لاہور: پاکستان تحریک انصاف (پی ٹی آئی )کی رکن پنجاب اسمبلی(ایم پی اے) شاہین رضا کورونا کے باعث لاہور میں انتقال کرگئیں۔

کورونا وائرس سے متاثرہ پی ٹی آئی کی ایم پی اے شاہین رضا لاہور کے میو اسپتال میں آج انتقال کرگئیں۔

ڈپٹی کمشنر دفترگوجرانوالہ سہیل اشرف  نے شاہین رضا کے انتقال کی تصدیق کر دی۔

اسپتال کے سی ای او پروفیسر اسد اسلم کے مطابق شاہین کو 3روز قبل 17مئی کوجب اسپتال لایا گیا تو ان کی حالت تشویشناک تھی، بیگم شاہین کو بلڈ پریشر اورشوگر کا عارضہ بھی لاحق تھا۔

ڈی ایچ کیو اسپتال سے شاہین رضا کو اسی رات لاہور ریفر کر دیا گیا تھا،میو اسپتال میں شاہین رضا کو وینٹی لیٹر پر رکھا گیا تھا، جہاں وہ اب دم توڑ گئیں ،شاہین رضا میں کورونا وائرس کی تصدیق ہوئی تھی۔

اسپتال انتظامیہ نے ایس او پیز کے مطابق مرحومہ کی میت کو غسل کے بعد تابوت میں بند کردیا ، پولیس کی زیرنگرانی میت کو گوجرانوالہ لےجایا جائے گا جہاں کھوکھرکی کے قبرستان میں ایس او پیز کے تحت تدفین کی جائے گی۔

ذرائع کے مطابق مرحومہ نے اپنے آبائی علاقے گوجرانوالہ میں کورونا سے بچاؤ کی بھرپورمہم چلائی، مستحق افراد میں امدادی رقوم اور راشن بھی تقسیم کرتی رہیں۔

وزیر اعظم کا ایم پی اے شاہین رضا کے انتقال پر اظہارافسوس

وزیر اعظم عمران خان نے ایم پی اے شاہین رضا کے انتقال پر افسوس کا اظہار اور لواحقین سے اظہار تعزیت کرتے ہوئے مرحومہ کے درجات کی بلندی کی دعا کی۔

وزیراعلیٰ پنجاب کا کورونا سے شاہین رضا کے انتقال پر افسوس کا اظہار

وزیراعلیٰ پنجاب سردار عثمان بزدار نے کورونا کے باعث جاں بحق رکن پنجاب اسمبلی شاہین رضا کے انتقال پر افسوس کا اظہار کرتے ہوئے مرحومہ کے لواحقین سے دلی ہمدردی اور اظہار تعزیت کیا۔

عثمان بزدار نے کہا کہ شاہین رضا پارٹی کا قابل قدر اثاثہ تھیں،شاہین رضا مرحومہ کی پارٹی کیلئے خدمات کو ہمیشہ یاد رکھا جائے گا۔

گورنر چوہدری محمد سرور اور صوبائی وزرا ءنے بھی مرحومہ شاہین رضا کے انتقال پر اظہار تعزیت کیا اور ان کی مغفرت اور درجات کی بلندی کیلئے دعا کی ۔

واضح رہے کہ شاہین رضا گوجرانوالہ سے تحریک انصاف کی واحد رکن پنجاب اسمبلی تھیں۔

اس سے قبل اسپیکر قومی اسمبلی اسد قیصر سمیت کئی اہم شخصیات کرونا وائرس کا شکار ہوچکی ہیں لیکن کرونا سے کسی منتخب رکن اسمبلی کی یہ پہلی ہلاکت ریکارڈ ہوئی ہے۔