اسلام آباد:وزیر اعظم عمران خان آج ایک روزہ دورے پر کراچی پہنچیں گے، دورے کے دوران وزیر اعظم کراچی میں کاروباری وفد سمیت سیاسی شخصیات سے ملاقات کریں گے ۔

سندھ حکومت اور وفاق کے درمیان برف پگھلنے لگی ہے،وزیر اعظم عمران خان آج کراچی کے ایک روزہ دورے پر پہنچ رہے ہیں۔

وزیراعظم کے کراچی پہنچنے کے بعد وزیر اعلیٰ سندھ مراد علی شاہ گورنر سندھ عمران اسماعیل کے ہمراہ ایئرپورٹ پر عمران خان کا استقبال کریں گے۔

ذرائع کے مطابق،وزیراعلی سندھ کی وزیر اعظم عمران خان سے آج  ملاقات طے  پاگئی۔

ذرائع کا یہ بھی کہنا ہے کہ وزیراعظم گورنر عمران اسماعیل اور وزیر اعلی مراد علی شاہ الگ الگ ملاقات کریں گے جبکہ اس بات  کا بھی امکان ہے کہ وزیراعظم آئی جی سے بھی ملاقات کریں ۔

 وزیر اعظم کے دورہ کراچی کے شیڈول میں ایم کیو ایم سے کوئی  ملاقات طے نہیں ہے۔

 ایم کیو ایم نے تصدیق کی ہے کہ وزیر اعظم  کی جانب سے ملاقات کا کوئی دعوت نامہ موصول نہیں ہوا۔

 ذرائع کے مطابق ایم کیو ایم کی خواہش ہے کے وزیر اعظم بہادر آباد  آئیں، ایم کیو ایم قیادت نے اسلام آباد میں ہونے والی ملاقات میں  اس خواہش کا اظہار کیا تھا۔

 ادھر ترجمان جی ڈی اے سردار عبدالرحیم کا کہنا ہے وزیر اعظم آج شام کنگری ہاؤس میں گرینڈ ڈیموکریٹک  الائنس (جی ڈی اے) کے سربراہ پیرپگارا سے بھی ملاقات کریں گے۔

 ایک روزہ دورے میں وزیر اعظم کامیاب نوجوان پروگرام کے تحت  سندھ بھر سے منتخب نوجوانوں میں رقوم کے چیک تقسیم کریں گے  جبکہ گورنر ہاؤس کراچی میں تقریب سے خطاب بھی کریں گے۔

 وزیر اعظم عمران خان کو کراچی پیکیج سمیت وفاقی منصوبوں پر بھی بریفنگ  دی جائے گی۔

اس کے علاوہ وزیراعظم عمران خان شوکت خانم  میموریل کینسر اسپتال کی فنڈ ریزنگ تقریب میں بھی شرکت کریں گے۔