اسلام آباد:وزر مملکت برائے پارلیمانی امور علی محمد خان نے کہا ہے کہ یہ پارلیمان اور کچھ کرے یا نہ کرے صرف سود کا ہی خاتمہ کردے۔

اسپیکر اسد قیصر کی زیر صدارت قومی اسمبلی اجلاس میں وقفہ سوالات کے دوران پیپلزپارٹی نے اپنی قائد کے نام سے منسوب بے نظیر انکم سپورٹ پروگرام کا نام تبدیل کرنے کا معاملہ  قومی اسمبلی  اٹھا دیا،پیپلز پارٹی اور حکومتی اراکین آپس میں الجھ پڑے ۔

پیپلزپارٹی کی نفیسہ شاہ نے سوال اٹھایا کہ  حکومت کو بے نظیر بھٹو شہید کے نام سے کیا مسئلہ ہے؟ بی آئی ایس پی کا نام تبدیل کیوں کیا جا رہا ہے ۔

 وزیرمملکت علی محمد خان نے جواب دیتے ہوئے کہا کہ بینظیرانکم سپورٹ پروگرام ختم نہیں کیا جا رہا ہے،پروگرام کا فنڈ 100 ارب سے بڑھا کر 190 ارب روپے سے زائد کر دیا گیا ہے۔

 جماعت اسلامی کے مولانا عبد الاکبر چترالی  نے  اظہار خیال کرتے ہوئے ایوان میں سوال اٹھایا کہ بتایا جائے ریاست مدینہ میں سود کب ختم ہوگا؟سود کو تحفظ دینے والے 29قوانین کے خلاف ترامیم لایا ہوں مگر پتہ نہیں کچھ جماعتوں کو اس ترمیم سے مسئلہ کیا ہے؟  ۔

وزیر مملکت علی محمد خان نے کہا کہ ہم نے کب کہہ دیا ہم نے ریاست مدینہ بنا دی؟  ہم تو ریاست مدینہ بنانے بلکہ ان کے قدموں پر چلنے کی کوشش کررہے ہیں یہ پارلیمان اور کچھ کرے یا نہ کرے صرف سود کا ہی خاتمہ کردے، اس کے لیے قوانین تبدیل کرنا ہوں گے۔

 ٹڈی دل کے حملوں سے متعلق توجہ دلاؤ نوٹس کا جواب دیتے ہوئے وفاقی وزیر خسرو بختیار نے بتایا کہ موسمی تبدیلی کی وجہ سے ٹڈی دل کے پاکستان سے انخلاء میں تاخیر ہوئی  تاہم ہزاروں ایکڑ رقبے پر سپرے کے علاوہ ضلعی سطح پر  ڈیڑھ سال کےلیےایکشن پلان مرتب کر لیا گیا ہے، کابینہ ڈویژن کی جانب سے  نیا پاکستان ہاوسنگ پروجیکٹ کی تفصیلات ایوان میں پیش کی گئیں ۔

 ن لیگ کے شیخ فیاض الدین نے کہا  پچاس لاکھ گھروں کی بات کی جاتی ہے، 17 ماہ میں ایک اینٹ تک  نہیں لگی، جس پر وزیرمملکت علی محمد خان کا کہنا تھا کہ نیا پاکستان ہاؤسنگ اتھارٹی کام کر رہی ہے جلد گھروں کی تعمیر کا سلسلہ شروع ہوجائے گا۔

  اجلاس میں انسداد دہشتگری ایکٹ 1997 ، پوسٹ آفس کیش سرٹیفکیٹ، پوسٹ آفس نیشنل سیونگز سرٹیفکیٹ  ، گورنمنٹ سیونگز بینک اور امیگریشن ترمیمی بل 2020 بھی پیش کئے گئے،جنہیں متعلقہ کمیٹیوں کو بھجوا دیا گیا۔

 بعدازاں قومی اسمبلی کا آج ہونے والا اجلاس پیر کی شام 4بجے تک ملتوی کردیا گیا۔