نیویارک :اقوام متحدہ میں پاکستان کے مستقل مندوب منیراکرم نے کہاہے کہ سلامتی کونسل کو کشمیر میں بھارتی جنگی جرائم کا نوٹس لینا چاہیئے،بھارت جنیوا کنونشن کی کھلی خلاف ورزی کررہاہے۔

اقوام متحدہ میں پاکستانی مستقل مندوب منیر اکرم نے سلامتی کونسل کے ورچوئل مباحثے میں شرکت کی ،مباحثے کا موضوع تنازعات میں گھرے سولین کی حفاظت تھا،منیر اکرم نے مباحثے میں پاکستان کا مؤقف پیش کیا۔

پاکستانی سفیر نے مباحثے سے خطاب کرتےہوئے کہا کہ  سلامتی کونسل کو کشمیر میں بھارتی جنگی جرائم کا نوٹس لینا چاہیئے،بھارت کشمیر میں انسانی حقوق اور مروجہ عالمی قوانین کی سنگین خلاف ورزیوں کا مرتکب ہے ۔

منیر اکرم نے مزید کہا کہ  سلامتی کونسل کے مؤثر اقدامات نہ کرنے کی قیمت کشمیریوں کو ادا کرنی پڑتی ہے،بھارت کشمیرمیں زمینی حقائق تبدیل کرنے کی سازشیں کررہا ہے  ،صرف اپریل میں 33 کشمیریوں کوشہید کیا گیا،اس سال ایل اوسی پربھارتی اشتعال انگیزی سے 989شہری شہید کئے گئے ۔

پاکستانی مندوب نے کہا کہ بھارت جنیوا کنونشن کی کھلی خلاف ورزی کررہاہے،بھارت کشمیریوں پرقابض فوج کےساتھ بہیمانہ تسلط قائم کیےہوئےہے۔