اسلام آباد:سابق وزیر داخلہ احسن اقبال نے کہا ہے کہ حکومت بڑی چالاکی اور عیاری سے اپنی نا لائقیوں کا بوجھ قومی اداروں پر ڈال رہی ہے،حکومت اداروں کے پیچھے چھپ کر ان کی غیر متنازعہ حیثیت کو نقصان پہنچا رہی ہے۔

احتساب عدالت میں میڈیا کے نمائندوں سے گفتگو کرتے ہوئے احسن اقبال  نے حکومت سے اپنی نااہلی تسلیم کرنے کا مطالبہ کرتے ہوئے کہا کہ عمران خان بڑی کامیابی سے خود کو دوسروں کے پیچھے چھپا رہے ہیں۔

سابق وزیرداخلہ نے کہا کہ یہ کہتے ہیں فوج اور حکومت ایک پیج پر ہے، کیا فوج کہتی ہے نالائقی کرو معیشت نہ چلاو اور گورنس نہ کرو،اپنی نالائقیوں کا بوجھ قومی اداروں پر ڈال کر چھپنے کی کوشش ملک کے ساتھ زیادتی ہے،اداروں کو بھی معیشت کے معاملات سے دور رہنا چاہیے تاکہ ان پر انگلی نہ اٹھے۔

نواز شریف کی صحت سے متعلق سوال پر احسن اقبال نے کہا کہ سابق وزیراعظم کی صحت پر ڈاکٹرز نے اہم فیصلے کیے ہیں،مریم نواز کو اپنے والد کے پاس جانے نہیں دیا جا رہا،نواز شریف کی صحت میں بہتری آتے ہی وہ وطن واپس ائیں گئے۔

لیگی رہنماء نے مزید کہا کہ شہباز شریف بھی چاہتے ہیں کہ صحت یاب ہوتے ہی ملک میں واپس آکر وہ اپوزیشن کا کردار نبھائیں۔