مودی سرکار نے مقبوضہ کشمیر سے پانچ ہزار ایک سو سے زائد کشمیریوں کو حراست میں لینے کا اعتراف کرلیا۔ ان افراد کو پانچ اگست کے بعد مقبوضہ کشمیر کی خصوصی حیثیت کے خاتمے کے بعد حراست میں لیا گیا ہے۔

تاہم ایک اندازے کے مطابق اب تک مودی سرکار نے حریت رہنماوں، سیاسی کارکنوں ، نوجوانوں سمیت تیرہ ہزار سے زائد کشمیریوں کو حراست میں لیا ہے ، سیکڑوں کو بھارت کی مختلف جیلوں میں منتقل کردیا گیا ہے۔ بھارتی وزیر جی کشن ریڈی نے اپنے پارلیمنٹ سے خطاب میں کہا کہ حراست میں لیے گئے افراد میں سیاسی کارکنان اورحریت رہنما بھی شامل ہیں ۔

حراست میں لیے گئے کشمیریوں کی مزید تفصیلات بتاتے ہوئے بھارتی وزیر کشن نے کہا کہ دوسو چونتیس کشمیریوں کو اتر پردیش اور ستائیس کو ہریانہ کی مختلف جیلوں میں رکھا گیا ہے۔ ان کا مزید کہنا تھا کہ تین ہزار دو سو اڑتالیس کشمیریوں کو وادی کی جیلوں میں ہی رکھا گیا ہے۔

دوسری جانب کشمیر میں مودی سرکار کا لاک ڈاون ایک سو تئیس ویں روز میں داخل ہوگیا ہے اور وادی میں لوگوں میں شدید غصہ پایا جاتا ہے جبکہ کشمیریوں کے ایک سو بیس روز سے زائد واٹس ایپ اکاونٹس ان ایکٹیو رہنے پر بند کردیئے گئے ہیں ۔