح رہے کہ امریکا اور اسرائیل نے 28 فروری کو ایران پر حملے شروع کیے تھے۔ بعد ازاں جولائی میں لڑائی ختم کرنے کے لیے ایک مفاہمتی یادداشت طے پائی تھی، تاہم سفارتی کوششوں میں تعطل کے بعد دوبارہ لڑائی شروع ہوگئی تھی۔ اب ایک مرتبہ پھر خطے کے ممالک سفارتی کوششوں کے ذری تنازع ختم کرنے کے لیے سرگرم ہیں۔

نائب وزیراعظم نے اسلام آباد پالیسی ریسرچ انسٹی ٹیوٹ کے زیرِ اہتمام منعقدہ عالمی کانفرنس ’مارگلہ ڈائیلاگ‘ کی افتتاحی تقریب سے خطاب کرتے ہوئے کہا کہ ابھرتے ہوئے عالمی نظام کی ساخت ابھی غیر یقینی ہے اور عالمی طاقتوں کے درمیان بڑھتی ہوئی کشمکش سے تصادم اور غلط فہمیوں کے خطرات میں اضافہ ہو رہا ہے۔

انہوں نے افسوس کا اظہار کیا کہ عسکری طاقت کے بڑھتے ہوئے استعمال کی وجہ سے سفارتکاری کی گنجائش محدود ہو رہی ہے، جبکہ اقوام متحدہ سمیت کثیرالجہتی ادارے سیاسی اختلافات اور بین الاقوامی قوانین کے غیر یکساں اطلاق کے باعث شدید دباؤ کا شکار ہیں۔

اسحاق ڈار نے خارجہ تعلقات پر روشنی ڈالتے ہوئے کہا کہ چین کے ساتھ ہمہ جہت اسٹریٹجک شراکت داری پاکستان کی خارجہ پالیسی کا بنیادی ستون ہے، جبکہ امریکا کے ساتھ تعمیری روابط جاری ہیں۔

انہوں نے بتایا کہ پاکستان خلیجی ممالک، یورپ، وسطی ایشیا، جاپان، مصر، متحدہ عرب امارات اور ملائیشیا سمیت دیگر اہم عالمی شراکت داروں کے ساتھ اپنے تعلقات کو وسعت دے رہا ہے۔

نائب وزیراعظم نے سعودی عرب اور ترکیہ کے ساتھ شراکت داری اور مکہ معاہدے کا حوالہ دیتے ہوئے واضح کیا کہ یہ مشترکہ دفاعی و تکنیکی تعاون پر مبنی اقدام کسی دوسرے ملک کے خلاف نہیں بلکہ صرف دفاعی نوعیت کا ہے، جس کا مقصد علاقائی امن، استحکام اور دہشت گردی کی روک تھام ہے۔

اسحاق ڈار نے اپنے خطاب میں اس بات پر بھی زور دیا کہ جغرافیائی سیاست اور معیشت ایک دوسرے سے جڑ چکے ہیں، جہاں تجارت، ٹیکنالوجی اور توانائی تک رسائی پر تزویراتی رقابت کے اثرات گہرے ہو رہے ہیں۔

انہوں نے کہا کہ ٹیکنالوجی کے تندوتیز فروغ سے پیدا ہونے والے چیلنجز کا مقابلہ کرنے کے لیے نئے قواعد اور جوابدہی کی ضرورت ہے۔

نائب وزیراعظم نے اس عزم کا اعادہ کیا کہ حکومت پاکستان میں معاشی ترقی، روزگار کے مواقع، غیر ملکی سرمایہ کاری اور عوام کے معیارِ زندگی کو بہتر بنانے کے لیے کاروبار دوست ماحول اور مضبوط اداروں کی تشکیل پر عمل پیرا ہے۔

واقعے کی سنگینی کو مدِ نظر رکھتے ہوئے وزیرِ اعظم نے تربیلا ڈیم حادثے کا فوری نوٹس لیتے ہوئے متعلقہ حکام سے تفصیلی رپورٹ طلب کر لی ہے، جس میں تمام اداروں کو واقعے کی بنیادی وجوہات اور اب تک کی پیش رفت سے آگاه کرنے کی ہدایت کی گئی ہے۔

ڈیم انتظامیہ کے مطابق تربیلا ڈیم میں پانی کی موجودہ سطح 1492 فٹ ریکارڈ کی گئی ہے، جو کہ ڈیڈ لیول سے 90 فٹ بلند ہے۔ ڈیم کا ڈیڈ لیول 1402 فٹ جبکہ فل لیول 1550 فٹ ہے۔

ڈیم انتظامیہ نے بتایا ہے کہ اس وقت بجلی پیدا کرنے والے 15 یونٹس فعال ہیں جبکہ 2 یونٹس کو بند کر دیا گیا ہے، اور ڈیم سے بجلی کی موجودہ پیداوار 656 میگا واٹ ریکارڈ کی جا رہی ہے۔

حادثے کی پیشِ نظر ہری پور، صوابی اور نوشہرہ کی ضلعی انتظامیہ کو ہائی الرٹ جاری کرتے ہوئے عوام کے تحفظ اور احتیاطی تدابیر کی سخت ہدایات دی گئی ہیں۔

معاملے کی تحقیقات اور صورتِ حال کا جائزہ لینے کے لیے چیئرمین واپڈا محمد سعید ٹی فائیو (T-5) توسیعی منصوبے کا دورہ کر رہے ہیں، جہاں وہ تعمیراتی مقام پر جاری تحقیقات اور بحالی کی پیش رفت کی نگرانی کریں گے۔

تربیلا ڈیم کا پانچواں توسیعی منصوبہ 2028 تک مکمل ہونا طے تھا، تاہم اس پیش آنے والے حادثے کے بعد منصوبے پر تمام تعمیراتی کام کو غیر معینہ مدت کے لیے معطل کر دیا گیا ہے۔