اسلام آباد:وزیرخارجہ شاہ محمود قریشی کا کہناہے کہ قومی رابطہ کمیٹی نے  17پروازیں بحال کرنے کی منظوری دی ہے،بیرون ملک پھنسے پاکستانیوں کو بتدریج واپس لائیں گے۔

وزیر خارجہ  شاہ محمود قریشی نے دنیا بھر میں وطن واپسی کے منتظر پاکستانیوں کو واپس لانے کے حوالے سے اہم بیان دیتےہوئے کہا کہ بہت سے پاکستانی بیرون ممالک سے وطن واپس آنا چاہتے ہیں،  گزشتہ روز قومی رابطہ کمیٹی نے  صورتحال کا نوٹس لیتے ہوئے 17پروازیں بحال کرنے کی منظوری دی ہے، ہم ان پاکستانیوں کو بتدریج واپس لائیں گے، 4سے11اپریل تک بین الاقوامی پروازوں کے شیڈول کا اعلان کیا ہے۔

شاہ محمود قریشی کا کہنا تھا کہ ہماری پہلی ترجیح ٹرانزٹ میں پھنسے پاکستانیوں کو وطن واپس لانا ہے، دوسری ترجیح ویزہ ایکسپائر ہونے والے پاکستانی اور تیسری ترجیح زیر تعلیم واپسی کے منتظر   طلباء کو واپس لانا ہے، ہمیں ان تمام مسافروں کو ایئر پورٹ پر کورونا ٹسٹنگ سے گزارنا ہے،جس کیلئے ٹسٹنگ اور کوارنٹائین کی استعداد کار کو بتدریج بڑھا رہے ہیں۔

وزیرخارجہ شاہ محمود قریشی کا مزید کہنا تھا کہ پروٹوکول پر مکمل عملدرآمد ہو گا توکراچی کیلئے بھی پروازیں کھولیں گے۔