اسلام آباد:اسلام آباد ہائی کورٹ  نے سانحہ تیز گام سے متعلق کیس میں سخت ریمارکس دیئے ہیں کہ کیا اب وزیر اعظم کو بلا کر پوچھنا پڑے گا کہ آپ کی 2وزارتیں کچھ بتانے کے قابل ہی نہیں ۔

اسلام آباد ہائی کورٹ میں سانحہ تیزگام کی تحقیقات کے لیے دائردرخواست پرسماعت ہوئی۔

 سانحے کی انکوائری رپورٹ پیش نہ ہونے پر عدالت نے وزارت ریلوے اور وزارت داخلہ حکام پر برہمی کا اظہار کیا۔

 جسٹس محسن اختر کیانی نے ریمارکس دیئے کہ 5مہینے ہوگئے ہیں،یہی کہا جا رہا کہ رپورٹ آئے گی تو دیں گے، کیا اب وزیراعظم کو بلا کر پوچھنا پڑے گا؟،کیا وزیراعظم سے پوچھنا ہوگا،شہری جل کر مرگئے اور آپ کی 2وزارتیں اس قابل نہیں کہ کچھ بتا سکیں ۔

جسٹس محسن اختر کیانی نے داخلہ اور ریلوے کی وزارت سے متعلق مزید کہاکہ دونوں وزارتیں سورہی ہیں ،ان کے بقول کوئی مرا ہی نہیں ،وفاقی حکومت کو ابھی تک پتہ نہیں کہ ایف آئی آردرج ہوئی یا نہیں ،اسلام آباد کی ایک عمارت میں بیٹھ کرلوگوں کے ساتھ ظلم کر رہے ہیں، اگرکام نہیں کریں گے تو ہم آرڈر دےکر کام کروائیں گے۔

 جسٹس محسن اختر کیانی نے ریمارکس دیے کہ حکام نے اسلام آباد ہائی کورٹ کو ڈاکخانہ سمجھا ہوا ہے،5مہینے گزرنے کے بعد رپورٹ کے لیے خط لکھ رہے ہیں۔

درخواست گزار نے کہاکہ سانحے کا مقدمہ بھی متعلقہ تھانے میں درج نہیں کرایا گیا۔

عدالت نے سیکرٹری ریلوے ،سیکرٹری داخلہ اور تفتیشی افسر کو ذاتی حیثیت میں پیش ہونے کا حکم دیتے ہوئے سماعت 24 فروری تک ملتوی کردی۔