پاکستان کرکٹ ٹیم کے سابق مایہ ناز آل راؤنڈر عبدالرزاق اور بالی ووڈ اداکارہ تمنا بھاٹیہ سے متعلق یہ افواہیں گردش کررہی ہیں کہ دونوں شادی کرنے والے ہیں تاہم اب اداکارہ نے خود ایک انٹرویو کے دوران اس بات کی وضاحت کردی ہے۔

بھارتی خبر رساں ادارے کے مطابق عبدالرزاق کے ہمراہ شادی سے متعلق افواہوں پر تمنا بھاٹیہ کا کہنا ہے کہ فی الحال میں اپنے کیریئر پر فوکس کررہی ہوں اور مستقبل قریب میں میرا شادی کا کوئی ارادہ نہیں ہے۔

انہوں نے مزید کہا ہے کہ عبدالرزاق کے ساتھ جو تصویر سوشل میڈیا پر وائرل ہورہی ہے وہ 2017 کی ہے اوریہ ایک ایونٹ کے دوران لی گئی تھی۔ دونوں کی اس ایونٹ میں مہمان خصوصی کے طور پر مدعو کیا گیا تھا۔

اداکارہ نے افواہوں کو رد کرتے ہوئے یہ بھی کہا کہ 'ایک دن اداکار، دوسرے دن کرکٹر اور تیسرے دن ڈاکٹر کے ساتھ شادی کی افواہ اُڑا دی جاتی ہے، ان افواہوں کو سن کر ایسا لگتا ہے جیسے میں شوہر کی خریداری پر نکلی ہوئی ہوں'۔

واضح رہے کہ پاکستانی کرکٹر عبدالرزاق پہلے سے ہی شادی شدہ ہیں اور ان کے بچے بھی ہیں، ذیل میں کچھ تصاویر ملاحظہ کریں۔