کراچی :ایم کیو ایم پاکستان کے کنوینر ڈاکٹر خالد مقبول صدیقی نے وفاقی وزارت چھوڑنے کا اعلان کردیا  تاہم ان کا کہنا تھا کہ وفاقی حکومت کی حمایت اور مدد جاری رکھیں گے۔

کراچی کے علاقے بہادرآباد میں ایم کیو ایم مرکز میں میڈیا سے گفتگو کرتے ہوئے خالد مقبول صدیقی کا کہنا تھا کہ 2018 میں عام انتخابات میں جو نتائج آئے وہ ایم کیوایم مکمل طور پر تسلیم نہیں کرتی، نتائج تسلیم نہ کرنے کے باوجود جمہوری عمل کو مستحکم کرنے کے لیےحمایت کی، ہم نے وعدہ کیا تھا حکومت بنانے سمیت ہر مشکل میں ساتھ دیں گے، جہانگیر ترین آئے تھے اور ان ہی کی موجودگی میں معاہدوں پر دستخط ہوئے ۔

 خالد مقبول صدیقی کا کہنا تھا کہ ہم نے حکومت سے کیا گیا اپنا وعدہ پورا کیا، ہم بہت انتظار کرتے رہے کہ حکومت کی کچھ مصروفیات ہو سکتی ہے لیکن ہمارے ایک نکتے پر بھی پیش رفت نہیں ہوئی ہمارا حکومت سے تعاون برقرار رہے گا لیکن میرا وزارت میں بیٹھنا بہت سارے سوالات کو جنم دیتا ہے، میرا اب کابینہ میں بیٹھنا بے سود ہے۔

 کنوینر ایم کیو ایم کا مزیدکہنا تھا کہ بیرسٹر فروغ نسیم کا نام ایم کیو ایم کی طرف سے نہیں دیا گیا تھا،ہم نے وزارت قانون وانصاف نہیں مانگی تھی، وفاق نے فروغ نسیم کو خود وزارت دی،فروغ نسیم کابینہ نہیں چھوڑ رہے، پہلے تجربے کی کمی سمجھتے رہے لیکن اب لگتا ہے سنجیدگی ہی نہیں، ان ساری چیزوں کا پیپلز پارٹی کی پیشکش سے لینا دینا نہیں،ہم حکومت سے تعاون جاری رکھیں گے ۔

خالد مقبول صدیقی نے کہا کہ وفاقی حکومت سندھ کےشہری علاقوں کی بھی حکومت ہے،شہری علاقوں کو فنڈزدینےسےآئین روکتا ہےتوآگاہ کیاجائے،ترقیاتی کاموں کے حوالے سے حکومتی پیشرفت کی رفتار اذیت ناک حد تک سست ہے، ڈیڑھ سال کا وقت کم نہیں ہوتا،اب ایسا لگتاہےکہ سنجیدگی کی کمی ہے۔

کنوینر ایم کیو ایم نے مزید حکومت کی جانب سے کراچی کوتاحال فنڈزجاری نہیں کیےگئے،کراچی پورےپاکستان کا89فیصد سیل ٹیکس دےرہاہے،کراچی نے ملک کو ہزاروں ارب دیے، حکومت سے کراچی کے لیے ایک ارب نہیں نکل رہے۔