کراچی میں پہلی بار سخت ترین لاک ڈاؤن کا آغاز ہوگیا، میڈیکل اسٹورسمیت تمام دکانیں بند ہیں،یوم علی کے جلوس کیلئے ایم اے جناح روڈ سیل کردیا گیاجبکہ نماز جمعہ کے اجتماعات پر پابندی ہے۔

سندھ حکومت کی جانب سے کراچی سمیت صوبے بھر میں آج  دوپہر 12بجے سے سہ پہر 3بجے تک سخت لاک ڈاؤن کا اعلان کیا گیا ،جس کا آغاز ہوگیا۔

لاک ڈاؤن کے دوران کے دوران تمام تجارتی سرگرمیاں معطل ہیں جگہ جگہ رکاوٹیں کھڑی کرکے تمام سڑکیں بھی بند کردی گئیں ۔

حکومت سندھ نےآج دوپہر3بجے تک ہر قسم کا کاروبار اور دکانیں مکمل بند کرنے کی ہدایت جاری کیں  ہیں ،گرسری اسٹورز ،میڈیکل اسٹورز ،سبزی ،دودھ،بیکری،کریانہ اور پھلوں کی دکانیں بند ہیں۔

صوبے بھر میں تمام مذہبی اجتماعات پرپابندی برقرار ہےجبکہ نماز جمعہ کے اجتماعات پر اس بار بھی پابندی ہے،کراچی میں دوپہر 12سے 3بجے تک مکمل لاک ڈاؤن رہے گا۔

وزیر اطلاعات ناصر شاہ کے مطابق ،لاک ڈاؤن کے دوران شہریوں کو بلاضرورت گھروں سے نہ نکلنے کی ہدایت کی گئی ہےجو کوئی بلاضرورت گھر سے باہر پایا گیا اس کیخلاف قانونی کاروائی ہوگی،پولیس کو تھانوں کی سطح پر لاک ڈاؤن پالیسی ہے مکمل عملدرآمد کی ہدایت کردی گئی ہے۔

واضح رہے کہ سندھ حکومت نے صوبے بھر میں آئندہ 3 دنوں کے دوران سخت لاک ڈاؤن کرنے کا فیصلہ کیا ہے۔

اس سے قبل جمعہ کے دن صبح 8 بجے سے دوپہر 12 تک اور سہ پہر ساڑھے3بجے سے شام ساڑھے 6 بجے تک کاروبار کی اجازت ہوتی تھی، یعنی دوپہر 12 سے 3 بجے تک مکمل لاک ڈاؤن ہوتا تھا تاہم اس بار سخت لاک ڈاؤن کا دورانیہ بڑھادیا گیا ہے۔

دوسری جانب نشترپارک میں مجلس کے بعد یوم علی کا جلوس برآمد ہوا ،بڑی تعداد میں عزادار شریک ہیں، جلوس مقررہ راستوں سے ہوتا ہوا شام کو کھارادر میں حسینیہ ایرانیان پہنچ کر اختتام پذیر ہوگا۔

یوم علی کے جلوس کیلئے ایم اے جناح روڈ سیل کردیا گیا جبکہ تین ہٹی، لسبیلہ چوک، کشمیر روڈاور نمائش چورنگی سمیت  اطراف کی سڑکوں  اور گلیوں کو کنٹینرز لگاکر بند کردیا گیا ہے۔

جلوس کے مقررہ راستوں پر پولیس اور رینجرز کی بھاری نفری تعینات ہے،راستے بند ہونے کے باعث شہریوں کو شدید مشکلات کا سامنا ہے۔