لاہور:مسلم لیگ ن کے ناراض ارکان نے وزیر اعلیٰ پنجاب کو یقین دہانی کراتے ہوئے کہا کہ آئندہ الیکشن پی ٹی آئی کے پلیٹ فارم سے لڑیں گے، پارٹی نے دباؤ بڑھا یا یا ایکشن لیا تواستعفیٰ دینے کو تیار ہیں۔

مسلم لیگ ن کے ناراض ارکان صوبائی اسمبلی نے پاکستان تحریک انصاف کی قیادت کو بڑی پیشکش کردی۔

وزیر اعلیٰ پنجاب عثمان بزدارسے ن لیگی ارکان اسمبلی کی ملاقات کی اندرونی کہانی سامنے آگئی۔

ذرائع کا کہنا ہے کہ مسلم لیگ ن اور پیپلز پارٹی کے اراکین اسمبلی کی منگل کے روز وزیر اعلی پنجاب سردار عثمان بزدار سے ہونے والی ملاقات میں طے پایا ہے کہ وہ پی ٹی آئی کی حکومت کے ساتھ ہیں اور ان کے ہر ایسے اقدام جو کہ عوامی اور قومی مفاد میں ہوگا اس کا ساتھ دیں گے۔

ملاقات میں اس بات پر بھی اتفاق کیا گیا کہ مسلم لیگ نون نے زیادہ دباؤ بڑھایا یا کوئی ایکشن لیا تو اسمبلی کی رکنیت سے بھی استعفی دینے کو تیار ہیں اور  ایکشن کی صورت میں استعفی دے  کر ضمنی الیکشن پی ٹی آئی کی حمایت سے بھی لڑنے کو تیار ہیں۔

ذرائع کا کہنا ہے کہ ناراض اراکین نے فیصلہ کیا ہے کہ اب مسلم لیگ ن کے ساتھ نہیں چلیں گے صرف لیگل کور مسلم لیگ ن کا رہے گا اور مسلم لیگ ن کو کسی ووٹنگ میں ان ارکان کا ووٹ نہیں ملے گا۔

ذرائع کے مطابق مجموعی طور پر  اب تک 15 ارکان انفرادی اوراجتماعی طورپر وزیراعلیٰ  پنجاب  سے مل چکے ہیں،6ارکان کی ملاقات ریکارڈ پر آچکی  جبکہ 9 ارکان مناسب وقت پر اپنی ملاقات کا اعلان کریں گے۔