اسلام آباد:قانون سازی کے لیے حکومت اوراپوزیشن ایک پیج پرآگئے ، قومی اسمبلی کے اجلاس میں حکومت نے نیب سمیت 6 آرڈیننسز واپس لے لیے  جبکہ 6بل کثرت رائے سے منظور کرلیے گئے۔

اسپیکراسد قیصر کی زیر صدارت قومی اسمبلی کا اجلاس ہوا،جس میں  حکومت اوراپوزیشن میں اتفاق رائے کا غیرمعمولی مظاہرہ کیا گیا ۔

چھ نیب آرڈیننس واپس

 حکومت نے نیب سمیت 6آرڈیننس واپس لینے کی تحریک پیش کی جسے ایوان نے منظورکرلیا،واپس لیے جانے والوں میں آرڈیننس میں سکسیشن سرٹیفکیٹ ، لیگل ایڈ ، خواتین کے جائیداد میں حقوق ، بے نامی لین دین، اعلی عدلیہ کے ڈریس کوڈاورقومی احتساب آرڈیننس شامل ہیں۔

اعتماد میں نہ لینے پر اعتراض

جماعت اسلامی کے مولانا عبدالاکبر چترالی آرڈیننسز کی واپسی اور بلز کی شکل میں منظوری پر اعتراض کرتے ہوئے کہا کہ حکومت اور اپوزیشن نے ہمیں مذاکراتی عمل میں اعتماد میں نہیں لیاجبکہ متحدہ مجلس عمل نے مذاکراتی عمل کا حصہ نہ بنانے پراحتجاج کیا۔

بلز کی منظوری

 حکومت نے یہی آرڈیننسز 6 بلزکی شکل میں پیش کیے جن میں سے 4بلزوراثتی سرٹیفکیٹ بل ، قانونی معاونت وانصاف ،اعلی عدلیہ میں لباس اور خواتین کے جائیداد کے بلزکثرت رائے سے منظورکیے گئے جبکہ قومی احتساب اور بے نامی لین دین سے 2بلزمزید غورکے لیے متعلقہ قائمہ کمیٹی کو بھیج دیئے گئے۔

زینب الرٹ بل منظور

وفاقی وزیر انسانی حقوق ڈاکٹر شیریں مزاری نے بچوں کے خلاف جرائم کے سدباب کےلیے زینب الرٹ جوابی ردعمل اوربازیابی ایکٹ 2019بل پیش کیا،جسے متفقہ طور پر منظور کرلیا گیا۔

متفقہ بل کے مطابق بچوں کے خلاف جرائم پرعمرقید اور10سے 14سال سزا دی جائے گی ،2گھنٹے کے اندرجرائم پرردعمل نہ دینے پرافسرکوبھی سزا دی جائے گی۔

معذورافراد کی فلاح و بہبود اور حقوق کا بل منظور

ایوان نے میں معذورافراد کی فلاح و بہبود اور حقوق سے متعلق  بل کی بھی منظوری دے دی۔

بعدازاں قومی اسمبلی کا اجلاس پیرکی شام 4بجے تک ملتوی کردیا گیا ۔