کراچی کے علاقے کیماڑی میں پراسرارگیس کے اخراج سے 6افراد جاں بحق ہوگئے جبکہ 50 سے زائد شہریوں کی حالت غیر ہوگئی،جنہیں نجی اور سرکاری اسپتالوں میں منتقل کیاگیا۔

کراچی پورٹ سے ملحقہ علاقے کیماڑی میں پراسرارگیس کااخراج ہوا، جس کے باعث 6 افراد جان سے ہاتھ دھو بیٹھے جبکہ درجنوں شہریوں کی حالت غیرہوگئی۔

 جس کے بعد نجی اسپتال میں سائرن بجاتی ایمبولینسوں کی قطاریں لگ گئیں، وقفے وقفے سے متاثرہ افرادکواسپتال منتقل کیاجاتارہا، اسپتال میں متعددشہری اپنی گاڑیوں  اور رکشوں سے طبی امدادکے لیے اسپتال پہنچے ۔

 واقعےکی اطلاع ملنے پرپیپلز پارٹی کے رہنماء اورصوبائی وزیرسعید غنی بھی اسپتال پہنچے۔

مثاثرہ افرادسے ملاقات کے بعدمیِڈیاسے گفتگومیں 6افرادکی اموات کی تصدیق کرتے ہوئے سعید غنی کاکہناتھاکہ واقعے کی تہہ تک جائیں گے،کے پی ٹی حکام کو بتانا چاہیئےکہ ایساہواکیاجو زہرآلود گیس ہوامیں پھیلی۔

فلاحی ادارے کے سربراہ فیصل ایدھی کاکہناتھا کہ زیادہ ترمتاثرین آرجی ریلوے کالونی کے رہاشی ہیں،علاقے میں متاثرکرنے والے گیس کااثرفوری محسوس نہیں ہوا۔

 کے پی ٹی حکام نے واقع پرپورٹ سے گیس اخراج کی خبروں کوبے بنیادقراردیاجبکہ زہرآلود پراسرارگیس سے متاثرین میں مردخواتین اور بچوں کو مختلف اسپتالوں میں منتقل کیاگیا۔

  ہوامیں پراسرارگیس پھیلنے سے شہریوں کی ہلاکت اور بے ہوش ہونے کے معاملے وزیراعلی سندھ مرادعلی شاہ نے کمشنرکراچی سے واقع کی تفصیلی رپورٹ طلب کی۔

وفاقی وزیرپورٹ علی زیدی سمیت دیگرسیاسی رہنماؤں نے بھی واقعےکی تحقیقات کرانے اور متاثرین کی بہترطبی امدادفراہم کرنے کی اپیل کی۔