اسلام آباد:سپریم کورٹ آف پاکستان نے مسلم لیگ ن کے رہنماءخواجہ سعد رفیق اور ان کے بھائی سلمان رفیق کی 15 ماہ گرفتاری کے بعددرخواست ضمانت منظور کرلی۔

 جسٹس مقبول باقر کی سربراہی میں سپریم کورٹ کے 2رکنی بینچ نے خواجہ سعد اور خواجہ سلمان رفیق کی درخواست ضمانت پرسماعت کی۔

اس موقع پر سابق وزیر اعظم شاہد خاقان عباسی، احسن اقبال، رانا ثناء اللہ اور دیگر مرکزی قیادت بھی کمرہ عدالت میں موجود تھی۔

خواجہ برادران کے وکیل امجد پرویز نے کیس کی تفصیلات ، ٹرانزیکشن اورگرفتاری سے متعلق آگاہ کیااور بتایا کہ گرفتاری 2018 میں ہوئی ،چھ ماہ بعد ریفرنس دائر کیا ، 122 گواہ میں صرف 5 گواہوں کے بیانات قلمبند ہوئے، مقصد صرف خواجہ برادران کیخلاف کیس بنانا تھا ۔

جسٹس مقبول باقر نے ریمارکس دیئے کہ  نیب میں کام کرنے کی صلاحیت نہیں یا نیت نہیں دونوں صورت حال میں معاملہ انتہائی سنگین ہے، نیب کے پاس ضمانت خارج کرنے کی کوئی بنیاد نہیں، خواجہ برادارن کے اکاونٹس میں پیسے آئے ہیں تواس میں غیرقانونی کیا ہے، وہ تومان رہے ہیں کہ پیسے آئے ہیں، اگر کوئی غیرقانونی کام ہوا ہے تونیب دکھائے ۔

عدالت نے دلائل مکمل ہونے پر خواجہ سعدرفیق اورسلمان رفیق کی درخواست ضمانت منظور کرتے ہوئے دونوں کو ضمانت پررہا کرنےکاحکم دے دیا۔

عدالت نےسعد رفیق اور سلمان رفیق کو 30،30لاکھ روپے کے 2مچلکے ٹرائل کورٹ میں جمع کرانے کا حکم دے دیا۔

 مسلم لیگ ن کے رہنماؤں نے چیئرمین نیب سے مستعفی ہونے کا مطالبہ کرتے ہوئے کہاکہ نیب کی نالائقی اور بدنیتی عیاں ہوگئی اب یہ سلسلہ بند ہونا چاہیئے۔

 مسلم لیگ ن نے الزام عائد کیا کہ اپوزیشن کی زبان بندی کیلئے نیب کو استعمال کیا جا رہا جو قابل قبول نہیں۔