بالی وُڈ کی شہر آفاق 'شعلے' میں گبر سنگھ کے 'کالیا' کا کردار نبھانے والے اداکار ویجو کھوٹے 77 برس کی عمر میں اس دنیا سے رخصت ہوگئے۔

غیرملکی میڈیا رپورٹس کے مطابق اداکار کی گزشتہ کچھ عرصے سے طبیعت ناساز تھی اور ان کے جسم کے کچھ اعضاء نے کام کرنا چھوڑ دیا تھا۔

رپورٹ میں بتایا گیا ہے کہ اداکار ویجو کھوٹے کی موت ان کی رہائش گاہ پر ہی ہوئی، وہ پیر کے روز سونے کے بعد دوبارہ نہیں اٹھے جس کے بعد ان کی موت کی تصدیق کی گئی۔

ویجو کھوٹے کے علاوہ بھی اس بلاک بسٹر فلم میں اپنی اداکاری کے جوہر دکھانے والے کئی اداکار اس جہانِ فانی سے کوچ کرچکے ہیں، ان اداکاروں میں ٹھاکر یعنی سنجیو کمار،گبر یعنی امجد خان، رحیم چاچا یعنی اے کے ہنگل، ماسی یعنی لیلیٰ مشرا اور سامبا یعنی میک موہن شامل ہیں۔

واضح رہے کہ ویجو کھوٹے نے تقریباً 60 برس تک فلمی دنیا میں اداکاری کے جوہر دکھائے اور 300 سے زائد فلموں میں کام کیا۔