سکھر قرنطینہ سینٹر  میں موجود افراد کی بڑی تعداد احتجاج کرتے ہوئے کمروں سے نکل آئی خبر میڈیا پر دیکھ کراویس شاہ سینٹر پہنچ گئے۔ انہوں نے  کہا کہ احتجاج کرنے والے زائرین نہیں رضاکار تھے،میڈیا نے غلط رپورٹنگ کی ہے۔

قرنطینہ سینٹر کے باہر میڈیا سے گفتگو کرتے ہوئے سندھ کے وزیر ٹرانسپورٹ اور وزیر اعلیٰ سندھ کی جانب سے سکھر کےلئے مقرر کیے گئے فوکل پرسن سید اویس قادر شاہ نے کہا کہ احتجاج کرنے والے زائرین نہیں رضاکار تھے میڈیا ایسی بات نہ پھیلائے جن سے خوف ہراس پھیلے۔

انہوں نے کہا کہ قرنطینہ سینٹر میں صورتحال معمول کے مطابق اور پرامن ہے جس وقت احتجاج ہورہا تھا زائرین اپنے بلاکس میں تھے اور ان میں سے کوئی باہر نہیں نکلا تھا ۔

ان کا کہنا تھا کہ رضاکاروں کا کچھ مسئلہ تھا جسے اب حل کرلیا گیا ہے ہم زائرین کو ہر ممکن سہولت فراہم کررہے ہیں۔ میں خود رات کو 12 بجے تک یہیں موجود ہوتا ہوں ان کو تازہ تیار کردہ کھانا فراہم کیا جاتا ہے۔ شکایات کے حوالے سے  باتیں درست نہیں ہیں۔

ان کا کہنا تھا کہ کرونا وائرس سے مل کر مقابلہ کرنا ہے اس میں میڈیا ہمارا ساتھ دے۔