پتراجایا:پاکستان اورملائیشیا کے درمیان قیدیوں کی حوالگی کے معاہدے پر دستخط ہوگئے،دونوں ملکوں نے مضبوط اقتصادی شراکت داری کے قیام پر بھی اتفاق کیا۔

وزیراعظم عمران خان کی اپنے ملائیشین ہم منصب مہاتیرمحمد کے ساتھ وفود کی سطح پرملاقات ہوئی،جس میں دونوں ممالک میں مضبوط اقتصادی شراکت داری کے قیام اورامت مسلمہ کو درپیش مسائل کے حل کے لیے مل کر کام کرنے پراتفاق کیا گیا ۔

 تجارت اورسرمایہ کاری میں حائل رکاوٹوں کےخاتمے ،تعلقات کی مضبوطی کے لیے مذاکرات باقاعدگی سے کرنے ، دفاع، قانون کے نفاذ، سیاحت اورتعلیم کے شعبوں میں مضبوط روابط کے قیام کا بھی عزم ظاہرکیاگیا ۔

 دونوں ممالک کے وزرائے اعظم کی موجودگی میں قیدیوں کی حوالگی کے معاہدے پردستخط بھی کیے گئے ،وزیرخارجہ شاہ محمود قریشی اورملائشین وزیرقانون نے دستخط کئے ۔

وزیراعظم عمران خان ملائیشین ہم منصب کی رہائش گاہ سیری پرداناپہنچے،مہاتیرمحمد اور اہلیہ نے وزیر اعظم عمران خان کا استقبال گیا،سیری پردانا میں وزیراعظم اور وفدکے اعزاز میں ظہرانہ دیا گیا۔