کراچی : کراچی سمیت سندھ بھر میں ساڑھے 3 گھنٹے مکمل لاک ڈاؤن رہا،نماز جمعہ کے اجتماعات نہیں ہوئے، عوام نے گھروں میں نماز ادا کی۔

حکومت سندھ کی جانب سے جمعے کے روز دوپہر 12 بجے سے ساڑھے 3 بجے تک کیلئے مکمل لاک ڈاؤن کا اعلان کیا گیا تھا جس پرکراچی سمیت صوبے بھر میں مکمل لاک ڈاؤ ن رہا۔

ملک کے مختلف شہروں میں نماز جمعہ سے متعلق حکومتی احکامات پر عوام نے بھرپور عمل کیا، حکومتی پابندی کے باعث نماز جمعہ کے اجتماعات نہیں ہوئے،مساجد ویران رہیں، پابندی کے باعث مساجد میں پیش امام، موذن اور انتظامیہ سمیت 5 افراد کو نماز ادا کرنے کی اجازت دی گئی، لاک ڈاؤن کے باعث شہریوں کی بڑی تعداد نے نماز گھروں میں ہی ادا کی۔

سندھ کے مختلف شہروں میں بھی شہریوں نے حکومتی احکامات پر من و عن عمل کیا،قانون نافذ کرنے والے اداروں کے اہلکار سڑکوں پر موجود رہے،عوام کی معمولی نقل وحرکت اور سڑک پر چند گاڑیاں بھی دکھائی دیتی رہیں۔

شہر کے مختلف مقامات پر انتظامیہ نے سڑکوں کو بیرئیرلگا کر بند رکھا،ناکے لگا کر سیکیورٹی اہلکار عوام سے پوچھ گچھ بھی کرتے رہے۔

سیکورٹی اہلکارمیڈیکل ایمرجنسی کی اصطلاح سے ہی ناواقف نکلے،طبی عملہ مستثنیٰ ہونے کے باوجود بھی پابندیوں کا شکار رہا۔

سابق سینئرڈائریکٹراور اسپینسراسپتال کے سربراہ ڈاکٹربیربل گینانی کو بھی اسپتال جانے سے روک دیاگیا۔

نوٹیفکیشن کے مطابق جمعہ کے روز ساڑھے 3بجے سے ساڑھے 6بجے تک کرونا وائرس سے استثنیٰ تمام دکانیں کھلی رہیں گی۔

دوسری جانب لاک ڈاؤن میں 14اپریل تک توسیع کے اعلامیے کے مطابق دودھ کی دکان صبح 5بجے سے رات 8بجےتک کھل سکیں گی۔

یاد رہے کہ سندھ حکومت نے کورونا وائرس کے پھیلاؤ کو روکنے کیلئے صوبے میں 22 مارچ سے لاک ڈاؤن کا اعلان کیا تھا۔

بعدازاں صوبائی حکومت کی جانب سے لاک ڈاؤن میں سختی کرتے ہوئے مساجد میں باجماعت پنجگانہ نماز اور نماز جمعہ محدود کرنے کے احکامات بھی جاری کیے گئے تھے۔