اسلام آباد:پی آئی اے ملازمین کا احتجاج تیرہویں روز بھی جاری ہے ،فلائٹ آپریشن مسلسل پانچویں روز بھی بند ہے ،حکومت اور ایکشن کمیٹی میں مذاکرات کا دوسرا دور آج ہوگا۔

پی آئی اے کی ممکنہ نجکاری کے خلاف ملازمین کا احتجاج جاری ہے،ہیڈآفس کے باہرملازمین کا دھرنا برقرار ہے اور ملازمین سیاہ پٹیاں باندھ کراحتجاج میں شریک ہیں۔ٹریننگ سینٹر،کارگواورانجینرنگ کمپلیکس،ہیڈآفس اوردیگردفاترمیں کام بند ہے جبکہ رینجرزاورپولیس کی بھاری نفری بھی اطراف میں تعینات ہے۔ راولپنڈی کے بے نظیرانٹرنیشنل ایئرپورٹ پربھی فلائٹ آپریشن بحال نہ ہونے سے مسافروں کو سخت مشکلات کا سامنا ہے جبکہ ملازمین ہیڈ آفس کے باہر دھرنا دے کر بیٹھے ہیں۔

لاہور کے علامہ اقبال انٹرنیشنل ایئرپورٹ پرملازمین مرکزی آفس میں جمع ہیں، اور کام کے بجائے نعرے بازی زوروں پر ہے ،پشاور میں پی آئی اے بلڈنگ مال روڈ پشاور کینٹ میں ملازمین احتجاجی دھرنا دیئے بیٹھے ہیں جبکہ باچا خان ایئرپورٹ پر فلائٹ آپریشن مکمل طور پر بند ہے۔کوئٹہ میں بھی پی آئی اے ملازمین سراپا احتجاج ہیں،مسافر نجی ایئرلائنز کے ذریعے سفر کرنے پر مجبور ہیں۔