کراچی،اسلام آباد:ملک میں مزید 2افراد میں کورونا وائرس کی تصدیق ہوگئی، مرض میں مبتلا افراد کی تعداد 4ہوگئی، نئے کیسز بھی کراچی اور اسلام آباد میں رپورٹ ہوئے ہیں۔

کراچی اور اسلام آباد میں مزید 2 افراد میں کورونا وائرس کی تصدیق ہوگئی،جس کے بعد  ملک میں متاثرہ افراد کی تعداد 4 ہوگئی۔

 وزیراعظم کے معاون خصوصی برائے صحت ڈاکٹر  ظفر مرزا نے پریس کانفرنس کے دوران  مزید 2 نئے کیسز سامنے آنے کی تصدیق کی۔

نئے کیسز بھی کراچی اور اسلام آباد میں رپورٹ ہوئے ہیں جس کے بعد انہیں خصوصی مراکز میں منتقل کردیا ہے جبکہ دونوں مریضوں نے حال ہی میں ایران کا سفر کیا تھا ایک مریض کو جلد ہی اسپتال سے فارغ کردیا جائے گا۔

  تفتان میں پھنسے زائرین کو واپس لانے کی بھی حکمت عملی تیار کر لی گئی جبکہ اسلام آباد ایئرپورٹ پر آٹو میٹک تھرمل سکینرز کے کامیاب تجربے کے بعد  جدید سکینرز کو کراچی، لاہور اور پشاور ایئرپورٹ پر بھی نصب کردیا گیا ہے۔

 جدید سکینرز کی مدد سے کورونا وائرس کی تشخیص کا عمل مزید مؤثر ہو گیا، جدید سکینر خود کار نظام کے تحت مسافروں کے فلو اور بخار کی تشخیص کرتے ہیں۔

 ذرائع ایئرپورٹ کے مطابق سینٹرل ہیلتھ اسٹیبلشمنٹ ملکی ایئرپورٹس پر 6لاکھ 20ہزار افراد کی سکریننگ مکمل کرچکی ہے۔