اسلام آباد:وزیراعظم کے معاون خصوصی ڈاکٹر ظفر مرزا نے کہا ہے کہ بچوں کو مستقل اپاہجی سے بچانے کےلیے پولیو کے قطرے پلائیں ،ملک بھر میں  قومی انسداد پولیو مہم جاری ہے،3 کروڑ 90 لاکھ سے زائد  بچوں کو پولیو کے قطرے پلانا ہدف ہے۔

ڈاکٹر ظفر مرزا نے کہا ہے کہ حکومت پولیو کے خاتمے کے لیےجنگی بنیادوں پر مؤثر اقدامات کر رہی ہے ،ملک بھر میں جاری مہم میں 2 لاکھ65 ہزار پولیو ورکرز حصہ لے رہے ہیں، عوام سے درخواست ہے اپنے بچوں کو مستقل اپاہج ہونے سے بچانے کے لیے پولیو قطرے ضرور پلائیں، پولیو کی جنگ عوام کی مدد کے بغیر نہیں جیتی جا سکتی۔

ڈاکٹر ظفر مرزانے فرنٹ لائنز ورکرز کو قوم کا اصلی ہیروز قرار دیتے ہوئے ان کی خدمات کو خراج تحسین پیش کیا۔

وزیراعظم کے معاون خصوصی کا کہنا تھا کہ معصوم بچے ہمارے مستقبل کا سرمایہ ہیں،والدین ہیپ لائن پر رابطہ کرکے مہم میں رہ جانے والے بچوں کی رپورٹ بھی کرسکتے ہیں، جس پر فوری طور پر پولیو ٹیمیں ان کے گھروں جا کر بچوں کو قطرے پلائیں گی۔