کراچی :سندھ کی سیاسی ،مذہبی اورقوم پرست جماعتوں نے مارچ میں ہونے والی چھٹی مردم شماری ملتوی نہ کرنے،سیکیورٹی اداروں کی نگرانی میں مردم شماری کے انعقاد کا مطالبہ کردیا ہے،کل جماعتی کانفرنس نے مردم شماری کا وقت چالیس روزمقررکرنے کی تجویز دے دی ہے۔

چھٹی مردم شماری پروزیراعلی ہاو¿س میں ہونے والی کل جماعتی کانفرنس میں متحدہ قومی موومنٹ ، فنکشنل لیگ ،مسلم لیگ نون ،تحریک انصاف ،جماعت اسلامی سمیت اٹھائیس سیاسی ،دینی اورقوم پرست جماعتوں نے شرکت کی۔وزیراعلی سندھ سید قائم علی شاہ نے وفاقی حکومت کے یکطرفہ سینسزکمیشن کومسترد کرتے ہوئے کہا سندھ حکومت اعتماد میں نہیں لیا گیا۔

قائد حزب اختلاف خواجہ اظہارالحسن نے کہاکہ چھٹی مردم شماری سیکورٹی اداروں کی نگرانی میں ہونی چاہیئے،وفاق سندھ کی شکایات پرکان نہیں دھرتا۔ تحریک انصاف ،جماعت اسلامی ، مسلم لیگ نون اورفنکشنل لیگ نے مردم شماری ملتوی کرنے کی مخالفت کی۔

کل جماعتی کانفرنس نے متفقہ قرارداد کے ذریعہ محکمہ شماریات ،نادرا میں صوبوں کومساوی نمائندگی دینے اورغیرملکی تارکین وطن کے قومی شناختی کارڈ بھی منسوخ کرنے کا مطالبہ کیاہے ،قرارداد میں دیگرصوبو ں سے لوگوں کی بڑھتی ہوئی نقل مکانی اورغیرملکی تارکین وطن کی سندھ میں مسلسل آمد پراظہارتشویش کیا گیا۔