کراچی:ٹیڈاپ اسکینڈل کیس میں وفاقی اینٹی کرپشن عدالت نے یوسف رضا گیلانی کی عدالت کی حاضری سے استثنیٰ کی درخواست منظور کر لی۔کرپشن کی رقم جمع نہ کرانے پر سابق صدر نیشنل بینک نجم الحق اور بینک ملازم صلاح الدین کی ضمانتیں منسوخ کر کے عدالت میں ہی ہتھکڑیاں لگوا دی گئیں۔

ٹیڈاپ اسکینڈل میں نامزد ملزم سابق وزیراعظم یوسف رضا گیلانی کراچی میں اینٹی کرپشن عدالت میں پیش نہ ہوئے، ملزم کے وکلا کی جانب سے حاضری سے استثنیٰ کی درخواست کی گئی جو عدالت نے منظور کرتے ہوئے سماعت پچیس فروری تک ملتوی کردی۔عدالت نے نیشنل بینک کے سابق صدر نجم الحق اور بینک ملازم صلاح الدین کو کرپشن کی نوے لاکھ روپے کی رقم جمع نہ کرانے پر ضمانتیں منسوخ کرکے کمرہ عدالت میں ہی ہتھکڑیاں لگوا دیں۔ دونوں ملزمان نے سندھ ہائی کورٹ سے ضمانتیں حاصل کر رکھی تھیں، ملزمان کو جیل بھیج دیا گیا،عدالت نے کیس میں ملوث چار مفرور ملزمان کے بھی دوبارہ ناقابل ضمانت وارنٹ جاری کردئے۔