لاہور:محکمہ صحت پنجاب کی کوششوں کے باوجود سوائن فلو کے حملے مسلسل جاری ہیں چوبیس گھنٹوں کے دوران صوبے میں ایک خاتون دم توڑگئی صوبے میں ہلاکتوں کی تعداد بائیس تک پہنچ گئی۔

جناح ہسپتال لاہور میں سوائن فلو کا شکار پچپن سالہ حنیفاں بی بی کو چند روز قبل لایا گیا ڈاکٹرز کے مطابق خاتون آخری سٹیج پر پہنچ چکی تھی جس کے باعث وہ دم توڑ گئی۔رواں ماہ صوبے میں ہلاکتوں کی تعدادبائیس تک پہنچ چکی ہے جبکہ صوبے میں چوبیس گھنٹوں کے دوران مزید پانچ افراد میں مرض کی تشخیص ہوئی ہے۔

ہولی فیملی اسپتال راولپنڈی میں تین،نشتر اسپتال میں اور جناح اسپتال لاہور میں ایک ایک مریض زیرعلاج ہے۔رواں ماہ صوبے بھر میں اناسی افراد سوائن فلو میں مبتلا ہوچکے ہیں تاہم مشتبہ کیسز کی تعداد بھی ایک سو اکاسی تک پہنچ گئی ہے۔