جدہ:اسلامی تعاون تنظیم (او آئی سی )نےامریکی صدر ڈونلڈ ٹرمپ کا پیش کردہ مشرقِ اوسط امن منصوبہ مسترد کردیااور کہا ہے کہ فلسطین میں امن اور سلامتی فلسطینیوں سمیت تمام فریقوں کی منظوری کے بغیر ممکن نہیں۔

اوآئی سی کا ہنگامی اجلاس اوآئی سی ہیڈ کوارٹرجدہ میں ہوا،جس میں امریکی صدر ڈونلڈ ٹرمپ کے پیش کردہ منصوبے کا تفصیل سے جائزہ لیا گیا۔

اجلاس کے اعلامیےمیں کہا گیا کہ امریکا کے اعلان کردہ منصوبہ کو منصفانہ اور فریقین کے اطمینان کے مطابق ہونا چاہیئےتھا۔

بیان میں اس یک طرفہ منصوبے کو مسترد کردیا گیا ہے اور کہا گیا ہے کہ یہ فلسطینیوں کے مطالبات اور اُمنگوں کو پورا نہیں کرتا ہے۔

اوآئی سی فلسطینی عوام اور ان کی حکومت کے ساتھ آزاد فلسطینی ریاست کے قیام،ان کی امداد اور آبرومندانہ زندگی گزارنے کے قابل بنانے کے لیے کھڑی ہے۔

او آئی سی بیان میں او آئی سی کے سیکریٹری جنرل پر زوردیا گیا ہے کہ وہ اس معاملے میں مداخلت کریں اور ایسی کسی بھی قرارداد کو یکسر مسترد کردیں جس میں فلسطینی کاز کا کوئی مفاد پنہاں نہ ہو۔

اس میں تنظیم کے رکن ممالک سے کہا گیا ہے کہ بین الاقوامی اداروں بالخصوص اقوام متحدہ کی سلامتی کونسل کے ساتھ فلسطینی نصب العین کے مفاد میں قراردادوں کی تیاری کے لیے ابلاغ کریں۔

او ائی سی میں پاکستان کے مستقل نمائندے رضوان سعید شیخ کہا کہ پاکستان اور پاکستان کی عوام نے ہمیشہ فلسطین کے مسئلہ کی مستقل حمایت کرتا رہا ہے اور کرتا رہے گا،پاکستانی عوام فلسطینی عوام کے ساتھ گہری ہمدردی کا اظہار کرتے ہیں کیوں کہ ہمارے کشمیری بھائی بھی اسی طرح کی آزمائش سے گزر رہے ہیں ،ہم زوردیتے ہیں کہ صرف ان ہی حلوں کی پیروی کی جائے جا فلسطینیوں کے حق خودارادیت کے ادراک اور ایک منصفانہ جامع اور مستقل امن کے لیے ہو۔