اسلام آباد:سپریم کورٹ نے موٹروے پر بائیکس چلانے سے متعلق درخواست پر ماہرین سے سفارشات لے کر پیش کرنے کی ہدایت کرتے ہوئے کہا کہ جن لوگوں نے ہیوی بائیکس لے رکھی ہیں وہ کہاں چلائیں؟۔

جسٹس مشیر عالم کی سربراہی میں سپریم کورٹ کے 3رکنی بینچ نے موٹر وے پر بائیکس چلانے کی اجازت دینے پر ہائی کورٹ کے فیصلے کے خلاف حکومتی اپیل پر سماعت کی۔

جسٹس منصور علی شاہ نے کہا کہ موٹر وے پر بائیکس چلانے یا نہ چلانے سے متعلق سفارشات حکومتی ماہرین سے نہ لی جائیں۔

ایڈیشنل اٹارنی جنرل نے کہا کہ حکومتی ماہرین سے رائے نہیں لیں گے، عوام کے تحفظ کے لیے موٹر وے پر بائیکس چلانے پر پابندی لگائی ۔

جسٹس منصور علی شاہ نے ریمارکس دیئے کہ  لوگوں کی جان کا تحفظ حکومت کی ذمہ داری ہے۔

جسٹس مشیر عالم نے ریمارکس دیئے کہ موٹر وے حکام کو خود نہیں پتہ گاڑیوں کے لیےکیا رولز ہیں ،2010 سے 2013 تک بائیکس چلانے کی اجازت تھی اس دوران کوئی نقصان نہیں ہوا۔

جسٹس منصور علی شاہ نے ریمارکس دیئے کہ موٹر وے پر ایسی گاڑیاں بھی چل رہی ہیں جو چلنے کے قابل نہیں، دیگر گاڑیوں کو کوئی نہیں روکتا صرف بائیکس پر پابندی لگا دی گئی ہے،ماہرین کی سفارشات آنے کے بعد فیصلہ کریں گے ۔

بعدازاں سپریم کورٹ نے موٹر وے پر بائیکس چلانے کی اجازت دینے پر ہائی کورٹ کے فیصلے کے خلاف کیس کی سماعت  2ہفتوں کے لیےملتوی کردی ۔