اسلام آباد: سپریم کورٹ نے ایئر مارشل ارشد محمود ملک کو پی آئی اے یا ائیر فورس میں سے کوئی ایک ادارہ رکھنے کا آپشن دے دیا،چیف جسٹس گلزار احمد نے پی آئی اے کیس میں ریمارکس دیئے کہ چار جہاز چلے گئے، پی آئی اے کو خبر تک نہیں ہے، جتنا کھوج لگا رہے ہیں نئی باتیں آ رہیں  ہیں،اربوں روپے کا نقصان ہوگیا ،حکومت کو کوئی فکر نہیں ہے۔

چیف جسٹس گلزاراحمد کی سربراہی میں سپریم کورٹ کے 3رکنی بینچ نے سی ای او پی آئی اے تقرری کیس پرسماعت کی ،  پی آئی اے نے رپورٹ پیش کی۔

جسٹس اعجازالاحسن کے استفسار پر وکیل پی آئی اے نے کہاکہ جرمن سی ای او نے جہاز فروخت کرنے کا فیصلہ کیا جو مالٹا میں فلم کی شوٹنگ کےلیے استعمال ہوا جس کے بعد جہاز جرمنی گیا۔

چیف جسٹس نے ریمارکس دیئے کہ مطلب جہاز کمرشل مقاصد کے لیےاستعمال نہیں ہوگا ، فلم کمپنی اسرائیلی ہونا بہت سنجیدہ بات ہے،پی آئی اے کے لوگو کے ساتھ کھیل کھیلا گیا،فروخت کی گئی رقم سے 10گنا زیادہ اخراجات ادا کیے گئے ۔

جسٹس گلزار احمد نے ریمارکس دیئے کہ رپورٹ میں مزید 3جہازوں کا بھی ذکر ہے ،یہ جہاز کہاں گئے کسی کو خبر نہیں ، کیا جہاز کھول کر کباڑ خانے میں تو نہیں دے دیئے، پی آئی اے والے صرف کاغذی کارروائی کرکے آئے ہیں ،کھلی عدالت میں مزید کچھ نہیں کہنا چاہتا ۔

وکیل پی آئی اے نے 3جہازوں سے متعلق رپورٹ جمع کروانے کی یقین دہانی کروائی۔

چیف جسٹس نے ریمارکس دیئے کہ ارشد محمود ملک ایئرفورس چھوڑ کرمستقل پی آئی اے میں آ جائیں ،ایک کام ہوگا پی آئی اے میں یا پھرایئرفورس میں کام کریں گے۔

بعدازاں سپریم کورٹ نے سی ای او پی آئی اے تقرری کیس کی سماعت مارچ کے پہلے ہفتے تک ملتوی کردی۔