اسلام آباد:سپریم کورٹ نے کورونا وائرس از خود نوٹس کیس سے متعلق گزشتہ روز کی سماعت کا تحریری حکم نامہ جاری کر دیا ، جس میں کہا گیا کہ حکومتی اعلیٰ سطح اجلاس کی تفصیلات عدالت میں پیش کی جائیں ۔

چیف جسٹس گلزاراحمد کی سربراہی میں سپریم کورٹ کے 5رکنی لارجر بینچ نے  گزشتہ روز کورونا وائرس ازخودنوٹس کیس کی سماعت کی ۔

عدالت نے کورونا وائرس از خود نوٹس کیس سے متعلق گزشتہ روز ہونے والی سماعت کا تحریری حکم نامہ جاری  کردیا،جس میں حکومتی اعلی سطح اجلاس کے فیصلوں کی تفصیلات عدالت میں پیش کرنے کا حکم دیا گیا ہے۔

سپریم کورٹ نے اپنے تحریری حکم نامہ میں کہا ہے کہ اٹارنی جنرل نےبتایاکہ تمام وسائل بروئےکارلائے جا رہےہیں ،کوروناسےمتعلق قانون سازی کیلئے حکومت سے مشاورت کی یقین دہانی کرائی گئی،تمام صوبوں نےبھی کوروناسےتحفظ کیلئےاقدامات کی یقین دہانی کرائی ہے۔

  سپریم کورٹ کا کہنا ہے کہ ملک بھر کے ڈاکٹرز اور پیرا میڈیکل اسٹاف فرنٹ لائن پر ہیں،میڈیکل عملے کو حفاظتی کٹس سمیت تمام ضروری طبی سامان مہیا کیا جائے، پی ایم اے کے سربراہ نے 40000 ڈاکٹرز کی رجسٹریشن جلد مکمل کرنے کی یقین دہانی کرائی، کورونا سے متعلق تفصیلات عدالت میں پیش کی جائیں۔

عدالت عظمیٰ کا تحریری حکم نامے میں مزیدکہنا ہے کہ  کراچی میں 11 یونین کونسلز کو سیل کر دیا گیا ،سندھ میں حالات بہت خراب ہیں عوام انتظامیہ سے تنگ آکر سراپا احتجاج ہے،سندھ کی عوام کو ضروری اشیا ءخریدنے کی کوئی سہولت نہیں دی جارہی۔

سپریم کورٹ کا کہنا ہے کہ سندھ حکومت کی جانب سے 8 ارب روپے راشن تقسیم کرنے کی کوئی تفصیل پیش نہیں کی گئی،صوبائی حکومت آئندہ سماعت پر تفصیلی رپورٹ جمع کرائےجبکہ پنجاب حکومت کی جانب سے بین الصوبائی سفری پابندی کا نوٹیفکیشن کالعدم قرار دیا گیا ہے،کیس کی مزید سماعت 20 اپریل کو ہوگی۔