کورونا وائرس کيخلاف فرنٹ لائن پر لڑنے والا کراچی کا ایک اور ڈاکٹر مہلک مرض کا شکار ہوگیا، سندھ حکومت نے ڈاکٹر فرقان کے انتقال کی تحقیقات کیلئے انکوائری کمیٹی تشکیل دے دی۔

کراچی ميں لوگوں کی زندگياں بچانے والا ایک اور  ڈاکٹر خالق حقیقی سے جا ملا، 60 سالہ ريڈيالوجسٹ ڈاکٹر فرقان نے کورونا ٹيسٹ مثبت آنے پر خود کو گھر  ميں قرنطينہ کرليا تھا، گزشتہ روز طبعيت بگڑنے پر کئی اسپتالوں سے رابطے کئے مگر کہيں وينٹی ليٹر نہ ملا۔

 اہلخانہ کے مطابق ڈاکٹر فرقان نے ايک ايمبولينس والے  سے کہا کہ انہيں انڈس اسپتال پہنچايا جائے ليکن ايمبولينس  والے نے يہ کہہ کر لے جانے سے انکار کرديا کہ انڈس  اسپتال ميں جگہ نہيں ہوتی۔

 وزير اطلاعات سندھ ناصر حسين شاہ نے کہا واقعے پر دلی افسوس  ہے ، غفلت ميں جو بھی ملوث ہوا اس کیخلاف کارروائی ہوگی۔

 ترجمان سندھ حکومت مرتضیٰ وہاب کے مطابق ڈاکٹر فرقان کے انتقال سے متعلق انکوائری کیلئے نوٹیفکیشن جاری کر دیا ہے، کمیٹی کو انکوائری رپورٹ 24 گھنٹے میں جمع کرانے کی ہدایت  کی گئی ہے۔

 نوٹیفکیشن کے مطابق ڈاکٹر فیاض احمد عباسی انکوائری کمیٹی کے چیئرمین مقرر کیے گئے ہیں جبکہ کمیٹی کے دیگر ارکان میں  پروفیسر احمد سراج اور ڈاکٹر سکندر میمن شامل ہیں۔

 واضح رہے ڈاکٹر فرقان کراچی انسٹيٹيوٹ آف ہارٹ ڈيزيز ميں  آر ايم او تھے اور کچھ ماہ قبل آئی ایچ ڈی سے ريٹائرڈ ہوئے تھے۔