لاہور:پنجاب کے سابق مقتول گورنر سلمان تاثیر کے صاحبزادے شہباز تاثیر رہائی کے بعد خصوصی طیارے کے ذریعے لاہور پہنچ گئے،ساڑھے چار سال بعد اہلخانہ سے ملاقات کی،اس موقع پر جذباتی مناظر دیکھنے میں آئے۔

تفصیلات کے مطابق لاہور میں شہباز تاثیر کے گھر آج ایک الگ ہی سماں ہے،وہ اور ان کے اہل خانہ خوشی سے نہال ہیں، گھر پر مبارکباد دینے والوں کا تانتا بندھا ہے۔

پنجاب کے سابق مقتول گورنر سلمان تاثیر کے صاحبزادے ساڑھے چار سال بعد ائر پورٹ پر اہلخانہ سے ملے اس ملاقات کے موقع پر جذباتی مناظر دیکھنے میں آئے،ان کی اہلیہ ماہین تاثیر،بہن صنم تاثیر اور بھائی شان تاثیر گلے مل کر روتے رہے شہباز تاثیر کو ائر پورٹ سے سخت سیکیورٹی میں ان کے گھر لایا گیا۔

شہباز تاثیر کو اگست دو ہزار گیارہ میں لاہور کے علاقے گلبرگ سے اس وقت اغوا کیا گیا جب وہ آفس جارہے تھے، انہیں گزشتہ روز کچلاک سے بازیاب کروایا گیا۔

شہباز تاثیر کو آج صبح کوئٹہ سے خصوصی طیارے کے ذریعے لاہور روانہ کیا گیا، طیارے میں انٹیلی جنس اور سیکیورٹی کے اہلکار بھی سوار تھے، ڈی جی آئی ایس پی آر کے مطابق شہباز تاثیر کو ایئرپورٹ پر ہی اہل خانہ سے ملوا دیا گیا۔

ساڑھے چار سال قبل اغوا ہونے والے شہباز تاثیر کو اغوا کار پہلے وزیرستان لے گئے جہاں سے انہیں کنڑ اور پھر قندھار بھی لے جایا گیا،کچھ عرصہ پہلے شہباز تاثیر کو بلوچستان کے علاقے ژوب لایا گیا اور دس روز پہلے کچلاک منتقل کیا گیا، اغوا کاروں نے شہبازتاثیر کی رہائی کیلئے پچاس کروڑ روپے تاوان کا مطالبہ کیا تھا۔