مردان میں کورونا وائرس سے متاثرہ علاقہ منگا کو ڈی سیل کردیا گیا،علاقے میں  17 روز تک لاک ڈاوٴن رہا۔

ڈپٹی کمشنر مردان نے متاثرہ علاقہ منگا کو ڈی سیل کرنے کااعلامیہ جاری کردیا ، 56 ہزار کی آبادی پر مشتمل علاقہ منگاہ میں گزشتہ 17 روز سے لاک ڈاوٴن تھا۔

نیشنل انسٹی ٹیوٹ آف ہیلتھ اسلام آباد کی ٹیم نے یوسی منگا کا دورہ کیا اور 109 افراد کے سیمپل لئے گئے جو کہ نیگیٹیو آئے،جس کے بعد کمشنر مردان کی سربراہی میں منعقد ہونے والے اجلاس میں علاقے کی ڈی سیلنگ کا فیصلہ کیا گیا ۔

شہریوں کا کہنا تھا کہ عوام نے انتظامیہ کے ساتھ ملکر کرونا وائرس کو شکست دے دی ۔۔

ڈپٹی کمشنر مردان کے مطابق زیادہ تر علاقے آج کھولے جائیں گے جبکہ جراثیم کش سپرے کے بعد دوسرے مرحلے میں باقی علاقے بھی کھول دئیے جائیں گے ۔