نیلم منیر کا شمار پاکستان کی صف اوّل کی اداکاراؤں میں ہوتا ہے۔ انہیں پاکستان کی خوبصورت ترین اداکاراؤں میں بھی شمار کیا جاتا ہے۔ آج ہم آپ کو نیلم منیر کی زندگی اور کیریئر کے بارے میں بتانے جارہے ہیں۔

نیلم منیر 20 مارچ 1992 کو کراچی میں پیدا ہوئیں۔ انہوں نے بہت کم عمری میں ہی ایک ماڈل کے طور پر اپنے کیریئر کا آغاز کیا۔ انہوں نے پی ٹی وی کے ڈرامہ سیریل 'تھوڑا سا آسمان' میں ڈیبیو کیا جس کے بعد کبھی پیچھے مُڑ کر نہیں دیکھا۔

ان کے مشہور ڈراموں میں میری صبح کا ستارا، قیدِ تنہائی، شہرِ دل کے دروازے، آنکھ مچولی اور جل پری جیسے ڈرامے شامل ہیں۔ انہوں نے ایک نجی ٹی وی چینل پر بھی کام کیا۔

انہوں نے مختلف ٹیلی فلمز میں بھی کام کیا، ان ٹیلی فلموں میں اچھے کی لڑکی، میں تم اور عمران ہاشمی اور وفا بلوچ کی بے وفائی شامل ہیں۔

نیلم منیر احسن خان کے ہمراہ اب فلموں میں بھی ڈیبیو کررہی ہیں۔ وہ اپنے فلمی کیریئر کا آغاز رواں برس ریلیز ہونے والی فلم 'چُھپن چھپائی' سے کررہی ہیں۔ یہ ایک کامیڈی تھریلر ہوگی جس کے ڈائیریکٹر محسن علی ہیں۔ یہ فلم ممکنہ طور پر رواں برس 22 دسمبر کو ریلیز کردی جائے گی۔