اسلام آباد:وزیراعظم عمران خان نے کہا ہے کہ کورونا وائرس کے باعث دنیا پاکستان جیسے دیگر ترقی پزیر ممالک کاقرضہ معاف کرنے کا سوچے، اس اقدام سے کورونا وائرس سے نمٹنے میں مدد ملے گی ورنہ معیشت پر بہت برا اثر پڑے گا ،پاکستان میں کورونا وائرس زیادہ پھیلا تواس سے نمٹنے کی صلاحیت اوروسائل نہیں ہیں۔

 وزیراعظم عمران خان نے عالمی برادری کوترقی پزیر ممالک کے قرضے معاف کرنے کا مشورہ دے دیا ۔

 امریکی خبرایجنسی کودیے گئے انٹرویومیں وزیراعظم کا کہنا تھا کہ کورونا بڑا خطرہ ہے،جو بڑا بحران بن سکتا ہے ،کورونا وائرس سے ترقی پزیرملکوں کی مشکلات بڑھ گئیں،جس سے معیشت کو بڑا نقصان پہنچ سکتا ہے ،دنیا پاکستان جیسے دیگرترقی پذیرممالک کا قرضہ معاف کرنے کے بارے میں سوچے ،اس اقدام سے ہمیں کورونا وائرس سے نمٹنے میں مدد ملے گی۔

 عمران خان نے مزید کہا کہ کورونا ملک میں پھیلا تومعیشت بحال کرنے کی کوششوں کوسنگین نقصان ہوگا جبکہ اتنے بڑے بحران سے نمٹنے کیلئے ہمارے پاس طبی سہولتیں ناکافی ہیں ۔

وزیراعظم عمران خان نے ایران سےبھی پابندیاں اٹھانے کا مطالبہ کرتے ہوئے کہاکہ پابندیاں اٹھانے سے ایران کو کورونا وائرس سے نمٹنے میں مدد ملے گی۔

طالبان امریکا مذاکرات کے حوالےسےوزیراعظم کا کہنا تھا کہ طالبان کے حوالے سے افغان صدر کا بیان مایوس کن ہے، حکومت میں آنے کے بعد امریکا کے ساتھ افغان امن معاہدے پر کام کیا، افغان امن عمل میں پاکستان کی کوششوں کی تعریف کی جانی چاہیے جبکہ پاکستان اب امن کیلئے امریکا کا ساتھی ہے۔