لاہور:سپریم کورٹ آف پاکستان نے سروسز اسپتال میں 7 نو مولود بچوں کی ہلاکت کے ذمہ دار ڈاکٹر کی بحالی کا حکم معطل کردیاجبکہ عدالت نے آئندہ سماعت پر فریقین کو بحث کے لیے طلب کر لیا۔

سپریم کورٹ رجسٹری لاہور میں چیف جسٹس آف پاکستان جسٹس گلزار احمد کی سربراہی میں 3رکنی بینچ نے پنجاب حکومت کی اپیل پر سماعت کی۔

جسٹس اعجاز الاحسن نے استفسار کیا کہ یہ معاملہ 2014ء کا ہے تو کیا یہ ڈاکٹر ریٹائرڈ نہیں ہو چکا۔

ایڈیشنل ایڈووکیٹ جنرل پنجاب نے بتایا کہ انکوائری کمیٹی نے ڈاکٹر سعید احمد خان کو جبری ریٹائرڈ کر دیا تھا،پنجاب سروس ٹربیونل نے ایک سال کی انکریمنٹ روک کر نوکری پر بحال کر دیا تھا،ڈاکٹر سعید اے سی منٹیننس کے انچارج تھے اور انکوائری کمیٹی نے انکو ذمہ دار ٹھہرایا تھا۔

چیف جسٹس پاکستان نے استفسار کیا کہ کیا سروسز ہسپتال میں نومولود بچوں کی ہلاکت اے سی نہ چلنے کی وجہ سے ہوئی تھی،رپورٹ میں کہاں ڈاکٹر سعید احمد خان کو ذمہ دار قرار دیا گیا۔

سرکاری وکیل نے بتایا کہ ڈاکٹر سعید احمد خان ہی اوورآل انچارج تھے،سروسز اسپتال میں آگ شارٹ سرکٹ کی وجہ سے لگی،پنجاب سروس ٹربیونل نے ڈاکٹر سعید احمد خان کو حقائق کے برعکس نوکری پر بحال کیا۔

سپریم کورٹ لاہور رجسٹری نے ڈاکٹر سعید کی بحالی کا حکم غیر قانونی قرار دے۔

عدالت نے پنجاب حکومت کی ڈاکٹر سعید کی بحالی کے خلاف اپیل سماعت کے لیے منظور کرتے ہوئے بحالی کا حکم معطل کرنے کا حکم دے دیااور فریقین سے ایک ماہ میں جواب طلب کر لیا۔