اسلام آباد:زندہ مرغی کی قیمت 200 روپے اور گوشت 300 روپے فی کلو تک پہنچ گئی ، اس پیشے سے وابسطہ تاجروں نے قیمت میں غیر معمولی اضافے کی وجہ مرغی کی خوراک اور ادویات کی قیمتیں مہنگا ہونے کو قرار دیا ہے۔

عید الضحی کے باوجود چکن کی قیمتوں میں کوئی کمی نہیں آئی، زندہ مرغی اوسطا قیمت 200روپے فی کلو میں فروخت ہورہی ہے ملک کے کچھ حصوں میں کچھ کم تو کہیں 300روپے کلو میں خریدی جارہی ہے ۔

 مارکیٹ ذرائع مرغی کی قیمتوں میں اضافے کا دفاع کرتے ہوئے کہتے ہیں کہ مرغی بانی کے کاروبارمیں زیادہ خرچ ادویات اورخوراک کا ہوتا ہے جس کا ذیادہ حصہ درآمد کیا جاتا ہے ، ڈالرکی قدربڑھنے کی وجہ سے خوراک اورادویات مہنگے داموں خریدنی پڑرہی ہیں ۔

دوسری جانب ہول سیلراورریٹیلر بھی مہنگے داموں خریداری کا شکوہ کررہے ہیں۔

 مارکیٹ ذرائع کہتے ہیں کہ چکن کی پیداواری لاگت بڑھنے اور طلب ورسد کے فرق کے باعث تاجر اس پیشے کو ترک کرنے پر مجبور ہوگئے ہیں ۔

کنزیومر رائٹس کے آفتاب عالم  نے حکومت سے مطالبہ کیا ہے کہ کھانے پینے کی بنیادی اشیا کی قیمتوں کو کنٹرول کرنے کیلئے خصوصی اقدامات  کئے جائیں۔

 ڈالرکی قیمت میں اضافے کے اثرات اشیائے خورد و نوش کی قیمتوں پرنمایاں ہورہے ہیں، یہ معاملہ توجہ طلب ہے۔