یونگژو: کُتے نہ صرف وفادار ہوتے ہیں بلکہ اپنے مالکان سے بہت زیادہ محبت بھی کرتے ہیں۔ لیکن بعض اوقات ان کی یہ معصومانہ محبت مالکان کیلئے نقصان کا باعث بن جاتی ہے۔ بالکل اسی طرح ایک شخص کو اُن کے کتے کی خوشی نے ہسپتال پہنچا دیا۔

ڈیلی میل کی رپورٹ کے مطابق چین میں کتے نے اپنے مالک کو دیکھ کر دوسری منزل چھلانگ لگائی اور سیدھا  اُن کے اوپر جا گرا، جس کی وجہ سے مالک کی گردن کی ہڈی ٹوٹ گئی۔

چین کے صوبے  ہونان  کے شہر یونگژو سے تعلق  رکھنے والے 67 سالہ شخص، جن کا خاندانی نام لیو بتایا گیا ہے، پیر کو اپنے رشتے داروں سے مل کر گھر پہنچے۔

وہ گھر میں داخل ہی ہوئے تھے کہ کوئی بھاری چیز اُن کے اوپر آن گری اور وہ بے ہوش ہوگئے۔ لیو کے گھر والوں نے انہیں ہسپتال پہنچایا۔

ہوش میں آ کر لیو نے بتایا کہ انہیں پہلا خیال یہی آیا تھاکہ اُن کے گھر کی دیوار اُن کے اوپر گرگئی لیکن انہیں بعد میں پتا چلا کہ یہ سب اُن کے پالتو کتے کی خوشی کا نتیجہ تھا۔

ساٹھ پاؤنڈ وزنی یہ کتا لیو کو دیکھ کر اتنا خوش ہوا کہ دوسری منزل سے ہی اپنے مالک پر چھلانگ لگا دی۔

کتے کے گرنے سے لیو کی گردن کی ہڈی میں فریکچر ہوگیا۔ ہڈی کو درست کرنے کیلئے لیو کو سرجری کے عمل سے گزرنا پڑے گا۔

لیو کا کہنا ہے کہ وہ اپنی چوٹ کیلئے کتے کو الزام نہیں دیتے۔ تاہم وہ کتے کو صحن میں زنجیر سے  باندھ کر رکھیں گے تاکہ اس طرح کے حادثات دوبارہ نہ ہوں۔ جبکہ دوسری جانب اتنی اونچائی سے گرنے کے باوجود کتا زخمی ہونے سے محفوظ رہا۔