کراچی :شہر قائد میں رات گئے بوندا باندی کے بعد سردی کی شدت میں مزید اضافہ ہوگیا، محکمہ موسمیات کا کہنا ہے سردی کی حالیہ لہر ایک ہفتے تک برقرار رہے گی۔

 کراچی میں سردی پھر بڑھ گئی، کم سے کم درجہ حرارت  12 ڈگری سینٹی گریڈ ریکارڈ کیا گیا۔

محکمہ موسمیات  کے مطابق پارہ مزید نیچے آنے کا امکان ہے ، کراچی میں گزشتہ شب بیشتر مقامات پر بوندا باندی کے بعد موسم مزید ٹھنڈا ہوگیا ہے،، شہر میں یخ بستہ ہوا چل رہی ہے سڑکوں پر سناٹا چھا گیا۔

 محکمہ موسمیات کا کہنا ہے کہ شہر میں بارش کا فی الحال کوئی امکان نہیں، البتہ بلوچستان کے مختلف علاقوں اور بالخصوص کوئٹہ میں  شدید برفباری کے اثرات  کراچی میں پڑیں گے جس کے باعث سردی کی حالیہ لہر  ایک ہفتے تک  برقرار رہنے کا امکان ہے ۔

 کراچی میں ٹھنڈ میں اضافے کے چھوٹے بڑے سب کو ہلاکر  رکھ دیا ہے، سرد ہواوں نے شہریوں کے دانت بجا دیے ہیں ۔

 محکمہ موسمیات کے مطابق ہوا میں نمی کا تناسب 50فیصد ہے، شمال مشرق سے ہلکی ٹھنڈی ہوا چل رہی ہے آئندہ 24 گھنٹے  کے دوران موسم سرد اور خشک رہے گا ۔