اسلام آباد:اسلام آباد کی مقامی عدالت نے لال مسجد کے سابق خطیب مولانا عبدالعزیزکی عبوری ضمانت میں سات مارچ تک توسیع کردی۔مولانا عبدالعزیزکا کہنا ہے اگر ملک میں قرآن و سنت کا قانون ہو تو کوئی شخص کسی پر جھوٹا مقدمہ درج نہ کرائے۔ سول سوسائٹی کے نمائندے نے کہا کہ فیصلہ عدالت نے کرنا ہے۔

اسلام آباد کی مقامی عدالت کے ایڈیشنل ڈسٹرکٹ اینڈ سیشن جج راجہ آصف محمود نے اشتعال انگیز تقریر اور مظاہرین کو دھمکیاں دینے سے متعلق لال مسجد کے سابق خطیب مولانا عبدالعزیزکے خلاف کیس کی سماعت کی۔مولانا عبدالعزیزکے وکیل نے سیکورٹی خدشات کے باعث موکل کی ضمانت میں توسیع کی استدعا کی جو عدالت نے منظور کرتے ہوئے سماعت ملتوی کر دی۔

عدالت کے باہر میڈیا سے گفتگو میں مولانا عبدالعزیز نے ایک مرتبہ پھرالزامات کومسترد کرتے ہوئے کہا کہ ان کے خلاف بنائے گئے تمام مقدمات جھوٹے ہیں،اگر ملک میں قرآن و سنت کا قانون ہوتوکوئی کسی پر جھوٹا مقدمہ درج نہ کروا سکے۔

سول سوسائٹی کے نمائندے جبران ناصرنے کہا کہ عدالتیں انصاف کے لیے ہوتی ہیں،ہماری کسی سے ذاتی دشمنی نہیں،عدالت جو فیصلہ کرے گی قبول ہوگا۔