اسلام آباد:سپریم کورٹ نے کنگ حماد یونیورسٹی آف نرسنگ اینڈ ایسوسی ایٹ میڈیکل سائنسز سے متعلق کیس میں ریمارکس دیئے کہ بہتر ہے نیب کام کرنے سے رکا رہے، پہلے اسپتال بن جانے دیں۔

چیف جسٹس گلزار احمد کی سربراہی میں سپریم کورٹ کے 3 رکنی بینچ نے کنگ حماد یونیورسٹی آف نرسنگ اینڈ ایسوسی ایٹ میڈیکل سائنسزمیں بے قاعدگیوں کے کیس کی سماعت کی۔

ڈپٹی پراسیکیوٹر نیب اور میئراسلام آباد عدالت میں پیش ہوئے۔

 چیف جسٹس نے ریمارکس دیئے کہ قطر کی حکومت نے کنگ حماد یونیورسٹی کے لیے10 سال قبل 10 ارب روپے عطیہ کیے تھے،کیا سی ڈی اے نے اسپتال کی تعمیر کےلیےاراضی دے دی؟ ۔

جسٹس گلزار احمد نے استفسارکیا کہ اس کیس کے ساتھ نیب کا کیا لینا دینا ہے؟نیب عدالت سے کیا چاہتا ہے؟جس پر ڈپٹی پراسیکیوٹرنیب کا کہنا تھا کہ عدالت نے نیب کوکام کرنے سے روک رکھا ہے۔

چیف جسٹس گلزار احمد نے کہا کہ بہتر ہے نیب کام کرنے سے رکا رہے، پہلے اسپتال بن جانے دیں۔

چیف جسٹس نے میئراسلام آباد سے اب تک اراضی فراہم نہ کرنے کی وجہ پوچھی تو میئرنےجواب دیتے ہوئے کہا کہ وہ کسی دوسرے مقدمے میں پیش ہوئے ہیں یہ معاملہ سی ڈی اے سے متعلق ہے ۔

جسٹس گلزار احمد نے ریمارکس دیئے کہ میئرصاحب کو معلوم ہی نہیں کہ شہرمیں کیا ہو رہا ہے ، جس پر ڈپٹی پراسیکیوٹرنے بتایا کہ بلٹ اپ پراپرٹی ایوارڈ بنانے میں کرپشن اور بے ضابطگیاں ہوئیں ہیں۔

عدالت نے سیکرٹری نیشنل ہیلتھ اینڈ سروسز اور سی ڈی اے کو نوٹسز جاری کرتے ہوئے سماعت غیرمعینہ مدت کےلیے ملتوی کردی۔