اسلام آباد:ترجمان تحریک انصاف نعیم الحق کا کہنا ہے کہ وزیراعظم نے ریاستی اداروں پریلغارکا اندازبدل لیا،پہلے لاٹھیاں تھما کر عمارتوں پرحملے کرواتے تھے آج کل درباریوں سے بیانات دلواتے ہیں۔

ترجمان تحریک انصاف کا وفاقی وزیرپرویزرشید کے خطاب پر ردعمل میں کہنا تھا کہ لاہورمیں ثقافتی ورثے کو اورنج لائن منصوبے کی بھینٹ چڑھانے کے بعد وہ ٹیکسلا میں ثقافت بچانے کا درس دیتے ہیں،حکومت قوم کو عالمی اداروں کے ہاں گروی رکھنے اور عوام کو لوٹنے کو ترقی کا نام دے رہی ہے۔

انہوں نے کہا کہ کیا قطرسے خریدی گئی ایل این جی کے بارے میں پارلیمان کو لاعلم رکھنا باعث شرم نہیں؟ اور کیا محض ڈھائی سال میں پانچ ہزار ارب کے قرضے وزیراعظم کے خاندان کا عظیم کارنامہ نہیں؟ نعیم الحق کا مزید کہنا تھا کہ وزیراعظم نیب کو دھمکیاں دیتے ہیں اور وزرا صحافیوں پر چنگھاڑتے ہیں،وزیراعظم نے ریاستی اداروں پر یلغار کا انداز بدل لیا ہے۔