مرغیاں پالنا دنیا بھر کے کسانوں کا شوق اور ضرورت ہوتی ہے، لیکن امریکہ میں بہت سے امراء ایسے بھی ہیں جو اسے امارت کے اظہار کا ذریعہ سمجھتے ہیں۔

لوگوں کے اس شوق سے فائدہ اٹھانے کیلئے نیوہیمپشائر سے تعلق رکھنے والی خاتون جولی بیکر نے ایک نیا اور انوکھا کاروبار شروع کیا ہے۔

جولی مرغیوں کیلئے فیشن ایبل ڈائپر تیار کرتی ہیں اور اس کاروبار سے ہر سال 50 ہزار ڈالر سے زیادہ کما لیتی ہیں۔

10 سال پہلے جولی اور اُن کی بیٹی کلیئر مونٹ میں اپنے فارم پر مرغیاں پالتی تھیں۔ انہوں نے ایک یوٹیوب ویڈیو میں مرغیوں کو ڈائپر پہنے دیکھا، جس میں بتایا گیا تھا کہ ڈائپر پہننے سے مرغیاں ہر جگہ بیٹ نہیں کرتیں۔

جولی نے اپنی پسندیدہ مرغی کیلئے ڈائپر تیار کیے۔ اس کے بعد مرغیاں رکھنے والے دوسرے لوگوں نے بھی اپنی مرغیوں کیلئے یہ ڈائپر طلب کرنے شروع کر دئیے۔

جلد ہی جولی کا کاروبار چل نکلا اور شہروں میں رہنے والے لوگ بھی ان ڈائپر کے بڑے گاہک بن گئے۔

اس وقت پچاس امریکی ریاستوں میں جولی کے بنائے 500 سے 1000 ڈائپر ماہانہ فروخت ہوتے ہیں۔ جولی کے بنائے ڈائپر کی قیمت 18 ڈالر ہوتی ہے۔ جولی نے اپنے کاروبار کو مزید بڑھایا ہے۔ اب وہ مرغیوں کے پروں کی حفاظت کیلئے بھی کپڑے کی مصنوعات بناتی ہیں۔