لاہور:پاکستان مسلم لیگ ن کی ترجمان مریم اورنگزیب کا کہنا ہے کہ عمران مافیا اپنی چوری ، نااہلی اور نالائقی سے نظر ہٹانے کے لیے سیاسی مخالفین کے گھروں پرچھاپے مار رہا ہے،چھاپہ مارنا ہی ہے تو زمان پارک اور بنی گالہ پر مارا جائے، عوام کی لوٹی ہوئی رقم، آٹا ، چینی اور روٹی کا حساب مل جائے گا۔

ترجمان مسلم لیگ نون مریم اورنگزیب نے اپنے ایک بیان میں کہا ہے کہ عمران مافیا نے شریف گروپ کے دفاتر پر چھاپہ تو مار لیا لیکن ہمیشہ کی طرح اسے کچھ نہیں ملا،شریف خاندان اور مسلم لیگ ن کو جیلوں میں رکھ کر 18 ماہ میں ایک روپے کی کرپشن کا ثبوت عدالت میں پیش نہیں کیا جاسکا۔

مریم اورنگزیب نے کہا کہ عمران مافیا ایک چھاپہ جہانگیر ترین ، خسرو بختیار، زمان پارک اور بنی گالہ پر بھی مارے،عوام کی لوٹی ہوئی رقم، آٹا ، چینی اور روٹی کا حساب مل جائے گا،پشاور میٹرو کے 150 ارب اور اربوں ڈالر کا قرضہ کہاں جہاں رہا ہے یہ بھی پتہ چل جائے گا۔

مریم اونگزیب کا کہنا ہے کہ عمران مافیا نے 18ماہ میں روزگار ، کاروبار اور معیشت تباہ کردی ہے،اپنی نااہلی چھپانےکےلیےسیاسی مخالفین کےگھروں پرچھاپےمارےگئے۔