لاہور :مسلم لیگ ن کے رہنماء اور سابق وزیرریلوے خواجہ سعد رفیق کا کہنا ہے کہ 18ویں ترمیم پر ن لیگ سے کسی نے کوئی رابطہ نہیں کیا۔

لاہورکی  احتساب عدالت کے جج جواد الحسن کے روبرو خواجہ سعد رفیق اور سلمان رفیق پیش ہوئے ،عدالت کے روبرو پیراگون سٹی کی زمینوں کی رجسٹریشن کا ریکارڈ پیش کیا گیا۔

نیب پراسیکوٹر نے عدالت کو بتایا کہ مقدمہ کے گواہان موجود ہیں جبکہ وعدہ معاف گواہ قیصر امین بٹ کی میڈیکل رپورٹ پیش کی گئی۔

عدالت نے مقدمہ کے وعدہ معاف گواہ کو آئندہ سماعت پر طلب کرتے ہوئے سماعت 2جون تک ملتوی کر دی۔

میڈیا سے گفتگو کرتے ہوئے ن لیگی رہنما ءخواجہ سعد رفیق کا کہنا تھا کہ 18ویں ترمیم کے حوالے سے ن لیگ سے کسی نے کوئی رابطہ نہیں کیا، نیب کے قانون میں ترمیم کا18ویں ترمیم میں مزید تبدیلی سے کوئی تعلق نہیں ہے۔

خواجہ سعد رفیق کا کہنا تھا کہ نیب کالا قانون ہے یہ رہے گا تو کاروباری حضرات کام نہیں کر سکیں گئے ،صوبوں کی خود مختاری پر کوئی سمجھوتا نہیں ہونا چاہیے، نیب کا قانون اور ریاستی امور اکھٹے نہیں چل سکتے۔