راولپنڈی :پاک فوج نے میڈیکل اسٹاف کیلئےحفاظتی سامان بلوچستان بھجوا دیا،آرمی چیف جنرل قمر جاوید باجوہ کا کہنا ہے کہ حکومت ضروری وسائل اور آلات کے حصول کیلئے کوشاں ہے،مشکل حالات میں صبر اور ثابت قدمی دکھانے کی ضرورت ہے، کورونا کیخلاف جنگ میں طبی عملہ فرنٹ لائن سپاہی ہے۔

 ڈی جی آئی ایس پی آر میجر جنرل بابر افتخار کے مطابق آرمی چیف جنرل قمر جاوید باجوہ کی خصوصی ہدایات پر کورونا وائرس سے نبردآزما بلوچستان کےمیڈیکل اسٹاف کیلئےضروری سامان بھجوا دیا گیا۔

طبی آلات کی ایمرجنسی سپلائی کوئٹہ کیلئے روانہ کی گئی، جس میں پرسنل پروٹیکٹو آلات اور طبی ساز و سامان شامل ہے۔

 پاک فوج کے سپہ سالار جنرل قمر جاوید باجوہ نے اس حوالے سے اپنے بیان میں کہا کہ کورونا وائرس کیخلاف جنگ میں ڈاکٹر اور پیرا میڈیکس اسٹاف فرنٹ لائن کے سپاہی ہیں۔

آرمی چیف کا کہنا تھا کہ کورونا کی وباء سے نمٹنے کیلئے جدید طبی سیولیات کے حامل ترقی یافتہ ممالک اور حکومتیں بھی مشکلات کا سامنا کررہی ہیں، پاکستان کی حکومت بھی ضروری وسائل اور آلات کے حصول کیلئے کوشاں ہے، موجودہ مشکل حالات میں ہم سب کو صبر کا مظاہرہ کرتے ہوئے ثابت قدمی دکھانے کی ضرورت ہے۔