اسلام آباد:دفترخارجہ کے نئے ترجمان نفیس ذکریا نے اپنے عہدے چارج سنبھال لیا،کہتے ہیں افغان طالبان کے ساتھ مذا کرات کا فیصلہ چارممالک کی مشاورت سے کیا گیا،پاک بھارت مذاکرات کیلئے بھی مشاورت سے تاریخ کا تعین کریں گے ۔

ترجمان دفترخارجہ نفیس ذکریا نے ہفتہ واربریفنگ دیتے ہوئے بتایا کہ صرف پاکستان ہی طالبان سے مذاکرات کا انعقاد نہیں کروا رہا،فیصلہ 4ممالک کی مشاورت سے کیا گیا،افغان طالبان سے بات چیت کاروڈ میپ واضح کر دیا ہے،آئندہ اجلاس میں حکمت عملی طے کی جائے گی۔پاک بھارت مذاکرات کے بارے میں انہوں نے کہا کہ سیکرٹری خارجہ کی سطح پر بات چیت کیلئے دونوں ممالک سنجیدہ اور رابطے میں ہیں،نئی تاریخ کا تعین دونوں ممالک مشاورت سے کریں گے۔

ترجمان کا کہنا تھا کہ پٹھان کوٹ حملے کی تفتیش مکمل ہونے کے بارے میں کچھ کہنا قبل ازوقت ہوگا،پیشرفت کی تفصیلات سے آگاہ کیا جائے گا،ایک سوال کے جواب میں ترجمان نے کہا کہ سعودی عرب فوج بھجوانے کا کوئی فیصلہ نہیں ہوا۔